រាជធានីភ្នំពេញ ៖ កម្មការិនីធ្វើការនៅរោងចក្រអ៊ីនធើរណេស្សូណល ហេ្វស៊ិនរ៉ូយ៉ាល់ (International Fashion Royal Co.Ltd) ដែលមានទីតាំង ស្ថិតនៅសួនកាណាឌីយ៉ា អគារលេខ៣៤ ភូមិត្រពាំងថ្លឹង សង្កាត់ចោមចៅ ខណ្ឌដង្កោ រាជធានីភ្នំពេញ បានទទួលការព្យាបាលសុខភាពមាត់ធ្មេញពីក្រុមគ្រូពេទ្យ មកពីសហរដ្ឋអាមេរិក ។
រាជធានីភ្នំពេញ ៖ កម្មការិនីធ្វើការនៅរោងចក្រអ៊ីនធើរណេស្សូណល ហេ្វស៊ិនរ៉ូយ៉ាល់ (International Fashion Royal Co.Ltd) ដែលមានទីតាំង ស្ថិតនៅសួនកាណាឌីយ៉ា អគារលេខ៣៤ ភូមិត្រពាំងថ្លឹង សង្កាត់ចោមចៅ ខណ្ឌដង្កោ រាជធានីភ្នំពេញ បានទទួលការព្យាបាលសុខភាពមាត់ធ្មេញពីក្រុមគ្រូពេទ្យ មកពីសហរដ្ឋអាមេរិក ។
លោកជេម មីន (James Min) នាយកក្រុមហ៊ុនណេស្សូណល ហ្វេស៊ិនរ៉ូយ៉ាល់ បាននិយាយ ថា ដោយមើលឃើញពីទុក្ខលំបាករបស់បងប្អូនកម្មករ កម្មការិនីដែលមានបញ្ហាផ្នែកសុខភាពមាត់ធ្មេញ ទើបរោងចក្រធ្វើការទំនាក់ទំនងជាមួយការិយាល័យធំនៅសហរដ្ឋអាមេរិក ដើម្បីសុំគ្រូពេទ្យមកព្យាបាល ដោយឥតគិតថ្លៃជូនពួកគេ។ លោកបន្តថា ការព្យាបាលសុខភាពមាត់ធ្មេញដល់កម្មការិនី គឺដោយសារតែមានការសហការជាមួយគ្លីនិកធ្មេញអាមេរិកាំងនៅទួលគោក ។
ការព្យាបាលនេះមានរយៈពេល៣ថ្ងៃ គឺចាប់ពីថ្ងៃទី២៣ រហូតដល់ថ្ងៃទី២៥ ខែមីនា ឆ្នាំ ២០១២។ លោកបានបញ្ជាក់ថា នេះជាលើកទី១ ហើយដែលរោងចក្រមានសកម្មភាពបែបនេះ ហើយការជួយព្យាបាលសុខភាពមាត់ធ្មេញដល់កម្មការិនីក្នុងគោលបំណងដើម្បីឲ្យកម្មការិនីទាំងនេះមានសុខភាពមាត់ធ្មេញល្អ និងដើម្បីឲ្យការងារនៅក្នុងរោងចក្រមានការរីកចម្រើន ព្រោះថា បើកម្មករមានបញ្ហាសុខភាពដំណើរការផលិតកម្មនៅក្នុងរោងចក្រក៏ជួបការលំបាកដែរ។ គោលបំណងសំខាន់ គឺដើម្បីកាត់បន្ថយការចំណាយរបស់បងប្អូនកម្មករក្នុងការព្យាបាលទៅលើបញ្ហាសុខភាពមាត់ធ្មេញផងដែរ ។
