ខេត្តសៀមរាប ៖ ផ្លូវវាងប្រាសាទអង្គរជំហានទី២មានឈ្មោះ «មិត្ដភាពកម្ពុជា-កូរ៉េ» ចេញពីផ្លូវមុខអង្គរតភ្ជាប់វង់ធំក្នុងស្រុកអង្គរធំដែលមានប្រវែងជាង២០គីឡូម៉ែត្រ ត្រូវបានបើកការដ្ឋានសាងសង់អ៊ុតកៅស៊ូដោយគ្រោងចំណាយអស់ទឹកប្រាក់សរុបចំនួន១១,៥លានដុល្លារអាមេរិក ជាជំនួយរបស់សាធារណរដ្ឋកូរ៉េ តាមរយៈទីភ្នាក់ងារកិច្ចសហប្រតិបត្ដិការអន្ដរ ជាតិកូរ៉េ ។
ពិធីបើកការដ្ឋានសាងសង់ផ្លូវវាងអង្គរដ៏មានសារប្រយោជន៍នេះ បានធ្វើឡើងកាលពីព្រឹកថ្ងៃទី១៧ មីនា ឆ្នាំ២០១១ នៅក្នុងភូមិសាស្ដ្រភូមិគោកតាចាន់ សង្កាត់គោកចក ក្រុងសៀមរាប ក្រោមអធិបតីភាពលោកស៊ូ ភិរិន្ទ អភិបាលខេត្ដ និងលោក Jang Jin ho ឯកអគ្គរដ្ឋទូតនៃសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា ដោយមានការចូលរួមមន្ដ្រី កងកម្លាំង ប្រដាប់អាវុធ និងប្រជាពលរដ្ឋប្រមាណជាង៣ពាន់នាក់ ។
ថ្លែងនៅក្នុងពិធីបើកការដ្ឋានលោកស៊ូ ភិរិន្ទ បានមានប្រសាសន៍ថា ផ្លូវវាងអង្គរឈ្មោះមិត្ដភាពកម្ពុជា-កូរ៉េ» ជំហានទី២ដែលកំពុងបើកការដ្ឋានសាងសង់នេះជាជំនួយរបស់សាធារណរដ្ឋកូរ៉េតាមរយៈទីភ្នាក់ងារកិច្ចសហប្រតិបត្ដិការអន្ដរជាតិកូរ៉េ «កូយកា» ។ ផ្លូវនេះមានប្រវែង២០,៥គីឡូម៉ែត្រ ត្រូវសាងសង់ទៅជាផ្លូវអ៊ុតកៅស៊ូគ្រោងនឹងចំណាយរយៈពេល២ឆ្នាំ ដោយចាប់ផ្ដើមពីពេលនេះតទៅរហូតដល់ដំណាច់ខែតុលា ឆ្នាំ២០១២ ដែលត្រូវចំណាយជាទឹកប្រាក់សរុបប្រមាណ១១.៥លានដុល្លារអាមេរិក។
លោកស៊ូ ភិរិន្ទ ក៏បានសំដែងនូវអំណរគុណយ៉ាងជ្រាលជ្រៅចំពោះរដ្ឋាភិបាលនៃសាធារណរដ្ឋកូរ៉េ ដែលបានផ្ដល់នូវហិរញ្ញប្បទានដ៏ថ្លៃថ្លាសម្រាប់ការសាងសង់ផ្លូវ «មិត្ដភាពកម្ពុជា-កូរ៉េ» នេះ ឡើងសំរាប់បម្រើឱ្យការដឹកជញ្ជូនធុនធ្ងន់វាងតំបន់រមណីយដ្ឋានអង្គរដែលជាបេតិកភណ្ឌពិភពលោក និងបំរើដល់ផលប្រយោជន៍ប្រជាពលរដ្ឋនៅក្នុងតំបន់អង្គរ ។ ជាពិសេសបងប្អូនដែលរស់នៅក្នុងក្រុងសៀមរាបតាមបណ្ដោយផ្លូវនេះ ក្នុងការធ្វើដំណើរដឹកជញ្ជូនកសិផល និងផលិតផលផ្សេងៗបានយ៉ាងងាយស្រួល និងចំណាយតិច ដែលនេះជាការឆ្លើយតបទៅនឹងអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាគឺ «មានផ្លូវ មានក្ដីសង្ឃឹម» ។ រដ្ធាភិបាលនៃសាធារណរដ្ធកូរ៉េ កំពុងតែដើរតួនាំមុខគេក្នុងការផ្ដល់ជំនួយលើហេដ្ឋារចនាសម្ពន្ធ័ផ្លូវថ្នល់ ដែលប្រៀបបានជាសរសៃឈាមយ៉ាងសំខាន់តភ្ជាប់ពីប្រាសាទមួយទៅប្រាសាទមួយនៃឧទ្យានអង្គរ បេតិកភណ្ឌពិភពលោកដ៏ល្បាញល្បី។
