ប្រធានក្រុមកីឡាអូឡាំពិកអូស្ត្រាលីបាននិយាយកាលពីថ្ងៃទី១៨ មេសាថា ខ្លួនមានជំនឿចិត្តថា អូស្ត្រាលីក្នុងការប្រកួតអូឡាំពិកក្រុងឡុងឆ្នាំនេះនឹងបញ្ចប់ក្នុងចំណាត់ថ្នាក់កំពូលចន្លោះពីលេខ១ដល់លេខ៥បើទោះណាទទួលការគំរាមកំហែងពីក្រុមម្ចាស់ផ្ទះ ជប៉ុន អាល្លឺម៉ង់និងក្រុមបារាំងក៏ដោយចុះ។ ខណៈនៅសល់ពេល១០០ថ្ងៃទៀត ការប្រកួតនឹងចូលមកដល់ អូស្ត្រាលីដឹងថា ខ្លួននឹងប៉ះជាមួយគូប្រជែងដ៏ខ្លាំងៗក្នុងពិភពលោក។ ក្នុងការចូលរួមលើកនេះ ក្រុមនេះនឹងបញ្ជូនអត្តពលិកប្រមាណ៤រយនាក់។
ប្រធានក្រុម លោក Nick Greenបាននិយាយថា បើទោះជាជួបក្រុមខ្លាំង តែខ្លួននឹងមិនចុះញ៉មមុនការប្រយុទ្ធឡើយ។ លោកបន្តថា៖«យើងដឹង ថាយើងនឹងត្រូវជួបការប្រកួតប្រជែងមួយយ៉ាងលំបាកដើម្បីដណ្តើមយកចំណាត់ថ្នាក់កំពូលទាំង៥ជាមួយប្រទេសម្ចាស់ផ្ទះអង់គ្លេស ជើងខ្លាំងប្រចាំទ្វីបអឺរ៉ុប អាល្លឺម៉ង់និងបារាំង ព្រមទាំងក្រុមខ្លាំងបច្ចុប្បន្នរបស់អាស៊ីគឺជប៉ុន ប៉ុន្តែក្នុងនាមជាជនជាតិអូស្ត្រាលី យើងមិនដួលមុនរត់ឡើយ»។ កាលពីប្រកួតអូឡាំពិកក្រុងប៉េកាំងឆ្នាំ២០០៨ អូស្ត្រាលីដណ្តើមបានមេដាយមាស១៤គ្រឿង ។ សរុបមេដាយទាំងអស់គឺ៤៦គ្រឿងតាមពីក្រោយចិន អាមេរិក រុស្ស៊ីនិងអង់គ្លេស។
ដោយឡែកក្នុងព្រឹត្តិការណ៍អូឡាំពិកលើកនេះ អូស្ត្រាលីរំពឹងខ្លាំងលើវិញ្ញាសាហែលទឹក។ ការប្រកួតក្នុងពេលកន្លងមក អូស្ត្រាលីខ្លាំងខាងវិញ្ញាសានេះ។ ប្រធានគ្រូបង្វឹកលោក Leigh Nugentរំពឹងថា ក្រុមហែលទឹករបស់ខ្លួនដណ្តើមបានមេដាយយ៉ាងតិច១២គ្រឿង។ ទោះជាយ៉ាងនេះក្តី កាលពីប្រកួតជ្រើស រើសជើងឯកពិភពលោកកន្លះខែមុននៅក្រុង Melbourne អូស្ត្រាលីដណ្តើមបានមេដាយតែ៣គ្រឿងប៉ុណ្ណោះ ខណៈអង់គ្លេសបានដល់ទៅ៥គ្រឿង។
លោក Greenបានថ្លែងថា៖«ទោះជាយ៉ាងណាក្តី យើងអាចទទួលបានមេដាយក្នុងវិញ្ញាសាកីឡាផ្សេងទៀត។ ចំណាត់ថ្នាក់កំពូលទាំង៥។ យើងមិនចាំបាច់កែតម្រូវឡើងវិញចំពោះរឿងនោះទេ។ ខ្ញុំគិតថា ចំណាត់ថ្នាក់លេខ៥ គឺពិតជាស័ក្តិសមនិងជាចំណាត់ថ្នាក់គួរឱ្យគោរពសម្រាប់ក្រុមអូស្ត្រាលី »។ព្រឹត្តិការណ៍ប្រកួតកីឡាអូឡាំពិករដូវក្តៅទីក្រុងឡុង ឆ្នាំ២០១២នឹងចាប់ផ្តើមនៅថ្ងៃទី២៧ខែកក្កដាខាងមុខនេះ ៕
ចែករំលែកព័តមាននេះ