រដ្ឋមន្ត្រីការបរទេសបារាំងលោកALAIN JUPPE អះអាងកាលពីថ្ងៃទី២៥មេសាថា ប្រទេសបារាំងនិងសម្ព័ន្ធមិត្តគ្រោងប្រើកម្លាំងប្រសិនបើការធ្វើអាជ្ញាកណ្តាលរបស់អ.ស.ប ត្រូវបរាជ័យនៅស៊ីរី ។ជាង១០ថ្ងៃក្រោយការប្រកាសពីការចូលជាធរមាននៃបទឈប់បាញ់គ្នាអំពើហិង្សានៅបន្តក្នុងទីក្រុងជាច្រើនរបស់ស៊ីរី ដែលនៅទីនោះក្នុងការបះបោរប្រឆាំងរដ្ឋាភិបាលរយៈពេល១ឆ្នាំបើតាមអ.ស.បថាបណ្តាលឱ្យមនុស្សស្លាប់ឡើងដល់ជាង៩.០០០នាក់ហើយ ។
ថ្លែងទៅកាន់សារព័ត៌មានក្រោយជួបពិភាក្សានាទីក្រុងប៉ារីសជាមួយបណ្តាតំណាងរបស់ពួកប្រឆាំងស៊ីរី លោក ALAIN JUPPE និយាយថា អំពើហិង្សាពុំអាចឱ្យមានបន្តយូរគ្មានទីបញ្ចប់ឡើយ ។ យើងចង់ឱ្យពួកអ្នកសង្កេតការណ៍ដែលមានចំនួនគ្រប់គ្រាន់យ៉ាងតិច៣០០នាក់ អាចដាក់ពង្រាយក្នុងពេលដ៏ឆាប់ ។
ប្រមុខការទូតបារាំងគូសបញ្ជាក់ថា របាយការណ៍របស់បេសកជនពិសេសអ.ស.ប និងសម្ព័ន្ធអារ៉ាប់សម្រាប់ស៊ីរីលោកកូហ្វីអាណាន់ នៅមុខក្រុមប្រឹក្សាសន្តិសុខអ.ស.បនាថ្ងៃទី៥ឧសភា និងជាឱកាសបង្ហាញការពិត ។កាលពីថ្ងៃទី២៥ មេសា កងកម្លាំងរដ្ឋាភិបាលស៊ីរីបានបាញ់គ្រាប់រ៉ុក្កែតលើអគារមួយនៃទីក្រុងហាម៉ា ភាគកណ្តាលស៊ីរី បណ្តាលឱ្យមនុស្សស្លាប់យ៉ាងតិច១២នាក់ ហើយជាច្រើនសិបនាក់ទៀតត្រូវរបួស ។
របាយការណ៍មួយទៀតរៀបរាប់ពីមនុស្សស្លាប់១៥នាក់ និងរបួស៣០នាក់ ។ អ្នកសង្កេតការណ៍អ.ស.ប មួយក្រុមតូចបច្ចុប្បន្នស្ថិតនៅក្រុងហាម៉ាជាទីក្រុងបះបោរសំខាន់មួយក្នុងចំណោមទីក្រុងបះបោរប្រឆាំងរដ្ឋអំណាចរបស់ប្រធានាធិបតីស៊ីរីលោកបាចាអាល់អាសាដ៕
ចែករំលែកព័តមាននេះ