ខេត្តរតនគិរី ៖ រដូវបុណ្យចូលឆ្នាំ ខ្មែររយៈពេលបីថ្ងៃ នេះ តាមរមណីយដ្ឋាននានាក្នុងខេត្តរតនគិរី មានភ្ញៀវជាតិ និងអន្តរជាតិចូលរួមដើរលេងកម្សាន្តច្រើនកុះករ ហើយប្រកបដោយសុវត្ថិភាព និងសប្បាយរីករាយក្រៃលែងគ្រប់ៗគ្នា ទាំងការធ្វើដំណើរ ចរាចរតាមដងផ្លូវពុំបង្កឱ្យមានបញ្ហាគ្រោះថ្នាក់កើតឡើងជាយថាហេតុនោះទេ ។
ជារៀងរាល់ពេលដែលមានពិធីបុណ្យប្រពៃណីជាតិ និងដំណើរកម្សាន្តរបស់ភ្ញៀវជាតិ និងអន្តរជាតិតាមរមណីយដ្ឋាននានាតែងតែបង្កឱ្យមានគ្រោះថ្នាក់រហូតដល់បាត់បង់ជីវិតមិនដែលខាននោះទេ កត្តាទាំងនេះគឺកើតឡើងដោយសារតែខ្វះការប្រុងប្រយ័ត្នដូចជា ខ្លះគ្រោះថ្នាក់ចរាចរ ខ្លះលង់ទឹកស្លាប់ ឯខ្លះទៀតកើតឡើងពីការផឹកស៊ីឈ្លោះទាស់សម្តី រហូតឈានដល់កាប់ចាក់សម្លាប់គ្នាក៏មាន ប៉ុន្តែក្នុងឆ្នាំនេះការបង្កឱ្យមានគ្រោះថ្នាក់លើបញ្ហាផ្សេងៗនោះពុំមានកើតឡើងនោះទេ ចំណែកឯគ្រោះថ្នាក់ចរាចរណ៍មានការថយចុះ។
តាមរបាយការណ៍ផ្សេងៗបង្ហាញថា ភ្ញៀវទេសចរក្នុងរដូវបុណ្យចូលឆ្នាំនេះមានចំនួន៥៤.៤៨១នាក់ ធ្វើដំណើរស្រូបយកខ្យល់អាកាសនៅតំបន់កម្សាន្តនានា ។ ចំណែកការិយាល័យប៉ូលិសចរាចរផ្លូវគោកបានបញ្ជាក់ថា រយៈពេលបីថ្ងៃបុណ្យចូលឆ្នាំខ្មែរប្រពៃណីជាតិនៅក្នុងខេត្តរតនគិរី ទាំងមូលមានគ្រោះថ្នាក់ចរាចរណ៍តែ៤លើកប៉ុណ្ណោះបង្កឡើងដោយម៉ូតូបុកម៉ូតូ ពុំមានករណីគ្រោះថ្នាក់ដោយរថយន្តនោះទេ ៕
ចែករំលែកព័តមាននេះ