ខេត្តព្រះសីហនុ ៖ តំបន់ប្រតិបត្តិការសឹករងខេត្តបានរៀបចំបើកវគ្គហ្វឹកហ្វឺនកងទ័ពប្រចាំឆមាសទី២ឆ្នាំ២០១០ ដែលជាវគ្គហ្វឹកហ្វឺនលំហាត់យុទ្ធដំណើរទ័ពកងអនុសេនាធំអន្តរាគមន៍មាននាយទាហាន នាយទាហានរង និងពលទាហានជាកម្មសិក្សាការីចូលរួមហ្វឹកហាត់ចំនួន៤៥ថ្ងៃ ចាប់ផ្តើមពីថ្ងៃទី៨ ខែវិច្ឆិកា ឆ្នាំ២០១០ ទៅ។ លោកវរសេនីយ៍ឯកសុខ សាកល មេបញ្ជាការរងតំបន់ប្រតិបត្តិការសឹករងខេត្តព្រះសីហនុថ្លែងបញ្ជាក់ក្នុងឱកាសបើកវគ្គហ្វឹកហ្វឺនថា នាយទាហាន នាយទាហានរង និងពលទាហានតំបន់ប្រតិបត្តិការសឹករងខេត្តព្រះសីហនុមានភារកិច្ចសំខាន់ជាច្រើនដែលត្រូវបំពេញរួមមាន ភារកិច្ចការពារសន្តិសុខនៅមូលដ្ឋាន ចលនាជួយប្រជាពលរដ្ឋ និងជាកំលាំងអន្តរាគមន៍ចូលរួមការពារសន្តិសុខនៅតាមព្រំដែនប្រទេសផងដែរ។ ការហ្វឹកហាត់នេះមានសារសំខាន់បំផុតដើម្បីពង្រឹងដល់សមត្ថភាពកងទ័ពសំរាប់ភារកិច្ចបំរើប្រទេសជាតិ។
ពេលអញ្ជើញជាអធិបតីក្នុងពិធីបើកវគ្គហ្វឹកហ្វឺនយុទ្ធដំណើរទ័ពកងអនុសេនាធំអន្តរាគមន៍តំបន់ប្រតិបត្តិការសឹករងខេត្ត លោកស្បោង សារ៉ាត ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអភិបាលខេត្ត ប្រធានគណៈបញ្ជាការឯកភាពខេត្តព្រះសីហនុបានការកោតសរសើរចំពោះនាយទាហាន នាយទាហានរង និងពលទាហានក្នុងខេត្តព្រះសីហនុទាំងអស់ដែលបានចូលរួមបំពេញភារកិច្ចការពារជាតិទាំងនៅក្នុងមូលដ្ឋានខេត្ត និងតាមព្រំប្រទល់ដែនប្រទេសកន្លងមកបង្ហាញពីវីរភាពស្នេហាជាតិដ៏ឧត្តុង្គឧត្តមបំផុត។ នៅក្នុងឱកាសនោះ លោកអភិបាលខេត្តបានឧបត្ថម្ភដល់នាយទាហាន នាយទាហានរង និងពលទាហានជាកម្មសិក្សាការីទាំង១៣៥នាក់ នូវអង្ករ គ្រឿងឧបភោគ បរិភោគ ព្រមទាំងថវិកាមួយចំនួន៕
ចែករំលែកព័តមាននេះ