រាជធានីភ្នំពេញ ៖ ពលការិនីម្នាក់បានដេកស្លាប់ក្នុងបន្ទប់របស់ក្រុមហ៊ុននាំពលករចេញទៅក្រៅប្រទេសមួយ ដែលមានរឿងច្របូកច្របល់បង្កឱ្យមានការភ្ញាក់ផ្អើល និងរិះគន់យ៉ាងខ្លាំងពីសំណាក់អ្នកជិតខាងដែលដឹងរឿងនេះ កាលពី វេលាម៉ោង២រំលងអធ្រាត្រឈានចូលថ្ងៃទី៦ មីនា ២០១១…រហូតមកដល់ព្រឹកព្រលឹមថ្ងៃ ដដែល គេនៅមិនទាន់ដឹងមូលហេតុពិតប្រាកដនៃការស្លាប់នៅឡើយទេ ដោយសារតែរង់ចាំប៉ូលិសចក្ខុចុះពិនិត្យសពឱ្យបានត្រឹមត្រូវសិន ។
ក្រុមហ៊ុនដែលមានពលការិនីដេកស្លាប់នេះឈ្មោះធី & ភី Co.,Ltd (ក្រុមហ៊ុនជួយរកការងារជូនពលករ-ពលការិនីខ្មែរនៅក្រៅប្រទេស) អគារលេខ៣៤ ផ្លូវលេខ២៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ ពលការិនីដែលដេកស្លាប់នេះឈ្មោះស៊ឹង ស៊ីណា អាយុ៣៥ឆ្នាំ មានស្រុកកំណើតនៅខេត្តតាកែវ…មុនពេលឈានដល់ស្លាប់ គឺនៅវេលាម៉ោង១រំលងអធ្រាត្រឈានចូលថ្ងៃទី៦ មីនា ២០១១ ស្ត្រីពលការិនីបានស្រែកថ្ងូរត្អូញត្អែរថា ចុកទ្រូងខ្លាំងណាស់! សូមជួយផង…ប៉ុន្តែគ្មានអ្នកណាយកចិត្តទុកដាក់សោះ ជាពិសេសខាងក្រុមហ៊ុននេះតែម្តងធ្វើព្រងើយកន្តើយ រហូតដល់ម៉ោង២រំលងអធ្រាត្រថ្ងៃដដែល ស្ត្រីពលការិនីម្នាក់នេះក៏ដាច់ខ្យល់ស្លាប់តែម្តង ។ ពេលភ្ញាក់ផ្អើលពលការិនីដូចគ្នាបានរិះគន់ថា ពេលស្ត្រីរូបនេះ (ស៊ឹង ស៊ីណា) ស្រែកថ្ងូរថា ឈឺទ្រូង…ប្រសិនបើខាងក្រុមហ៊ុនចាត់បញ្ជូនទៅមន្ទីរពេទ្យឱ្យបានលឿនបន្តិច នាងគឺមិនស្លាប់ទេ…នេះមកពីមិនមានអ្នកយកចិត្តទុកដាក់ ។
តាមប្រភពព័ត៌មានឱ្យដឹងថា បន្ទាប់ពីពលការិនីស្លាប់ហើយ ទើបគេឃើញខាងបុគ្គលិកក្រុមហ៊ុនធ្វើការដឹកចេញទៅកាន់មន្ទីរពេទ្យ ប៉ុន្តែយ៉ាងណា នាងស្លាប់បាត់ទៅហើយ រួចហើយក៏ដឹកចូលក្រុមហ៊ុនវិញ ។ ករណីឡិបឡប់បែបនេះ ប៉ូលិសមូលដ្ឋានបានឃាត់ខ្លួនបុគ្គលិកក្រុមហ៊ុនធី & ភី នេះ២នាក់គឺ ម្នាក់ជាអ្នកបើកបរ និងម្នាក់ទៀតជាអ្នកមើលការខុសត្រូវលើពលករ…នៅវេលាព្រឹកម៉ោង៨ថ្ងៃដដែល គេឃើញប៉ូលិសចក្ខុបានទៅដល់កន្លែងកើតហេតុ និងកំពុងពិនិត្យសពពលការិនីនៅឡើយ ។
សូមបញ្ជាក់ថា មុននេះ៤-៥ថ្ងៃក្រុមហ៊ុនធី& ភីនេះ ក៏មានពលការិនីម្នាក់បានសម្រេចលោតពីលើអគារជាន់ទី២ ចុះមកក្រោមបណ្តាលឱ្យបាក់ជើងទាំងសងខាងផងដែរ បន្ទាប់ពីនាងនឹកកូនខ្លាំងពេក ហើយមិនត្រូវបានខាងក្រុមហ៊ុនអនុញ្ញាតឱ្យចេញទៅក្រៅ…ការស៊ើបអង្កេតមិនទាន់បញ្ចប់ផង ឥឡូវចូលដល់ករណីស្លាប់ពលការិនីម្នាក់ទៀតនេះពិតជារឿងជាន់រឿងមែន៕
ចែករំលែកព័តមាននេះ