រាជធានីភ្នំពេញ ៖ នាយឧត្តមសេនីយ៍ និងជារដ្ឋលេខាធិការក្រសួងការពារជាតិ លោកនាង ផាត នឹងដឹកនាំក្រុមលេខាគណៈកម្មាធិការកិច្ចការព្រំដែនវិលត្រឡប់មកពីចូលរួមកិច្ចប្រជុំនៅក្រុងបាងកកវិញ នាវេលាម៉ោង៦និង៣០នាទីល្ងាចថ្ងៃទី៥ មេសា ២០១២ នេះ ហើយលោកនាយឧត្តមសេនីយ៍ នឹងធ្វើសន្និសីទកាសែតផងដែរ នៅឯព្រលានយន្តហោះអន្តរជាតិភ្នំពេញ ។
តាមការឱ្យដឹងពីមន្ត្រីជាន់ខ្ពស់ក្រសួងការពារជាតិបញ្ជាក់ថា សន្និសីទកាសែតរបស់លោកនាយឧត្តមសេនីយ៍នាង ផាត នាវេលាល្ងាចនេះនឹងបង្ហាញពីលទ្ធផលជុំវិញកិច្ចប្រជុំនៅក្រុងបាងកក ដែលរំពឹងថា នឹងនិយាយអំពីការអនុវត្តសាលដីកាតុលាការយុត្តិធម៌អន្តរជាតិដែលបានកំណត់ឱ្យកម្ពុជា និងថៃ ដកកងទ័ពចេញពីតំបន់ជម្លោះក្បែរប្រាសាទព្រះវិហារ ហើយអាចនឹងនិយាយពីការមកដល់របស់អ្នកសង្កេតការណ៍ឥណ្ឌូណេស៊ីផងដែរ ។
គួររំលឹកថា កិច្ចប្រជុំក្រុមការងាររួមកម្ពុជា-ថៃបានផ្តើមប្រារព្ធធ្វើជាផ្លូវការកាលពីថ្ងៃទី៤ មេសា ២០១២ មកម៉្លេះ នៅទីក្រុងបាងកកប្រទេសថៃ ដោយភាគីកម្ពុជាដឹកនំាដោយ លោកនាយឧត្តមសេនីយ៍ផ្កាយមាស៤ នាង ផាត រដ្ឋលេខាធិការក្រសួងការពារជាតិ និងមន្រ្តីពាក់ព័ន្ធក្នុងក្រុមការងារជាង១០រូបទៀត ដែលបានទៅដល់ទីក្រុងបាងកក កាលពីថ្ងៃទី៣ មេសា ។ ចំណែកភាគីថៃដឹកនាំដោយនាយសេនាធិការកងទ័ពជើកគោកភូមិន្ទថៃ ។
អ្នកនាំពាក្យក្រសួងការពារជាតិកម្ពុជាបានបញ្ជាក់ឱ្យយដឹងដែរថា នៅក្នុងកិច្ចប្រជុំក្រុមការងាររួមកម្ពុជា-ថៃ ដែលបានបិទបញ្ចប់នៅថ្ងៃទី៥ មេសានេះ ភាគីកម្ពុជាមិនលើកយកអ្វីក្រៅពីការអនុវត្តសាលដីកាតុលាការអន្តរជាតិក្រុងឡាអេ ដែលបង្គាប់ឱ្យកម្ពុជា-ថៃអនុវត្តន៍កាលពីថ្ងៃទី១៨ កក្កដា ២០១១កន្លងមកនេះមកធ្វើការជជែកពិភាក្សាក្នុងកិច្ចប្រជុំនេះទេ ។
ចំណែករដ្ឋមន្រ្តីក្រសួងការបរទេសថៃ លោកស៊ូរ៉ាពង្ស តូវិចាកឆៃគុល បាននិយាយនៅលើសារព័ត៌មានឌឹ ណេសិន របស់ថៃថា កិច្ចប្រជុំក្រុមការងារកម្ពុជា-ថៃនេះ ភាគីទំាងពីរនឹងពិភាក្សាលើស្ថានភាពសន្តិសុខទូទៅ បន្ថែមនូវការកសាងទំនុកចិត្តក្នុងការបង្កើតផែនការរវាងព្រំដែននៃប្រទេសទំាងពីរ និងការអនុវត្តតាមសេចក្តីសម្រេចរបស់តុលាការយុត្តិធម៌អន្តរជាតិ ក្នុងការដកកងទ័ពទំាងអស់ចេញពីតំបន់មានជម្លោះនៅជុំវិញបា្រសាទព្រះវិហារ ។
គួរបញ្ជាក់ថា ក្រុមការងាររួមកម្ពុជា-ថៃនេះ ត្រូវបានបង្កើតឡើងកាលពីចុងឆ្នាំ២០១១នៅរាជធានីភ្នំពេញ នៅក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ GBC ដែលចូលរួម ដោយរដ្ឋមន្រ្តីក្រសួងការពារជាតិកម្ពុជា-ថៃ ក្នុងគោលបំណង ដើម្បីអោយក្រុមការងារនេះ ជជែកពិភាក្សាគ្នា មុននឹងឈានទៅដកកងទ័ព តាមការសម្រេចរបស់តុលាការអន្តរជាតិ និង ដើម្បីថែរក្សាសន្តិសុខនៅតាមព្រំដែនរវាងប្រទេសទំាងពីរ ៕
ចែករំលែកព័តមាននេះ