ខេត្តកំពង់ចាម ៖ បុរសម្នាក់ឈ្មោះទឹម សាង អាយុ៤៤ឆ្នាំ រស់នៅភូមិជ្រៃបិទមាស សង្កាត់សួង ក្រុងសួង បានត្រូវកម្លាំងសមត្ថកិច្ច ចាប់ខ្លួនកាលពីវេលាម៉ោង១០ និង៣០នាទី ព្រឹកថ្ងៃទី២៨ មីនា តាមដីការបស់សាលាដំបូងខេត្តដោយចោទប្រកាន់ពីបទមនុស្សឃាតដែលបានយកដែកស្បែងទៅវាយសំពងបុរសម្នាក់ឈ្មោះផេន តេង អាយុ៤៤ឆ្នាំដូចគ្នា និងរស់នៅភូមិ-សង្កាត់ជាមួយគ្នា កាលពីអំឡុងឆ្នាំ២០០៩ កន្លងមក ។
តាមលោកវរសេនីយ៍ត្រីលាង អេង អធិការនគរបាលក្រុងសួង បានឱ្យដឹងថា ដោយទទួលបានព័ត៌មានពីក្រុមសាច់ញាតិរបស់អ្នករងគ្រោះថា «ឃើញបុរសឈ្មោះសាង លួចចូលមកសំងំនៅក្នុងផ្ទះរបស់ខ្លួន» ភ្លាមនោះរូបលោកបានចាត់កម្លាំងក្រោមឱវាទឱ្យចុះទៅជាបន្ទាន់ ព្រោះមានដីកាកំពុងស្វែងរកចាប់ខ្លួនស្រាប់ ។ កម្លាំងអធិការដ្ឋាននគរបាលក្រុងសួងបានសហការជាមួយនឹងប៉ុស្តិ៍រដ្ឋបាលសង្កាត់សួងចុះទៅឃាត់បុរសនេះដល់លំនៅឋាននាវេលាម៉ោង១០ និង៣០នាទីព្រឹកថ្ងៃទី២៨មីនា រួចបញ្ជូនមកកាន់អធិការដ្ឋាននគរបាលក្រុង ដើម្បីសួរនាំ ។
គួររំលឹកថា កាលពីវេលាម៉ោង១២ថ្ងៃត្រង់ថ្ងៃទី១២ មេសា ២០០៩ នៅផ្ទះរបស់ឈ្មោះទឹម សាង បានជួបជុំគ្នាផឹកស៊ីដោយមានគ្នាចំនួន៤នាក់ អស់ស្រាជាច្រើនលីត្រ ។ បន្ទាប់ពីសុរាចូលខ្លួនហើយនោះ បុរសរងគ្រោះឈ្មោះតេង បាននិយាយដៀមដាមឱ្យគ្នាទៅវិញទៅមកជាមួយនឹងបុរសឈ្មោះសាង ក៏កើតជាហិង្សាឡើងដោយបុរសឈ្មោះសាង បានយកដែកស្បែងក្រចកជ្រូកមកវាយសំពងបុរសឈ្មោះផេន តេង ត្រូវពោះ និងឆ្អឹងជំនីរខាងស្តាំ ហើយភ្លាមៗនោះក្រុមអ្នកផឹកស៊ីជាមួយនាំគ្នាឃាត់មិនឱ្យបង្កជម្លោះតទៅទៀត ។ បុរសរងគ្រោះដែលមានជីវភាពខ្វះខាតផងមិនបានទៅពេទ្យទេ ព្រោះនឹកស្មានតែមិនអី លុះ នៅវេលាម៉ោង៩យប់ថ្ងៃទី១៣ មេសា ស្រាប់តែស្លាប់ ឯបុរសឈ្មោះសាងបានរត់គេចខ្លួនបាត់ស្រមោលមិនដឹងជាទៅទីណាឡើយ ។
លោកស៊ុន ណាត មន្ត្រីនគរបាលក្រុងសួងបានបញ្ជាក់ថា ពិរុទ្ធជនរូបនេះបានព្យាយាមរត់គេចខ្លួនទៅរស់នៅស្រុកស្នួល ខេត្តក្រចេះដោយស៊ីឈ្នួលដាំកៅស៊ូឱ្យគេលុះនៅពេលធ្លាក់ខ្លួនឈឺមិនមានអ្នកណាមើលថែទាំបានរត់មកផ្ទះវិញ ទើបបានរយៈពេលប្រហែល១០ថ្ងៃប៉ុណ្ណោះ ។ ពេលមកនៅផ្ទះនេះ ដោយក្រុមសាច់ញាតិអ្នករងគ្រោះឃើញក៏ប្តឹងមកសមត្ថកិច្ច ទើបមានការចាប់ខ្លួនដោយយោងទៅតាមដីកាដែលមានស្រាប់ ហើយបញ្ជូនមកស្នងការដ្ឋាននគរបាលខេត្តដើម្បីចាត់ការបន្ត ៕
ចែករំលែកព័តមាននេះ