រាជធានីភ្នំពេញ ៖ នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ លោកថងស៊ីង ថមម៉ាវង្ស បានមកដល់រាជធានីភ្នំពេញ ក្នុងដំណើរបំពេញទស្សនកិច្ចផ្លូវការរយៈពេល២ថ្ងៃនៅប្រទេសកម្ពុជានាថ្ងៃទី៧ ដល់ថ្ងៃទី៨ មីនា ឆ្នាំ២០១១ ហើយនៅវេលាម៉ោងជាង៩ព្រឹកថ្ងៃទី៧ មីនា ២០១១ នេះ លោកត្រូវបានទទួលស្វាគមន៍ជួបសវនាការជាមួយសម្តេចតេជោហ៊ុន សែន នាយករដ្ឋមន្ត្រីកម្ពុជា នៅវិមានសន្តិភាពទីស្តីការនាយករដ្ឋមន្ត្រី ។
នៅក្នុងដំណើរទស្សនកិច្ចរបស់លោកនាយករដ្ឋមន្ត្រីឡាវក្នុងប្រទេសកម្ពុជា តាមការអញ្ជើញរបស់សម្តេចនាយករដ្ឋមន្ត្រីហ៊ុន សែន នាពេលនេះ លោកថងស៊ីង ថមម៉ាវង្ស នឹងចូលក្រាបបង្គំគាល់ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅឯព្រះបរមរាជវាំងក្នុងរាជធានីភ្នំពេញ ។ ក្រៅពីនោះលោកនាយករដ្ឋមន្ត្រីឡាវ នឹងចូលជួបសម្តែងការគួរសម និងសវនាការដាច់ដោយឡែកពីគ្នា ជាមួយប្រធានព្រឹទ្ធសភា សម្តេច ជា ស៊ីម និងប្រធានរដ្ឋសភា សម្តេចហេង សំរិន ៕
ចែករំលែកព័តមាននេះ