ខេត្តសៀមរាប ៖ លោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិបានថ្លែងឱ្យដឹងថា កិច្ចប្រជុំមន្ត្រីជាន់ខ្ពស់ការពារជាតិអាស៊ាន (ADSOM) ដើរតួនាទីយ៉ាងសំខាន់ក្នុងការរៀបចំកិច្ចប្រជុំថ្នាក់រដ្ឋមន្ត្រីការពារជាតិអាស៊ាន ADMM ។ តួនាទីរបស់ ADSOM គឺធ្វើសេចក្តីព្រាងសេចក្តីប្រកាសរួមពិចារណា និងពិភាក្សាឯកសារទស្សនាទាន និងរាយការណ៍បញ្ហាសន្តិសុខតំបន់ដែលកំពុងកើតមានផ្សងៗជូន ADMM ។
លោកនាយឧត្តមសេនីយ៍ នាង ផាត បានឱ្យដឹងបែបនេះក្នុងខណៈបើកកិច្ចប្រជុំមន្ត្រីជាន់ខ្ពស់ការពារជាតិអាស៊ានលើកទី៦ និងកិច្ចប្រជុំរដ្ឋមន្ត្រីការពារជាតិអាស៊ានបូកជាមួយប្រទេសជាដៃគូដែលបានចាប់ផ្តើមឡើងកាលពីព្រឹកថ្ងៃទី២៤ មេសា ២០១២ និងគ្រោងបញ្ចប់នៅថ្ងៃទី២៦ មេសា ២០១២ ស្ថិតនៅសាលប្រជុំសណ្ឋាគារអង្គរសិនជូរី នាក្រុងសៀមរាប ដោយមានរូបលោកអញ្ជើញចូលរួមធ្វើជាប្រធានកិច្ចប្រជុំ និងមានមន្ត្រីជាន់ខ្ពស់ការពារជាតិនៃបណ្តាប្រទេសអាស៊ានរួមជាមួយប្រទេសដៃគូចូលរួមផងដែរ ។
យោងតាមសេចក្តីជូនព័ត៌មានបានបញ្ជាក់ថា កិច្ចប្រជុំនេះនឹងធ្វើការពិភាក្សា និងផ្លាស់ប្តូរយោបល់លើបញ្ហាសន្តិសុខក្នុងតំបន់, ការពិភាក្សាសេចក្តីព្រាងគោលការណ៍របស់ ADMM, ពិភាក្សាសេចក្តីព្រាងសេចក្តីប្រកាស រួមនៃ ADMM ក្នុងការសម្រេចនូវសហគមន៍ អាស៊ានឆ្នាំ២០១៥ សម្រាប់សហគមន៏សន្តិសុខ និងបញ្ហាផ្សេងទៀត ។
គួរបញ្ជាក់ថា កិច្ចប្រជុំរដ្ឋមន្រ្តីការពារជាតិ អាស៊ាន (ADMM) ត្រូវបានបង្កើតឡើងកាល ពីឆ្នាំ២០០៦ ក្នុងគោលបំណង ដើម្បីរកយន្ត ការការពារសន្តិសុខក្នុងតំបន់អាស៊ីអាគ្នេយ៍ការប្រយុទ្ធប្រឆំាងអំពើភេរវកម្ម និងគ្រឿងញៀនជាដើម ។
លោកនាយកឧត្តមសេនីយ៍ នាង ផាត បានមានប្រសាសន៍ថា កិច្ចប្រជុំមន្ត្រីជាន់ខ្ពស់ការពារជាតិអាស៊ាន ADSOM ក៏មានតួនាទីចម្បងជាផ្លូវជាគន្លឹះជួយដល់ ADMM ក្នុងការជំរុញកិច្ចសហប្រតិបត្តិការជាក់ស្តែង នៅក្នុងអាស៊ានលើបញ្ហាយុទ្ធសាស្ត្រក៏ដូចជាបញ្ហាសន្តិសុខដែលប៉ះ ពាល់នៅក្នុងតំបន់ ។ ពេលនេះយើងនឹងធ្វើការពិចារណា ពិភាក្សាទៅលើឯកសារសំខាន់ពីរ ព្រមទាំងឯកសារទស្សនាទានស្នើឡើងដោយលេខាធិការដ្ឋានអាស៊ានដែលនឹងត្រូវបញ្ជូនទៅកិច្ចប្រជុំ ADMM ក្នុងខែឧសភា ខាងមុខនេះ ។ លើសពីនេះទៅទៀតយើងក៏នឹងពិភាក្សាទៅលើបញ្ហាសន្តិសុខសំខាន់ៗដែលកំពុងកើតមាននិងកំណត់នូវវិធីសាស្ត្ររួមគ្នាដើម្បីឆ្លើយតបប្រកបដោយប្រសិទ្ធភាពខ្ពស់ ៕
ចែករំលែកព័តមាននេះ