លោកជុង ជូស៊ុង (Jung Joo Sung) ជាប្រធានក្រុមគ្រូពេទ្យមកពីសហរដ្ឋអាមេរិកបានមានប្រសាសន៍ថា ដោយមើលឃើញពីការលំបាករបស់បងប្អូនខ្មែរ ពិសេសក្មួយៗកម្មករ កម្មការិនីធ្វើការនៅក្នុងរោងចក្រ អ៊ីនធើរណេស្សូណលហ្វេស៊ិនរ៉ូយ៉ាល់ មានបញ្ហាសុខភាពមាត់ធ្មេញ ទើបលោកនាំក្រុម គ្រូពេទ្យ ដែលមានមូលដ្ឋាននៅសហរដ្ឋអាមេរិកចុះមកព្យាបាលដល់កម្មករ កម្មការិនីនាពេលនេះ ។ លោកបន្តថា ការព្យាបាលនេះក្រុមលោកសហការជាមួយគ្លីនិកអាមេរិកាំងដែលមានលោកទន្តបណ្ឌិតហ្វ្រេង ចូ និងលោកម៉ាការវ៉ា ជាអ្នកគ្រប់គ្រង ។ ក្រៅពីជួយព្យាបាលសុខភាពមាត់ធ្មេញដល់កម្មករហើយ ក្រុមលោកក៏មានបំណងចង់ផ្តល់បទពិសោធន៍មេរៀនដល់ក្រុមគ្រូពេទ្យកម្ពុជាផងដែរ អំពីរបៀបដាំបង្គោលវិសទៅក្នុងឆ្អឹងអញ្ចាញដែលជំនាញនេះគ្រូពេទ្យកម្ពុជាមិនសូវបានចេះទេ ។
លោកជុង ជូស៊ុង បាននិយាយឲ្យដឹងទៀតថា តាមពិតមានកម្មករ កម្មការិនីបានដាក់ពាក្យសុំព្យាបាលចំនួន៣៨០នាក់ តែដោយសារតែរយៈពេលខ្លីយើងព្យាបាលបានតែ២០០នាក់ប៉ុណ្ណោះ រីឯអ្នកដែលនៅសេសសល់យើងនឹងព្យាបាលនៅពេលក្រោយទៀត ។ លោកបានបញ្ជាក់ថា កម្មការិនីធ្វើការនៅតាមរោងចក្រ ភាគច្រើនមានបញ្ហាធ្មេញពុកដោយសារតែពួកគេខ្វះខាតអនាម័យមាត់ធ្មេញ ហើយប្រសិនបើមិនធ្វើការព្យាបាលទេនោះ ពួកគេនឹងមានជំងឺមាត់ធ្មេញ និងត្រូវចំណាយថវិកាយ៉ាងច្រើន ក្នុងការព្យាបាល ។
កម្មការិនីទាំង២០០នាក់បានថ្លែងអំណរគុណយ៉ាងជ្រាលជ្រៅចំពោះម្ចាស់រោងចក្រ ក៏ដូចជាក្រុមគ្រូពេទ្យដែលបានមកព្យាបាលដល់ពួកគេ ។
កញ្ញា ពេជ្រ ស្រីមុំ ផ្នែកកាត់ដេរបាននិយាយថា «ខ្ញុំមានអារម្មណ៍ត្រេកអរជាខ្លាំងដែលទទួលបានការព្យាបាលធ្មេញដោយឥតគិតថ្លៃពីរោងចក្រ» ។ កញ្ញាបន្តថា តាំងពីកញ្ញាចូលធ្វើការនៅតាមរោងចក្រមួយចំនួនមក នេះជាលើកទី១ហើយ ហើយប្រហែលជាមិនមានរោងចក្រណាក្រៅពីរោងចក្រនេះទេ ដែលបាននាំគ្រូពេទ្យចុះជួយព្យាបាលដល់កម្មករដោយឥតគិតថ្លៃ ។ ការជួយព្យាបាលនេះមានសារសំខាន់ណាស់សំរាប់កម្មករ ព្រោះអាចឲ្យសុខភាពមាត់ធ្មេញកម្មករមានសុខភាពល្អនិងជួយសន្សំសំចៃថវិកាដល់កម្មករក្នុងការកាត់បន្ថយការចំណាយទៅលើការព្យាបាលសុខភាពមាត់ធ្មេញ៕
ចែករំលែកព័តមាននេះ