ខេត្តស្វាយរៀង ៖ ក្រុមកម្មករ កម្មការិនីចំនួន១៣នាក់ បានអំពាវនាវសូមឱ្យក្រសួងការងារបណ្តុះបណ្តាលវិជ្ជាជីវៈចុះធ្វើអន្តរាគមន៍ដោះស្រាយឱ្យក្រុមហ៊ុនដំឡើងកង់ Bestway តំបន់សេដ្ឋកិច្ច ពិសេសបារិតសងការខូចខាតម៉ូតូចំនួន១៣គ្រឿង ដែលត្រូវអគ្គីភ័យឆាបឆេះ កាលពីថ្ងៃទី១០ មីនា ហើយរហូតមកដល់ថ្ងៃទី១៤ មីនា នៅតែពុំមានដំណោះស្រាយសមស្របនៅឡើយ ហើយកម្មករ កម្មការិនីទាំង១៣នាក់ កំពុងប្រឈមនឹងការបញ្ឈប់ពីការងារទៀតផង បើពួកគេមិនព្រមទទួលសំណងតាមគោលការណ៍របស់ក្រុមហ៊ុនទេនោះ ។
ទាក់ទិនករណីខាងលើកញ្ញា ដួង វណ្ណា អាយុ២៤ឆ្នាំ តំណាងឱ្យកម្មករ កម្មការិនីទាំង១៣នាក់ បានប្រាប់កោះសន្តិភាពថា ពួកគេបានផ្ញើម៉ូតូនៅក្នុងរោងដាក់ម៉ូតូ កង់ និងជាកន្លែងស្នាក់នៅរបស់កម្មករ បានត្រូវអគ្គីភ័យឆាបឆេះដោយសារទុស្សេខ្សែភ្លើងឆេះម៉ូតូអស់២៦គ្រឿង និងកង់៣គ្រឿង ព្រមទាំងសំលៀកបំពាក់ទ្រព្យសម្បត្តិរបស់កម្មករមួយចំនួន តែក្រុមហ៊ុនបានសងឱ្យកម្មករតែម៉ូតូ១៣គ្រឿង និងកង់៣គ្រឿងប៉ុណ្ណោះ។ សម្រាប់កម្មករ កម្មការិនីដែលគ្មានជម្រើសខ្លាចបាត់បង់ការងារត្រូវបង្ខំចិត្តទទួលសំណងតិចតួចដែលក្រុមហ៊ុនសង ហើយម្យ៉ាងនៅរោងចក្រដំឡើងកង់របស់ក្រុមហ៊ុន Bestway បាវិតនេះ ពុំមានតំណាងសហជីពដើម្បីជួយសម្របសម្រួលដោះស្រាយពេលមានទំនាស់កើតឡើង ទើបមានការពិបាកក្នុងការតវ៉ា ហើយតំណាងមន្ទីរក្រសួងការងារដូចជាគ្មានឥទ្ធិពលអ្វីអាចជួយកម្មករបានឡើយ ។
ម៉ូតូដែលខូចខាតត្រូវក្រុមជាងឯកជនវាយតម្លៃម៉ូតូមួយគ្រឿងត្រូវជួសជុលចាប់ពី៣៥០ដុល្លារទៅ៤០០ដុល្លារ រីឯក្រុមហ៊ុនសងត្រឹមតែ១០០ដុល្លារទៅ១៨០ដុល្លារ ដូច្នេះពួកគេមិនអាចទទួលយកបានទេ ហើយក្រុមហ៊ុនបានគំរាមថា បើមិនព្រមក្រុមហ៊ុនមិនអាចសងតាមសំណូមពរបានទេ ហើយបើនៅតែរឹងរុះក្រុមហ៊ុននឹងបញ្ឈប់ពីការងារ។ ទាក់ទិនករណីខាងលើលោកអ៊ូ សាខឿន តំណាងក្រសួងការងារបណ្តុះបណ្តាលវិជ្ជាជីវៈដែលប្រចាំការនៅតំបន់សេដ្ឋកិច្ចពិសេស បាវិតបានឱ្យដឹងតាមទូរស័ព្ទនារសៀលថ្ងៃទី១៤ មីនា ថា ក្រសួងបានចូលសម្របសម្រួលដោះស្រាយហើយ តែមិនបានព្រមព្រៀងគ្នាទេ ដោយកម្មករទារសំណងខ្ពស់ក្រុមហ៊ុនមិនព្រម ហើយក្រុមគណៈកម្មការក្រសួងមិនអាចបង្ខិតបង្ខំភាគីណាបានទេ ដោយពុំមានច្បាប់ណាអាចកំណត់ថា ត្រូវតែសងកម្រិតណានោះ ដូច្នេះទុកដោះស្រាយបន្ត រីឯកម្មករគួរណាស់ចូលធ្វើការ បើមិនចូលគេអាចបញ្ឈប់ពីការងារ ក្រសួងមិនអាចលូកដៃបានទេ ៕
ចែករំលែកព័តមាននេះ