ប្រធានាធិបតីស៊ីរីលោកបាចាអាល់ អាសាដ ថ្លែងកាលពីថ្ងៃទី២៩ មីនាថា ប្រទេសរបស់លោកបានឆ្លើយតបចំពោះបេសកកម្មនៃបេសកជនរបស់អ.ស.ប និងរបស់សម្ព័ន្ធអារ៉ាប់លោកកូហ្វីអាណាន់ ដោយគូសបញ្ជាក់ថា ស៊ីរីនឹងធ្វើរាល់ការខិតខំប្រឹងប្រែងដើម្បីឱ្យបេសកកម្មរបស់លោកអាណាន់ទទួលបានជោគជ័យ ដើម្បីស្តារសន្តិសុខនិងស្ថេរភាព។
លោកអាសាដអះអាងបែបនេះក្នុងសារលិខិតផ្ញើកាលពីថ្ងៃទី២៩ មីនា ដល់មេដឹកនាំប្រទេសជាសមាជិករបស់ BRICS (ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង) ដោយក្នុងសារលិខិតនោះលោកសម្តែងក្តីសង្ឃឹមថា លោកអាណាន់នឹងដោះស្រាយបញ្ហាស៊ីរីជាមួយគ្រប់សមាសភាពទាំងអស់ដែលទាក់ទិននឹងវិបត្តិស៊ីរីក្នុងកម្រិតតំបន់និងអន្តរជាតិ ។
ក្នុងសារលិខិតចេញផ្សាយដោយទីភ្នាក់ងារព័ត៌មានស៊ីរី SANA លោកអាសាដគូសបញ្ជាក់ថា ដើម្បីធ្វើឱ្យបេសកកម្មរបស់លោកអាណាន់ ទទួលបានជោគជ័យគេត្រូវផ្តោតលើការបញ្ឈប់ការគាំទ្រគ្រប់ប្រភេទដល់ភេរវកម្មនៅស៊ីរី ពិសេសពីសំណាក់បណ្តាប្រទេសដែលបណ្តាមន្ត្រីពួកគេលាតត្រដាងពីការផ្តល់ប្រាក់និងអាវុធដល់បណ្តាក្រុមភេរវកម្មប្រដាប់អាវុធនៅស៊ីរី ដែលលោកចង់និយាយសំដៅលើប្រទេសកាតា និងអារ៉ាប៊ីសាអូឌីត ដែលបានប្រកាសដោយចំហពីឆន្ទៈផ្តល់អាវុធនិងហិរញ្ញវត្ថុដល់ពួកឧទ្ទាមស៊ីរី។ លោកអាសាដ អះអាងជាថ្មីពីសេចក្តីត្រូវការបញ្ចុះបញ្ចូលគ្រប់ប្រទេសដដែលគាំទ្របណ្តាក្រុមប្រដាប់អាវុធនៅស៊ីរីឱ្យពួកនេះបញ្ឈប់ជាបន្ទាន់នូវអំពើហិង្សា ក្នុងនោះមានបណ្តាប្រទេសជិតខាងដែលផ្តល់ជម្រកនិងជួយសម្រួលដល់ការវាយប្រហាររបស់បណ្តាក្រុមប្រដាប់អាវុធប្រឆាំងស៊ីរី ។
លោកអាសាដក៏ឱ្យដឹងផងដែរថា ស៊ីរីក្នុងពេលឆាប់ៗនឹងធ្វើការចរចាជាតិមួយចូលរួមដោយគ្រប់ភាគីស៊ីរីដើម្បីស្តារស្ថេរភាពនិងសន្តិសុខឡើងវិញក្នុងប្រទេស ។ លោកសង្ឃឹមថាក្រុមប្រទេស BRICS នឹងធ្វើរាល់ការខិតខំប្រឹងប្រែងដើម្បីឱ្យទិសដៅនោះសម្រេចបានជោគជ័យស៊ីរី ៕
ចែករំលែកព័តមាននេះ