ខេត្តបាត់ដំបង ៖ ជនសង្ស័យពីបទប្រព្រឹត្តអំពើចោរកម្មម្នាក់ត្រូវបានកម្លាំងនគរបាលព្រហ្មទណ្ឌផ្នែកបង្ក្រាបរបស់ស្នងការដ្ឋានខេត្តស្រាវជ្រាវចាប់ខ្លួនបានកាលពីព្រលប់ថ្ងៃទី៦ មីនា នៅចំណុចភូមិទូលតាឯក សង្កាត់ទូលតាឯក ក្រុងបាត់ដំបង ក្រោយពីជននេះប្រព្រឹត្តបទល្មើសបានមួយថ្ងៃ ។
មន្ត្រីនគរបាលការិយាល័យព្រហ្មទណ្ឌកំរិតស្រាលបាននិយាយថា ជនសង្ស័យបានធ្វើសកម្មភាពផ្លោះរបងចូលទៅលួចយកកុំព្យូទ័រយួរដៃ (ឡិបថប) មួយគ្រឿង ពីក្នុងបន្ទប់ដេករបស់លោកសួស សុភ័ក្រ អាយុ៤៥ឆ្នាំ កាលពីវេលារំលងអធ្រាត្រឈានចូលថ្ងៃទី៦ មីនា ដែលលំនៅឋានរបស់គាត់ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។ ជនសង្ស័យដែលត្រូវចាប់ខ្លួននេះឈ្មោះខុន សំណាង ភេទប្រុស អាយុ២២ឆ្នាំ ស្នាក់នៅផ្ទះសំណាក់យីហោ១៦៨ ស្ថិតក្នុងភូមិទូលតាឯក សង្កាត់ទូលតាឯក ។
លោកសួស សុភ័ក្រ បានរាយការណ៍ប្រាប់សមត្ថកិច្ចថា ជននេះបានចូលលួចកុំព្យូទ័រឡិបថបនោះក្នុងគ្រាដែលរូបលោកសម្រាកនៅខាងក្រៅ ហើយទ្វារបន្ទប់មិនបានចាក់គន្លឹះ លុះព្រឹកឡើងលោកបានមកប្តឹងសមត្ថកិច្ចក្រោយពីដឹងថា បាត់កុំព្យូទ័រឡិបថបមួយគ្រឿងម៉ាក TOSHHGIBE ។
ក្រោយពេលត្រូវចាប់ខ្លួនជនសង្ស័យឈ្មោះខុន សំណាង បានសារភាពថា ខ្លួនពិតជាបានចូលលួចយកកុំព្យូទ័រឡិបថបពីក្នុងផ្ទះជនរងគ្រោះខាងលើនោះមែន ។ ជននេះនិយាយថា ខ្លួនបានជិះកង់រើសអេតចាយពេលយប់ លុះទៅដល់លំនៅឋានខាងលើខ្លួនក៏ទុកកង់ខាងក្រៅរួចផ្លោះរបងថ្មចូលទៅបើកទ្វារបន្ទប់ឃើញមានកុំព្យូទ័រឡិបថប១គ្រឿង ក៏លួចយកតែម្តង ។ ជននេះបញ្ជាក់ថា ខ្លួនបានយកកុំព្យូទ័រឡិបថបនេះទៅលក់ឱ្យម្ចាស់ផ្ទះសំណាក់យីហោ១៦៨ ដែលខ្លួនស្នាក់នៅបានលុយ១០០ដុល្លារ លុះល្ងាចឡើងក៏ត្រូវសមត្ថកិច្ចចាប់ខ្លួនតែម្តង ។
លោកមៀន ឡាយ ប្រធានការិយាល័យនគរបាលព្រហ្មទណ្ឌកំរិតស្រាលបានថ្លែងថា ក្រោយពីយើងបានទទួលបណ្តឹងរបស់ជនរងគ្រោះ សមត្ថកិច្ចយើងបានធ្វើការស្រាវជ្រាវ ទើបឈានដល់ការចាប់ខ្លួនជនសង្ស័យ និងដកហូតបានវត្ថុតាងយកមកវិញ ។ លោកបានថ្លែងថា ជនសង្ស័យជាមុខសញ្ញាយ៉ាងសកម្មក្នុងការប្រព្រឹត្តបទល្មើសនាពេលកន្លងមក ។ សមត្ថកិច្ចជំនាញកំពុងកសាងសំណុំរឿងបញ្ជូនខ្លួនជននេះទៅកាន់តុលាការហើយ ៕
ចែករំលែកព័តមាននេះ