ខេត្តបន្ទាយមានជ័យ ៖ សមត្ថកិច្ចនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្ត បានបញ្ជូនជនសង្ស័យចំនួន២ក្រុមមានគ្នា៥នាក់ដែលប្រើហិ.ង្សាដោយចេតនា បណ្តាលឱ្យរបួសទាំងសងខាង ទៅសាលាដំបូងខេត្ត នាព្រឹកថ្ងៃទី១៩ មេសា ដើម្បីចាត់ការតាមនីតិវិធីច្បាប់ ។
ខេត្តបន្ទាយមានជ័យ ៖ សមត្ថកិច្ចនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្ត បានបញ្ជូនជនសង្ស័យចំនួន២ក្រុមមានគ្នា៥នាក់ដែលប្រើហិង្សាដោយចេតនា បណ្តាលឱ្យរបួសទាំងសងខាង ទៅសាលាដំបូងខេត្ត នាព្រឹកថ្ងៃទី១៩ មេសា ដើម្បីចាត់ការតាមនីតិវិធីច្បាប់ ។
លោកវរសេនីយ៍ត្រី រ៉ែម វីរៈ អធិការនគរបាលក្រុងសិរីសោភ័ណ បានឱ្យដឹងថា ជនទាំង២ក្រុមនេះ ម្ខាងមានគ្នា៣នាក់ តែចាប់បាន២នាក់ គឺឈ្មោះ ភ័ណ ភឿត ភេទប្រុស អាយុ៣០ឆ្នាំ របួសហើមជាំលើស្មាផ្នែកខាង ក្រោយ និងឈ្មោះ ណៃ សុភ័ណ ភេទប្រុស អាយុ២៦ឆ្នាំ របួសដាច់កូនដៃឆ្វេង ឯម្នាក់ទៀតឈ្មោះ អិុន ភេទប្រុស (រត់គេចខ្លួន) ពួកគេទាំង៣នាក់ រស់នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ។ ឯក្រុមម្ខាងទៀតមានគ្នា១០នាក់តែចាប់បាន៤នាក់ គឺ ១- ឈ្មោះ ពេជ្រ ជុន ហៅភេ ភេទប្រុស អាយុ២៣ឆ្នាំ ហើមកែងដៃស្តាំ ២- ឈ្មោះ ជោត ចំរើន ភេទប្រុស អាយុ២០ឆ្នាំ រងរបួសថ្ងាសខាងឆ្វេង ៣- ឈ្មោះ សាញ់ សែត ហៅ កែត ភេទប្រុស អាយុ២៣ឆ្នាំ ។ ៣នាក់នេះរួមជាមួយ២នាក់ខាងលើ ត្រូវបានបញ្ជូនទៅសាលាដំបូងខេត្ត និង៤- ឈ្មោះ សិទ្ធិ សំអាត ហៅ ប៊ឹប របួសថ្ពាស់ខាងខាងឆ្វេង និងបាក់ថ្គាមខាងឆ្វេង បច្ចុប្បន្នកំពុងព្យាបាលនៅក្នុងមន្ទីរពេទ្យ ចំណែកបក្សពួកចំនួន៦នាក់ទៀតរត់គេចខ្លួន ។
ជនទាំងនេះមានទីលំនៅក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ។ លោកអធិការ បានបន្តថា នៅវេលាម៉ោង៤និង៣០នាទីរសៀលថ្ងៃទី ១៧ មេសា ឆ្នាំ២០១២ នៅលើផ្លូវជាតិលេខ៥៩A ស្ថិតក្នុងភូមិកងវ៉ា សង្កាត់កំពង់ស្វាយ ក្រុមខាងភូមិកងវ៉ា មានឈ្មោះ ភ័ណ ភឿត និងឈ្មោះ អិុន រួមទាំងក្មេងតូចៗផង បាននាំគ្នាចាក់ធុងបាស់រាំលេង និងប៉ាតម្សៅ ។ ពេលនោះឈ្មោះ សិទ្ធិ សំអាត ហៅប៊ឹប និងឈ្មោះ ពេជ្រ ជុន ហៅភេ នៅភូមិពង្រជិះម៉ូតូ១គ្រឿង ទៅដល់ចំណុចខាងលើ ក៏ត្រូវក្រុមខាងភូមិកងវ៉ាកាក់ម៉ូតូឱ្យឈប់រួចវាយក្បាលឈ្មោះ សិទ្ធិ សំអាត ហៅប៊ឹប ១ដៃ ព្រោះសំអាងថាស្គាល់គ្នា ស្រាប់តែឈ្មោះ សិទ្ធិ សំអាត ហៅប៊ឹប ប្រកាន់ក៏កើតរឿងឈ្លោះប្រកែកគ្នា ។ បន្ទាប់មកឈ្មោះសិទ្ធិ សំអាត ហៅប៊ឹប បានជិះម៉ូតូត្រឡប់ក្រោយហៅគ្នីគ្នាចំនួន១០នាក់ ជិះម៉ូតូ៥គ្រឿង មកវាយភាគីខាងចាក់ធុងបាស់ ពេលនោះក៏កើតជាការកាប់ចាក់គ្នា បណ្តាលឱ្យរងរបួសទាំងសងខាង ។ ក្រោយមកសមត្ថកិច្ចនគរបាលបានចុះដល់កន្លែងកើតហេតុ រួចឃាត់ខ្លួននិងនាំពួកគេយកទៅ ព្យាបាលរបួសរួមទាំងប្រមូលបានវត្ថុតាងមួយចំនួនដូចជា កាំបិត ដំបង និងឈើច្រត់ ដែលជាអាវុធរបស់ពួកគូទំនាស់ប្រយុទ្ធគ្នា ។
លោកវរសេនីយ៍ទោ ជូ ផារិន នាយការិយាល័យនគរបាលព្រហ្មទណ្ឌកម្រិតស្រាល បានឱ្យដឹងថា ជនទំនើងទាំង២ក្រុមមានចំនួន៥នាក់ ត្រូវបានកម្លាំងជំនាញរបស់លោករៀបចំសំណុំរឿងបញ្ជូនទៅសាលាដំបូងខេត្ត ចាត់ការតាមច្បាប់នាព្រឹកថ្ងៃទី១៩ មេសា ឆ្នាំ២០១២ ៕
ចែករំលែកព័តមាននេះ