រាជធានីភ្នំពេញ ៖ មានក្រុមហ៊ុន១៤ក្រុមហ៊ុនបានចុះឈ្មោះជាសមាជិក និងជាអ្នកចូលរួមសហការ ដើម្បីបង្កើននូវភាពងាយស្រួលដល់ពាណិជ្ជករ បន្ទាប់ពីផ្សារជួញដូរមូលបត្រកម្ពុជា បានបើកដំណើរការកាលពីថ្ងៃទី១៨ មេសា កន្លងមក ហើយទទួលបាននូវការចាប់អារម្មណ៍យ៉ាងខ្លាំងពីសំណាក់វិនិយោគិនទាំងក្នុង និងក្រៅប្រទេស ធ្វើការទិញលក់នូវប័ណ្ណភាគហ៊ុនរបស់រដ្ឋាករទឹកស្វយ័តក្រុងភ្នំពេញ ដែលបានប្រកាសដាក់លក់នូវភាគហ៊ុនរបស់ខ្លួនប្រមាណជាង១៣លានហ៊ុន ។ សមាជិកទាំងនេះ ត្រូវបានចែកចេញជា៦ផ្នែកធំៗរួមមាន ៖
*ក្រុមហ៊ុនធានាទិញមូលបត្រ
១-ភ្នំពេញ ស៊ីឃ្យូរឹធី ភីអិលស៊ី ។
២-អូ អេស ខេ ឥណ្ឌូឆៃណា ស៊ីឃ្យូរឹធី លីមីធីត ។
៣-ខេមបូឌា-វៀតណាម ស៊ីឃ្យូរឹធី ភីអិលស៊ី ។
៤-កាណា ស៊ីឃ្យូរឹធី អិលធីឌី ។
៥-កម្ពុ ស៊ីឃ្យូរឹធី ភីអិលស៊ី ។
៦-តុង យ៉ាង ស៊ីឃ្យូរឹធី (ខេមបូឌា) ភីអិលស៊ី ។
៧-អេសប៊ីអាយ រ៉ូយ៉ាល់ ស៊ីឃ្យួរឹធី ។
*ក្រុមហ៊ុនពាណិជ្ជករមូលបត្រ
១-សាខមប៊ែង ស៊ីឃ្យូរឹធី (ខេមបូឌា) ភីអិលស៊ី ។
២-ហ្គោលដេន ហ្វ័រឈូន (ខេមបូឌា) ស៊ីឃ្យូរឹធី ភីអិលស៊ី ។
*ក្រុមហ៊ុនឈ្មួញជើងសាមូលបត្រ
១-សូណាត្រា ស៊ីឃ្យូរឹធី ភីអិលស៊ី ។
២-អេស៊ីលីដា ស៊ីឃ្យូរឹធី ភីអិលស៊ី ។
*ភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ
១-ធនាគារ អេស៊ីលីដា ភីអិលស៊ី ។
២-ធនាគារវិនិយោគ និងអភិវឌ្ឍន៍កម្ពុជា ភីអិលស៊ី ។
៣-ធនាគារកាណាឌីយ៉ា អ.ក ។
*ភ្នាក់ងារបញ្ជិកាមូលបត្រ
១-សាខមប៊ែង ស៊ីឃ្យូរឹធី (ខេមបូឌា) ភីអិលស៊ី ។
២-ធនាគារ អេស៊ីលីដា ភីអិលស៊ី ។
*ភ្នាក់ងារចុះបញ្ជីផ្ទេរមូលបត្រ
១-សាខមប៊ែង ស៊ីឃ្យូរឹធី (ខេមបូឌា) ភីអិលស៊ី ។
២-ធនាគារ អេស៊ីលីដា ភីអិលស៊ី ។
ទាក់ទិនទៅនឹងដំណើរការទិញលក់មូលបត្រនេះ មន្ត្រីប្រតិបត្តិផ្នែកទិន្នន័យទីផ្សារ និងសន្ទស្សន៍នៃនាយកដ្ឋានប្រតិបត្តិការទីផ្សារមូលបត្រ កញ្ញាគឹម សុផានីតា បានមានប្រសាសន៍ឱ្យដឹងនារសៀលថ្ងៃទី២៣ មេសា ២០១២ ថា ប្រជាជនគ្រប់រូបអាចទិញលក់មូលបត្របានដោយគ្រាន់តែជ្រើសរើសក្រុមហ៊ុនមូលបត្រណាមួយដែលជាសមាជិករបស់ផ្សារមូលបត្រកម្ពុជា ដើម្បីធ្វើជាអ្នកតំណាងរបស់ខ្លួនក្នុងការជួញដូរមូលបត្រ បន្ទាប់មកវិនិយោគិនត្រូវបើកគណនីជួញដូរមួយនៅក្រុមហ៊ុនមូលបត្រនោះ ដែលនឹងបន្តបើកឱ្យខ្លួននូវគណនីសាច់ប្រាក់មួយទៅភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ និងគណនីមូលបត្រនៅប្រតិបត្តិកររក្សាទុកមូលបត្ររបស់ផ្សារមូលបត្រកម្ពុជា ។
វិនិយោគិនម្នាក់អាចបើកគណនីជួញដូរតែមួយគត់នៅក្នុងក្រុមហ៊ុនមូលបត្រមួយ ចំណែកឯការទិញលក់វិញ វិនិយោគិនអាចបង្គាប់ឱ្យក្រុមហ៊ុនមូលបត្ររបស់ខ្លួនដាក់បញ្ជាមកកាន់ផ្សារមូលបត្រកម្ពុជា ដោយបញ្ជាក់ប្រាប់យ៉ាងហោចណាស់នូវព័ត៌មានសំខាន់ៗដូចជា ១-ឈ្មោះមូលបត្រ ២-បរិមាណ ៣-ថ្លៃ ៤-ប្រភេទនៃការបញ្ជាទិញ ឬបញ្ជាលក់ ។
វិនិយោគិនអាចបង្គាប់ទៅក្រុមហ៊ុនមូលបត្រឱ្យដាក់បញ្ជាដោយប្រើប្រាស់មធ្យោបាយទំនាក់ទំនងណាមួយដូចជា ១-ឯកសារជាលាយលក្ខណ៍អក្សរ ២-ពាក្យសម្តី ៣-សារអេឡិចត្រូនិច ៤-មធ្យោបាយអេឡិចត្រូនិចដទៃទៀត ។ គួរបញ្ជាក់ថា ផ្សារមូលបត្រកម្ពុជាជាកន្លែងធ្វើចរាចរលក់ដូរមូលបត្រពីបណ្តាសាខាដែលមានរាយបញ្ជីឈ្មោះដូចខាងលើ ប៉ុន្តែមិនមែនជាកន្លែងដែលទទួលការដាក់បញ្ជាទិញ-លក់ដូរមូលបត្ររបស់វិនិយោគិនឡើយ ៕
ចែករំលែកព័តមាននេះ