រាជធានីភ្នំពេញ ៖ សម្តេចហេង សំរិន ប្រធានរដ្ឋសភានៃព្រះរាជាណាចក្រកម្ពុជា កាលពីព្រឹកថ្ងៃទី១៥ មីនា ២០១១ បានផ្ញើសាររំលែកទុក្ខមួយច្បាប់ដល់ប្រធានរដ្ឋសភានៃប្រទេសជប៉ុន ដើម្បីចូលរួមរំលែកទុក្ខដល់ប្រជាជនជប៉ុន ក៏ដូចជាប្រទេសជប៉ុនទាំងមូល ដែលជួបឧប្បត្តិហេតុរញ្ជួយដី-រលកយក្សស៊ីណាមីខ្លាំងក្លាបណ្តាលឱ្យមនុស្សជាច្រើននាក់បាត់បង់ជីវិត និងខូចខាតហេដ្ឋារចនាសម្ព័ន្ធ ទ្រព្យសម្បត្តិដ៏ច្រើនសន្ធឹកសន្ធាប់ គួរឱ្យរន្ធត់ និងសោកស្តាយ ។
សម្តេចហេង សំរិន បានមានប្រសាសន៍ថា ខ្ញុំមានក្តីរន្ធត់ក្រៃលែងដោយបានទទួលដំណឹងពីការរញ្ជួយដីដ៏ខ្លាំងក្លាកាលពីថ្ងៃទី១១ មីនា ២០១១ នៅប្រទេសជប៉ុន ដែលបណ្តាលឱ្យមានការបាត់បង់អាយុជីវិតមនុស្សជាង១ម៉ឺន
នាក់ ។ ក្នុងហេតុការណ៍ដ៏លំបាកនេះខ្ញុំសូមសម្តែងនូវសមានទុក្ខដ៏ក្រៀមក្រំចំពោះក្រុមគ្រួសារដែលមានសមាជិកបាត់បង់ជីវិតក៏ដូចជាប្រជាជនជប៉ុនទាំងអស់ដែរ ។ ខ្ញុំសូមផ្ញើជូននូវការបួងសួងរបស់ខ្ញុំចំពោះជនរងគ្រោះ និងគ្រួសារជនរងគ្រោះទាំងអស់ ដែលបានទទួលរងគ្រោះថ្នាក់ដោយសារគ្រោះធម្មជាតិដ៏កាចសាហាវនេះ ។
សម្តេចប្រធានរដ្ឋសភាបន្តថា គ្រោះមហន្តរាយខាងលើដែលប្រទេស និងប្រជាជនជប៉ុនបានរងគ្រោះគឺជាការរងទុក្ខរបស់មនុស្សជាតិទាំងមូលនៅលើពិភពលោក ។ ដើម្បីចែករំលែកនូវក្តីទុក្ខសោកនេះប្រជាជនកម្ពុជា សូមកៀកស្មាជាមួយប្រជាជនជប៉ុនដើម្បីជំនះនូវរាល់ការបំផ្លិចបំផ្លាញដោយធម្មជាតិនេះ ៕
ចែករំលែកព័តមាននេះ