រាជធានីភ្នំពេញ ៖ យោងតាមដីការបស់សាលាដំបូងរាជធានីភ្នំពេញដែលចុះហត្ថលេខា ដោយលោកឯក ឆេងហួត ព្រះរាជអាជ្ញារងចុះថ្ងៃទី២៣ មីនា ២០១១ ហើយកោះសន្តិភាព បានទទួលឱ្យដឹងថា តុលាការសាលាដំបូងរាជធានីភ្នំពេញចេញដីកាកោះ លោកសម រង្ស៊ី ឱ្យចូលខ្លួនទៅក្នុងអង្គសវនាការនៅថ្ងៃទី៥ មេសា ឆ្នាំ២០១១ វេលាម៉ោង២និង៣០នាទីរសៀល ក្នុងសំណុំរឿងបរិហារកេរ្តិ៍ និងផ្សាយព័ត៌មានមិនពិតដែលប្តឹងដោយលោកហោ ណាំហុង។
នៅក្នុងដីកាកោះបានសរសេរថា ក្រោយពីបានពិនិត្យសំណុំរឿងព្រហ្មទណ្ឌលេខ៦៩៣ ចុះថ្ងៃទី២២ ខែមេសា ២០០៨ ដែលមានឈ្មោះសម រង្ស៊ី ភេទប្រុស អាយុ៦០ឆ្នាំ សញ្ជាតិខែ្មរជាប់ចោទពីបទ «បរិហារកេរ្តិ៍និងផ្សាយព័តមានមិនពិតប្រព្រឹត្តនៅសារមន្ទីរជើងឯក សង្កាត់ ដង្កោ ខណ្ឌដង្កោ រាជធានីភ្នំពេញ កាលពីថ្ងៃទី១៧មេសា ២០០៨ ដែលត្រវផ្តន្ទាទោសតាមមាត្រា៦៣ថ្មីនៃច្បាប់ ស្តីពីវិសោធនកម្មមាត្រា៦៣ច្បាប់ព្រហ្មទណ្ឌអន្តរកាលនិងមាត្រា៦២នៃច្បាប់ព្រហ្មទណ្ឌអន្តរកាល ។ ដូច្នេះបង្គាប់ឱ្យឈ្មោះសម រង្ស៊ី ភេទប្រុស អាយុ៦០ឆ្នាំ សញ្ជាតិខែ្មរ ទីលំនៅស្នាក់ការលេខ៧១ វិថីសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ឱ្យចូលមកកាន់សាលាដំបូងរាជធានីភ្នំពេញនៅថ្ងៃទី៥ មេសា ឆ្នាំ២០១១ វេលាម៉ោង២និង៣០នាទីរសៀលជាកំណត់ដើម្បីសវនាការ។ សមាសភាពចូលរួមសវនាការរួមមានលោកសេង នាង ចៅក្រមជំនុំជម្រះ លោក ឯក ឆេងហួត ជាតំណាងអយ្យការ និងលោក តិច ប៉ូ ជាក្រឡាបញ្ជីសវនាការ។
ប្រភពពីសាលាដំបូងរាជធានីភ្នំពេញបានបន្តថា តុលាការបានជូនដំណឹងនេះទៅដល់មេធាវីជនជាប់ចោទគឺលោក ជួង ជូងឺ និងមេធាវីដើមចោទ គឺលោកការ សាវុត្ថ រួចរាល់អស់ហើយកាលពីពេលថ្មីៗនេះដើម្បីចូលរួមសវនាការតាមការកំណត់ ។ គេនៅចាំបានថា លោកសម រង្ស៊ី ត្រូវបានលោក ហោ ណាំហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិប្តឹងបន្ទាប់ពីលោកបានថ្លែងចោទលោកហោ ណាំហុង ពាក់ពន្ធ័នឹងតួនាទីរបស់លោកក្នុងសម័យខ្មែរក្រហម។ លោកសម រង្ស៊ី ក៏បានចាញ់ក្តី លោកហោ ណាំហុង ក្នុងរឿងដដែលនេះនៅឯតុលាការប្រទេសបារាំងដែរកាលពីពេលថ្មីៗកន្លងទៅបន្ទាប់ពីលោកបានសរសេរសៀវភៅចោទលោក ហោ ណាំហុង ថាពាក់ព័ន្ធនឹងរបបខ្មែរក្រហម ៕
ចែករំលែកព័តមាននេះ