រាជធានីភ្នំពេញ ៖ ស្ត្រីម្នាក់ដែលបង្ហាញពីមនោសញ្ចេតនាស្រឡាញ់ប្តីយ៉ាងស្មោះស្ម័គ្រ ព្រោះមិនដែលបែកគ្នាមួយថ្ងៃណានោះ បានធ្វើដំណើរមកប្តឹងប៉ូលិសប៉ុស្តិ៍ទួលសង្កែកាលពីព្រឹកថ្ងៃទី២៥ មេសា ដើម្បីឱ្យប៉ូលិសជួយរកប្តីរបស់នាងផង ព្រោះបាត់ខ្លួនអស់២យប់មកហើយមិនដឹងទៅទីណា ហើយទូរស័ព្ទចំនួន៤ខ្សែក៏ហៅមិនចូលទៀត ។ ស្ត្រីដែលបាត់ប្តីនេះឈ្មោះណាត ស្រីពៅ អាយុ២៣ឆ្នាំ ស្នាក់នៅផ្ទះជួលក្នុងក្រុមទី១ ភូមិទួលគោក សង្កាត់ទួលសង្កែ ខណ្ឌឫស្សីកែវ ។ ចំណែកឯប្តីដែលបាត់មិនដឹងទៅទីណានោះឈ្មោះឈុន ឆាង អាយុ៣២ឆ្នាំ ជាអ្នករត់ម៉ូតូឌុបប្រចាំនៅមុខរង្គសាលបារាំងក្បែផ្សារស៊ីធីម៉ល សង្កាត់ផ្សារថ្មីទី៣ ខណ្ឌដូនពេញ ។
តាមស្ត្រីជាប្រពន្ធឱ្យដឹងថា នាងបានរួមរស់ជាមួយឈ្មោះឈុន ឆាង ជាប្តី-ប្រពន្ធរយៈពេលជាង១ឆ្នាំមកហើយ ដែលប្តីនាងជាបុរសពោះម៉ាយមានកូនប្រុសម្នាក់អាយុ៧ឆ្នាំ ។ ការរស់នៅជាមួយគ្នានេះ គឺប្តីជាទីស្រឡាញ់ប្រកបរបរជាអ្នករត់ម៉ូតូឌុបប្រចាំនៅមុខរង្គសាលបារាំង ហើយមិនដែលបាត់ពីផ្ទះម្តងណាឡើយ ស្រាប់តែនៅយប់ថ្ងៃទី២៣ មេសា ពេលប្តីចេញទៅរត់ម៉ូតូឌុបក៏បាត់រហូតមិនដឹងទៅទីណាហើយទូរស័ព្ទចំនួន៤ខ្សែ ក៏ទាក់ទងមិនចូលទៀត។ ដោយសារមានការព្រួយបារម្ភពីសុវត្ថិភាពរបស់ប្តី ទើបនាងមកប្តឹងប៉ូលិសដើម្បីឱ្យប៉ូលិសជួយស្រាវជ្រាវរកផង ។
ស្ត្រីរូបនេះបានឱ្យដឹងទៀតថា កាលពី៤ទៅ៥ថ្ងៃមុន នាងមានទំនាស់ជាមួយប្តីដោយសារតែប្តីផឹកស្រា តែជម្លោះនោះបានត្រូវរ៉ូវគ្នាវិញហើយមិនធ្ងន់ធ្ងរទេ ។ ជាទូទៅ ប្តីរបស់នាងតែងតែចេញពីផ្ទះទៅរត់ម៉ូតូនៅពេលយប់ ហើយព្រឹកឡើងត្រឡប់មកផ្ទះវិញ ។ ប្តីរបស់នាងកន្លងមកមិនដែលមានស្រីនោះទេ និងក៏មិនដែលបាត់ពីផ្ទះបែបនេះឡើយ ។
គេនិយាយថា ស្ត្រីគ្រប់រូបតែងបារម្ភពីប្តីបើបាត់ដំណឹងបែបនេះតែងតាមរកហើយ ។ ដូចស្ត្រីរូបនេះគ្រាន់តែបាត់ប្តី២យប់គ្មានដំណឹងក៏មកប្តឹងប៉ូលិសឱ្យជួយរក ដូចបទចម្រៀងរបស់អ្នកស្រីបែន រ៉ន ដែលច្រៀងថា «បាត់ប្តីខ្ញុំហើយ…»។ ទោះបីជាយ៉ាងណា គេពុំដឹងថាបុរសប្តីនោះបាត់ទៅទីណាឡើយ ហើយប្រសិនបើនរណាម្នាក់បានឃើញសូមជួយប្រាប់ផងថា ប្រពន្ធ និងកូនកំពុងទន្ទឹងរង់ចាំនៅឯផ្ទះ ៕
ចែករំលែកព័តមាននេះ