ខេត្តព្រះវិហារ ៖ តំណាងក្រុមហ៊ុន សិលា ដាម៉ិច ខូអប់ ភើរេសិនជាសម្ព័ន្ធមេត្រីភាពជាមួយកងទ័ពវរសេនាតូចការពារព្រំដែនលេខ៤០៥ ដែលកំពុងឈរជើងក្បែរជើងភ្នំដងរែក ក្នុងតំបន់អានសេះ រួមដំណើរជាមួយតំណាងអគ្គនាយកដ្ឋានភ័ស្ដុភាហិរញវត្ថុនៃក្រសួងការពារជាតិ ប្រចាំទិសយោធភូមិភាគទី៤បាននាំយកអំណោយទៅប្រគល់ជូនអង្គភាពវរ៤០៥កាលពីព្រឹកថ្ងៃទី២៥ មីនា ២០១២ ។
អំណោយដែលនាំយកទៅចែកជូននាឱកាសនោះ រួមមានតុដែកមូលចំនួន១០ កៅអីជ័រចំនួន១០០ ស្ករស២០០គីឡូក្រាម,អង្ករ៥៥០គីឡូក្រាម, អំបិល៣០០គីឡូក្រាម,សម្ភារសម្រាប់ប្រើប្រាស់ផ្ទះបាយមួយចំនួនធំ និងប្រគល់ផ្ទះបាយមួយខ្នងទំហំ៩ម៉ែត្រគុណ១២ម៉ែត្រធ្វើអំពីឈើ ប្រក់ស័ង្កសីក្រាលបេតុង ដែលចំណាយទឹកប្រាក់សរុបចំនួន២៥០០ដុល្លារអាមេរិក ទូរទស្សន៍ឌីធីវីមួយគ្រឿង ស៊ីតែនស្ដុកទឹកចំណុះ២០០០លីត្រចំនួន២។ លោកគង់ ចាន់ តំណាងក្រុមហ៊ុនសិលាដាម៉ិច ខូអប់ភើរេសិន ឱ្យដឹងថា ការជួយឧបត្ថម្ភរបស់ក្រុមហ៊ុនសិលាដាម៉ិច ជូនវរ៤០៥ លើកនេះ គឺជាលើកទី៦ហើយ បន្ទាប់ពីបានចងសម្ព័ន្ធមេត្រីភាពជាមួយក្នុងអំឡុងឆ្នាំ២០១០មកម៉្លេះ។
លោកវរសេនីយ៍ទោ ជូន ចិត្រ មេញ្ជាការវរសេនាតូចការពារព្រំដែនលេខ៤០៥ បានថ្លែងអំណរគុណដល់ក្រុមហ៊ុនសិលាដាម៉ិច ដែលជាច្រើនលើកក្រុមហ៊ុនតែងតែជួយឧបត្ថម្ភដល់វររបស់លោករាល់កង្វះខាតផ្សេងៗសម្រាប់ជួយទ្រទ្រង់ដល់ការខ្វះខាតរបស់កងទ័ពដែលកំពុងឈរជើង ការពារបូរណភាពទឹកដី៕
ចែករំលែកព័តមាននេះ