រាជធានីភ្នំពេញ ៖ នៅព្រឹកថ្ងៃទី១០ មេសា នេះសាលាដំបូងរាជធានីភំ្នពេញ បានសម្រេចឃុំខ្លួនដាក់ពន្ធនាគារបណ្តោះអាសន្ន លើជនសង្ស័យ៥នាក់ដែលបានលួចព្រះបដិមាសំរឹទិ្ធក្នុងវត្តសំបួរមាស ដោយ៣នាក់ចោទប្រកាន់ពីបទលួច និង២នាក់ពីបទសមគំនិត ។
ជនជាប់ចោទខាងលើ ១-ឈ្មោះចក់ វិចិត្រ ភេទប្រុស អាយុ២៤ឆ្នាំ នៅភូមិឫស្សីស្រស់ សង្កាត់និរោធ ខណ្ឌមានជ័យ ២-ឈ្មោះឆែ សុភាព ហៅជុក ភេទប្រុស អាយុ១៩ឆ្នាំ នៅភូមិខុប ឃុំបឹងខុប ស្រុកស្អាង ខេត្តកណ្តាល និង៣-ឈ្មោះស្រ៊ុន ចន្ថា ភេទប្រុស អាយុ៣១ឆ្នាំ នៅភូមិដើមស្លែង សង្កាត់ច្បារអំពៅ ខណ្ឌមានជ័យ។ ចំណែក២នាក់ ១-ឈ្មោះម៉ៅ ចក់ ភេទប្រុស អាយុ៥៩ឆ្នាំ នៅភូមិឫស្សីស្រស់ សង្កាត់និរោធ ខណ្ឌមានជ័យ និង២-ឈ្មោះហ៊ុយ លឹមអន ភេទប្រុស អាយុ៤៧ឆ្នាំ នៅភូមិបុរីកីឡា សង្កាត់វាលវង់ ខណ្ឌ៧មករា រាជធានីភ្នំពេញ ពីបទសមគំនិត ក្នុងអំពើទទួលផលចោរកម្ម។ សមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់ក្រសួងមហាផ្ទៃបានបង្ហាញមុខជនសង្ស័យទាំង៥នាក់ នេះ កាលពីរសៀលថ្ងៃទី៦ មេសា ។ ក្រុមនេះបានលួចបដិមាសំរឹទ្ធិចេញពីវត្តសំបួរមាស បម្រុងយកទៅលក់តែរកទីផ្សារមិនទាន់ឃើញក៏ត្រូវអស់លក្ខណ៍។ ការបង្ហាញមុខជាសាធារណៈត្រូវបានលោកវរសេនីយ៍ទោ ឈាង មុន្នី ប្រធានការិយាល័យនគរបាលព្រហ្មទណ្ឌកម្រិតធ្ងន់ឱ្យដឹងថា ក្រសួងមហាផ្ទៃ និងនគរបាលការិយាល័យកម្រិតធ្ងន់នៃស្នងការដ្ឋាននគរបាលរាជធានីភ្នំពេញ បានស្រាវជ្រាវរកឃើញព្រះបដិមាសំរឹទិ្ធទម្ងន់៤០គីឡូក្រាម របស់វត្តសំបួរមាស ដែលចោរលួច និងឈានទៅឃាត់ខ្លួនជនសង្ស័យជាបន្តបន្ទាប់ចំនួន៥នាក់ កាលពីព្រឹកថ្ងៃទី៦ មេសា។
សូមរំលឹកដែរថា កាលពីថ្ងៃទី១ មេសា វេលាម៉ោង១០និង៣០នាទីយប់នៅវត្តសំបួរមាស ស្ថិតក្នុងក្រុមទី១៧ ភូមិម័ល សង្កាត់ដង្កោ ខណ្ឌដង្កោ មានក្រុមចោរលួចកាត់សោសាលាឆាន់យកព្រះបដិមាមួយព្រះអង្គទម្ងន់៤០គីឡូក្រាម កម្ពស់០,៧៥សង្ទីម៉ែត្រ ព្រះភ្នែន០,៤៩សង្ទីម៉ែត្រទៅបាត់ពីវត្ត៕
ចែករំលែកព័តមាននេះ