រាជធានីភ្នំពេញ ៖ សមាគមត្រកូលលីមមកពីប្រទេសសិង្ហបុរី និងសមាគមត្រកូលលីមកម្ពុជា កាលពីរសៀលថ្ងៃទី២៤ មីនា បាននាំអំណោយទៅចែកជូនប្រជាពលរដ្ឋក្រីក្រចំនួន២០០គ្រួសារ រស់នៅសង្កាត់គីឡូម៉ែត្រលេខ៦ និងសង្កាត់ច្រាំងចំរេះទី២ ខណ្ឌឫស្សីកែវ ។
ពិធីនេះរៀបចំឡើងនៅស្នាក់ការគណបក្សខណ្ឌ ដោយមានការចូលរួមពីម្ចាស់អំណោយ និងអាជ្ញាធរយ៉ាងច្រើនកុះករ ។ អំណោយដែលយកទៅចែកជូនក្នុងឱកាសនោះ ក្នុងមួយគ្រួសារទទួលបាន អង្ករ១៥គីឡូក្រាម មី១កេស សារុង២ ក្រមា២ ចាហួយខ្មៅ២កំប៉ុង នំ១កញ្ចប់ ខោអាវ១កញ្ចប់ សម្ភារសិក្សា១កញ្ចប់ និងថវិកា៤ម៉ឺនរៀល ។ ឧបត្ថម្ភមន្ត្រីគណបក្សខណ្ឌឫស្សីកែវចំនួន១៣នាក់ ម្នាក់ៗ២០ដុល្លារ ប្រជាការពារ និងមន្ត្រីបក្សច្រាំងចំរេះទី២ចំនួន៤០០ដុល្លារ ។
លោកឧកញ៉ា លឹម ឈៀវហ៊ួរ តំណាងសមាគមត្រកូលលីមបានឱ្យដឹងថា ការនាំអំណោយមកចែកជូនបងប្អូនក្រីក្រនៅពេលនេះ គឺជាទឹកចិត្តរបស់ត្រកូលលីម ទាំងត្រកូលលីមនៅសិង្ហបុរី និងត្រកូលលីមកម្ពុជា ដែលបានជួយដល់បងប្អូនក្រីក្រជារៀងរាល់ឆ្នាំនៅមុនឱកាសបុណ្យចូលឆ្នាំប្រពៃណីជាតិ ដើម្បីឱ្យបងប្អូនមានលទ្ធភាពធ្វើបុណ្យទាន។ អំណោយទាំងនេះ មិនច្រើននោះទេ តែវាអាចជួយសម្រួលដល់ការលំបាកបានមួយគ្រាដែរ ។
លោកឧកញ៉ា បានណែនាំដល់ប្រជាពលរដ្ឋក្រីក្រត្រូវខិតខំរកការងារធ្វើក្នុងស្រុក កុំទៅធ្វើការងារនៅក្រៅប្រទេស នាំឱ្យមានការលំបាក ៕
ចែករំលែកព័តមាននេះ