រាជធានីភ្នំពេញ ៖ នៅរសៀលថ្ងៃទី១០ មេសា ២០១២នេះ សាលាឧទ្ធរណ៍នឹងបើកសវនាការជំនុំជម្រះលើសំណុំរឿងលោកហេង ឈាង ដែលប្តឹងចោទលោកប្រាក់ សុផាត ប្រធានគណនេយ្យ ទើបឡើងថ្មីក្រុមហ៊ុនអានកូ របស់លោកឧកញ៉ា កុក អាន ពីបទបូកបញ្ជីមិនច្បាស់លាស់ ពោលគឺបូកសរុបតែបញ្ជីចំណាយ ឯបញ្ជីចំណូលមិនបូកបញ្ចូលក្នុងគណនីបញ្ជូនទៅស្ថាប័នសវនកម្មនោះទេ ដូច្នេះហើយទើបធ្វើឱ្យបាត់ប្រាក់រហូតដល់៥៨លានដុល្លារ និងធ្វើឱ្យទោសកំហុសធ្លាក់មកលើលោកហេង ឈាង អតីតប្រធានគណនេយ្យក្រុមហ៊ុនអានកូជាប់ឃុំនៅពន្ធនាគារ ។
តាមប្រភពព័ត៌មានបានឱ្យដឹងថា លោកប្រាក់ សុផាត ប្រធានគណនេយ្យក្រុមហ៊ុន អានកូ ទើបឡើងថ្មី បានបូកបញ្ជីប្រាក់មិនច្បាស់លាស់ គឺបូកតែបញ្ជីចំណាយបញ្ជូនទៅលោកកាក់ កី ប្រធានស្ថាប័នសវនកម្ម ហើយលោកកាក់ កី ទៀតសោត ពិនិត្យបញ្ជីមិនច្បាស់លាស់ គឺយកបញ្ជីតែខាងចំណាយអះអាងថា បាត់ប្រាក់៥៨លានដុល្លារ ឯបញ្ជីចំណូលមិនយកមកទូទាត់ស៊ីសងគ្នានោះទេ ដូច្នេះហើយទើបវាបាត់ប្រាក់៥៨លានដុល្លារបែបនេះ ។
តាមប្រភពព័ត៌មានបានឱ្យដឹងទៀតថា លោកកាក់ កី ប្រធានស្ថាប័នសវនកម្ម ក៏ត្រូវលោកហេង ឈាង ប្តឹងពីបទធ្វើបញ្ជីមិនច្បាស់លាស់ដែរ បង្កឱ្យមនុស្សជាប់គុកយ៉ាងអយុត្តិធម៌ ។ ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