ខេត្តមណ្ឌលគិរី ៖ មណ្ឌលគិរីគឺជាខេត្តមួយដែលមានធាតុអាកាសត្រជាក់ជាងបណ្តាខេត្តនានាក្នុងប្រទេសកម្ពុជា គ្រប់រដូវកាល និងមានទេសភាពធម្មជាតិផ្លាស់ប្តូរទៅតាមរដូវផងដែរ ។ ខេត្តមណ្ឌលគិរីក៏សម្បូរទៅដោយរមណីយដ្ឋានធម្មជាតិ រមណីយដ្ឋានវប្បធម៌ ភូមិជនជាតិ រមណីយដ្ឋានកែច្នៃ សត្វព្រៃ និងព្រៃឈើ នៅតាមសងខាងផ្លូវជាតិ ដែលគេបានធ្វើពុះកាត់ភ្នំ ឬក្រឡឹងតាមចង្កេះភ្នំនោះ ពិតជាបានបម្រើដល់វិស័យទេសចរណ៍យ៉ាងសំខាន់ ដែលអាចជួយសម្រួលដល់ជីវភាពរស់នៅរបស់បងប្អូននៅក្នុងតំបន់នោះ ។
ភ្ញៀវទេសចរជាតិ និងអន្តរជាតិមកលេងខេត្តមណ្ឌលគិរី មានការកើនឡើងជារៀងរាល់ឆ្នាំ គឺក្រោយពេលដែលផ្លូវជាតិលេខ៧៦A បានស្ថាបនាហើយរួចរាល់មក ។ ព្រមពេលជាមួយនឹងចំនួនភ្ញៀវកើនឡើងនេះ ចំនួនបន្ទប់ស្នាក់នៅតាមសណ្ឋាគារ ផ្ទះសំណាក់ ក៏ត្រូវបានគេសាងសង់បន្ថែមពីមួយឆ្នាំទៅមួយឆ្នាំដែរ ។
ប្រធានមន្ទីរទេសចរណ៍ខេត្តមណ្ឌលគិរី លោក ងិន សុវិមាន មានប្រសាសន៍ថា ចាប់តាំងពីផ្លូវជាតិលេខ៧៦A ត្រូវបានស្ថាបនារួចមកដែលមានចម្ងាយត្រឹមតែជាង៤០០គីឡូម៉ែត្រប៉ុណ្ណោះពីរាជធានីភ្នំពេញ ចំនួនភ្ញៀវទេសចរជាតិ និងអន្តរជាតិបានមកលេងខេត្តមណ្ឌលគិរី មានការកើនឡើងគួរកត់សម្គាល់ជាងឆ្នាំ២០១១ រហូតទៅដល់១០,១២ភាគរយ ដែលឆ្នាំ២០១១ មានត្រឹមតែ៧.២០៩នាក់ ប៉ុន្តែនៅឆ្នាំ២០១២ នេះមាន៧.៩៣៩នាក់ ទាំងភ្ញៀវជាតិ និងអន្តរជាតិ ។ កត្តាដែលនាំមកនូវកំណើនភ្ញៀវទេសចរនេះ ដោយសារផ្លូវល្អងាយស្រួលក្នុងការធ្វើដំណើរជីវភាពរបស់ប្រជាពលរដ្ឋកាន់តែធូរធារ សេវាកម្មសណ្ឋាគារ ផ្ទះសំណាក់ ភោជនីយដ្ឋានមានអនាម័យល្អប្រសើរជាងពេលមុន ។
លោកបានឱ្យដឹងថា ចំពោះភ្ញៀវដែលបានមកដល់ខេត្តមណ្ឌលគិរី តែងបានទៅលេងទឹកធ្លាក់ប៊ូស្រា ទឹកជ្រោះដំណាក់ស្តេច ទឹកជ្រោះរមនា ទឹករលកប៉ូប្រះ ភ្នំក្រោល ភ្នំដោះក្រមុំ សមុទ្រឈើ ឬជិះដំរីដើរលេងតាមភូមិជនជាតិ និងធ្វើដំណើរគយគន់ទេសភាពធម្មជាតិ នៅតាមបណ្តោយសងខាងផ្លូវជាតិ ។ គយគន់មើលភ្នំ ដែលមានស្មៅដុះខៀវស្រងាត់ គឺជាទេសភាពល្អបំផុត ហើយភ្នំទាំងនោះវាបានផ្លាស់ប្តូរពណ៌ទៅតាមរដូវកាល ។
លោក ងិន សុវិមាន បញ្ជាក់ថា ចំនួនភ្ញៀវទេសចរជាតិ និងអន្តរជាតិនឹងមានការកើនឡើងថែមទៀត នៅពេលផ្លូវថ្មីពីមណ្ឌលគិរី ទៅខេត្តរតនគិរី ដែលឆ្លងកាត់ស្រុកកោះញែក និងស្រុកលំផាត់ ធ្វើរួចរាល់នៅពេលខាងមុខដ៏ខ្លី ៕
ចែករំលែកព័តមាននេះ