លោកសាស្ត្រាចារ្យ ង៉ាន ច័ន្ទថា នាយករងនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ និងជានាយកកម្មវិធីជាតិប្រយុទ្ធជំងឺគ្រុនឈាមបានប្រាប់កោះសន្តិភាពឱ្យដឹងថា ៖ សព្វថ្ងៃនេះ ជំងឺគ្រុនឈាមមិនទាន់មានវ៉ាក់សាំងការពារនៅឡើយទេ ហើយក៏ពុំទាន់មានថ្នាំព្យាបាលត្រឹមត្រូវនោះដែរ គឺព្យាបាលទៅតាមរោគសញ្ញាដែលគ្រូពេទ្យបានទទួលការបណ្តុះបណ្តាលយ៉ាងត្រឹមត្រូវ និងជារៀងរាល់ឆ្នាំ ទៅតាមកម្មវិធីជាតិ ដើម្បីកាត់បន្ថយការស្លាប់ដោយសារជំងឺគ្រុនឈាមនេះ ។
សព្វថ្ងៃនេះ ជាពិសេសគឺនៅដើមឆ្នាំ២០១២ គត់មកដល់ថ្ងៃទី២០ មីនា ជងរងគ្រោះដោយសារ ជំងឺគ្រុនឈាមសរុប៨១៤នាក់ហើយ ក្នុងនោះមានអ្នកស្លាប់ចំនួន៣នាក់ ។ ចំនួននេះបើប្រៀបធៀបនឹងឆ្នាំ២០១១ ដែលអ្នកជំងឺមានតែ២៤៨នាក់ ស្លាប់តែ១នាក់ប៉ណ្ណោះ ដូច្នេះឃើញថា អ្នកកើតនិងអ្នកស្លាប់ដោយសារជំងឺគ្រុនឈាមមានការកើនឡើងប្រហែល២០០ភាគរយទៅ៣០០ភាគរយ ហើយចំនួននេះ អាចនឹងមានការកើនឡើងទៀត នៅពេលរដូវភ្លៀងមកដល់ ចាប់ពីខែឧសភា ដល់ខែតុលានេះ ។ ដូចនេះប្រជា ពលរដ្ឋត្រូវតែមានការប្រុងប្រយ័ត្នទាំង អស់គ្នា ហើយធ្វើអានាម័យជាប្រចាំ ដើម្បីកុំឱ្យផ្ទះរបស់លោកអ្នកក្លាយជាជម្រកមូសខ្លាឱ្យ
សោះ ។
សម្រាប់ក្រសួងសុខាភិបាលឆ្នាំនេះ គឺជាឆ្នាំមួយដែលក្រសួងគិតថា អាចមានបញ្ហាធ្ងន់ធ្ងរ ប្រឈមនឹងហានិភ័យខ្ពស់ ។ ដូចនេះក្រសួងសុខាភិបាលបានត្រៀមនូវយុទ្ធសាស្រ្តជាច្រើន ជាពិសេសគឺកម្មវិធីជាតិប្រយុទ្ធនឹងជំងឺគ្រុនឈាមដែលក្រសួងបានពង្រឹងនូវប្រព័ន្ធនានា នៅតាមគ្រប់ខេត្ត-ក្រុង ហើយជាពិសេសនៅតាមមន្ទីរពេទ្យបង្អែក ដោយចាត់វិធានការការពារតាមសហគមន៍ ក្នុងន័យកែប្រែឥរិយាបថរបស់ប្រជាពលរដ្ឋដោយផ្តល់ចំណេះដឹងផ្សេងៗទាក់ទងទៅនឹងវិធីទប់ស្កាត់ និងអនុវត្តទៅតាមការជាក់ស្តែង តែម្តង ។ ក្រៅពីនេះយើងបានផ្តល់ចំណេះដឹងតាមរយៈកញ្ចាក់ទូរទស្សន៍ កាសែតរួមទាំងវិទ្យុមួយចំនួនផងដែរ ។ បញ្ហាមួយទៀតគឺក្រសួងបានរៀបចំដាក់ថ្នាំ អាបែត នៅតាមតំបន់សំខាន់នានានៃបណ្តាខេត្តក្រុងទាំង២៤ ដើម្បីកាត់បន្ថយការចម្លងជំងឺគ្រុនឈាម ដែលប្រើប្រាស់ថ្នាំអាបែត ចំនួន១០៥តោនសម្រាប់ឆ្នាំនេះ នៅជុំទី១ ហើយចំនួន១០០តោនទៀតនៅជុំទី២ ដើម្បីការពារជំងឺគ្រុនឈាម ។ បញ្ហាមួយទៀតនោះ គឺក្រសួងបានត្រៀមឱសថ និងបរិក្ខាមួយចំនួននៅតាមមន្ទីរ ពេទ្យបង្អែករបស់យើងទាំង២៤ខេត្តក្រុង ដើម្បីជួយសង្គ្រោះជីវិតប្រជាពលរដ្ឋ ។ គួរបញ្ជាក់ផងដែរថា ឆ្នាំនេះយើងបានត្រៀមថ្នាំអាបែតច្រើនជាងឆ្នាំមុន ដោយឆ្នាំមុនក្រសួងត្រៀមថ្នាំអាបែតចំនួនតែ៧០ទៅ៨០តោន ប៉ុណ្ណោះ ។
លោកវេជ្ជបណ្ឌិតបានបន្ថែមទៀតថា កម្មវិធីជាតិប្រយុទ្ធ នឹងជំងឺគ្រុនឈាមក៏ដូចជាក្រសួងសុខាភិបាល អំពាវនាវដល់ប្រជាពលរដ្ឋទាំងអស់គ្នាមេត្តាឈរលើជំហរមួយប្រុងប្រយ័ត្នខ្ពស់ ពីព្រោះរដូវភ្លៀងជិតមកដល់ហើយ ហើយឆ្នាំនេះគឺជាឆ្នាំមួយដែលគិតថា អាចមានហានិភ័យខ្ពស់ដោយសារជំងឺគ្រុនឈាម ។ ដូចនេះយើងត្រូវតែប្រយ័ត្នទាំងអស់គ្នា ត្រូវការពារកូនរបស់លោកអ្នកឱ្យបានល្អ ជា ពិសេសត្រូវតែសម្លាប់មូសខ្លាឱ្យបានមុនមូសខ្លាសម្លាប់យើង ៕
ចែករំលែកព័តមាននេះ