លោកប៊ុន ណារិទ្ធ អគ្គនាយកអាជា្ញធរអប្សរាបានមានប្រសាសន៍រំលឹកថា សាធារណរដ្ឋកូរ៉េគឺជាប្រទេសនាំមុខគេក្នុងការផ្ដល់ជំនួយលើហេដ្ឋារចនាសម្ព័ន្ធផ្លូវថ្នល់ក្នុងឧទ្យានអង្គរដែលជាបេតិកភណ្ឌពិភពលោក ហើយការស្ថាបនាផ្លូវនេះជាជំហានទី២ហើយ ។ នៅចន្លោះពីឆ្នាំ២០០៦ដល់ឆ្នាំ២០០៨ សាធារណរដ្ឋកូរ៉េ បានផ្ដល់ជំនួយជាទឹកប្រាក់សរុបចំនួន៥លាន៩សែនដុល្លារអាមេរិក ស្ថាបនាផ្លូវក្រួសក្រហមរួចចាក់កៅស៊ូចំនួនពីរខ្សែ គឺខ្សែទី១ ផ្លូវវាងប្រាសាទអង្គរពីខាងលិចប្រវែង៤,៨គីឡូម៉ែត្រ ទទឹង៨ម៉ែត្រ ចាប់ពីផ្លូវជាតិលេខ៦ជាប់សាលាបឋមសិក្សាក្រួសមកភ្ជាប់នឹងផ្លូវកៅស៊ូខាងមុខប្រាសាទអង្គរវត្ដក្បែរអតីតទីបញ្ជាការយោធភូមិភាគ៤ ។ ខ្សែទី២ ផ្លូវវាងពីខាងកើតប្រវែង១០,៤គីឡូម៉ែត្រ ទទឹង៨ម៉ែត្រចាប់ពីផ្លូវជាតិលេខ៦ចំណុចផ្សារសា្វយធំមកភ្ជាប់នឹងផ្លូវបំបែកផ្សារព្រះដាក់ ហើយបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃ ទី៥ ឧសភា ឆ្នាំ២០០៩ កន្លងទៅក្រោមអធិបតីភាពដ៍ខ្ពងខ្ពស់របស់លោកបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ដ្រីនិងជាប្រធានអាជា្ញធរជាតិអប្សរា ។
លោកអគ្គនាយកបានបន្ដទៀតថា នៅចុងក្រោយនេះសាធារណដ្ឋេកូរ៉េបានផ្ដល់ជំនួយជាទឹកប្រាក់ចំនួន១១,៥លានដុល្លារអាមេរិកបន្ថែមទៀត ស្ថាបនាផ្លូវវាងអង្គរជំហានទី២ ដោយអ៊ុតកៅស៊ូប្រវែង២០,៥គីឡូម៉ែត្រតភ្ជាប់ផ្លូវអ៊ុតកៅស៊ូ ទាំង២ខ្សែខាងលើឱ្យក្លាយជាផ្លូវខ្សែក្រវាត់ជុំវិញតំបន់ប្រាសាទអង្គរ ដើម្បីចូលរួមចំណែកការពារ និងលើកតម្លៃតំបន់សៀមរាប-អង្គរឱ្យបានគង់វង្ស និងកាន់តែល្អប្រសើរឡើង។ ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជាលោក Jang Jin ho បានមានប្រសាសន៍ដោយសន្យាថា រដ្ឋាភិបាលកូរ៉េនឹងបន្ដសហការគ្នាដោយស្អិតរមួតជាមួយរាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ចកម្ពុជាក៏ដូចជាខេត្ដេសៀមរាប ។ លោកមានជំនឿជឿជាក់ថា ផ្លូវវាងជំហានទី២ ដែលបើកការដ្ឋានសាងសង់នៅពេលនេះ នឹងក្លាយជាមាគ៌ានៃក្តីសង្ឈឹមដែលឈានទៅដល់អនាគតដ៏ត្រចះត្រចង់នៃកិច្ចសហប្រតិបត្តិការរវាងសាធារណរដ្ឋកូរ៉េ និងកម្ពុជា៕
ចែករំលែកព័តមាននេះ