ខេត្តតាកែវ ៖ ផ្លូវខេត្តមួយខ្សែដែលមានប្រវែង៦.៨០០ម៉ែត្រ ត្រូវបានមន្ទីរសាធារណការ និងដឹកជញ្ជូនខេត្តធ្វើការជួសជុលចាក់ក្រាលកៅស៊ូ និងដាក់ប្រព័ន្ធលូបង្ហូរទឹកអមថ្នល់ដែលតភ្ជាប់ពីផ្លូវក្រុងលេខ៨ដល់ផ្សារគោកអំពៅ ឃុំស្រង៉ែ ស្រុកទ្រាំង ។
លោកអ៊ុំ អ៊ួក ប្រធានមន្ទីរសាធារណការ និងដឹកជញ្ជូនខេត្តបានឱ្យដឹងថា ផ្លូវខេត្តលេខ១២៩អា មានប្រវែង៦.៨០០ម៉ែត្រ ទទឹង៦ម៉ែត្រ ដោយចាក់កៅស៊ូ DBST ជាគម្រោងថវិកាឆ្នាំ២០១២ តាមរយៈលោកអភិបាលខេត្ត និងក្រសួងសាធារណការ ហើយខាងមន្ទីរជាអ្នកទទួលខុសត្រូវធ្វើដែលពេលនេះខាងជំនាញកំពុងតែកាប់ដើមឈើនៅអមសងខាងផ្លូវ និងរៀបចំដាក់ប្រព័ន្ធលូបង្ហូរទឹករួចរាល់ និងចាប់ផ្តើមពង្រាបថ្ម ដើម្បីចាក់ក្រាលកៅស៊ូ ។
លោកណុប នី អនុប្រធានមន្ទីរសាធារណការ និងដឹកជញ្ជូនខេត្ត និងជាអ្នកត្រួតពិនិត្យផ្ទាល់បានឱ្យដឹងថា ផ្លូវលេខ១២៩អានេះរៀបចំដាក់ប្រព័ន្ធលូបង្ហូរទឹកដែលមានមុខកាត់១ម៉ែត្រ នៅតាមបណ្តោយថ្នល់ប្រវែង៦១៤ម៉ែត្រ ឯលូកាត់ទទឹងថ្នល់៦កន្លែងជាលូមុខកាត់៨តឹក ហើយជំនាញត្រូវធ្វើទៅតាមបទដ្ឋានបច្ចេកទេសឱ្យច្បាស់លាស់ដើម្បីធានាបានគុណភាពយូរអង្វែងព្រោះយើងចាក់កៅស៊ូប្រភេទ DBST ឱ្យរួចរាល់ក្រោយពេលបុណ្យចូលឆ្នាំថ្មីប្រពៃណីខ្មែរខាងមុខ ៕
ចែករំលែកព័តមាននេះ