រាជធានីភ្នំពេញ ៖ អគារមួយជ្រុងរបស់រោងចក្រកាត់ដេរធំមួយត្រូវអគ្គីភ័យឆាបឆេះសន្ធោសន្ធៅបង្កឱ្យមានការភ្ញាក់ផ្អើល និងភ័យតក់ស្លុតផងដែរ ពីសំណាក់អ្នកស្នាក់នៅប្រចាំការក្នុងរោងចក្រនេះ ប៉ុន្តែពួកគេបានរត់ចេញប្រសេចប្រសាចប្រកូកប្រកាសឱ្យមានអ្នកជួយធ្វើអន្តរាគមន៍កាលពីវេលាម៉ោង៧និង៥០នាទីយប់ថ្ងៃទី១៦ មីនា ២០១១ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌដង្កោ ។
រោងចក្រដែលឆេះមួយជ្រុងនេះឈ្មោះឃីង ហ្វេស៊ិន ហ្គាមេន ជារោងចក្រកាត់ដេរ មានកម្មកររាប់ពាន់នាក់បម្រើការនៅទីនោះ ហើយអគារដែលឆេះនេះគឺអគារដាក់អុសដើមស្វាយចន្ទី…ជាប់អគារនេះជាអគារផលិតកម្ម (អគារកាត់ដេរតែម្តង) និងអគារស្តុកប្រេងរាប់ពាន់លីត្រ…អ្វី ដែលធ្វើឱ្យគេព្រួយបារម្ភនោះខ្លាចវាឆេះរាលដាលទៅដល់អគារស្តុកប្រេងតែប៉ុណ្ណោះ ព្រោះវានឹងផ្ទុះបន្ថែមចំហេះកាន់តែខ្លាំងថែមទៀត ហើយប្រសិនបើវាចេះមកដល់អគារកាត់ដេរវិញ ការខូចខាតប្រាកដជាកាន់តែធ្ងន់ធ្ងរថែមទៀត ។ ទោះជាយ៉ាងណា ការឆាបឆេះដ៏រន្ធត់នេះមិនបណ្តាលឱ្យមនុស្សណាម្នាក់ស្លាប់ និងរងរបួសទេ ព្រោះកម្មករបានចេញពីធ្វើការអស់រលីង នៅសល់តែបុគ្គលិកចិន និងអ្នកបម្រើការផ្នែករដ្ឋបាលតិចតួចប៉ុណ្ណោះ ពួកគេបានរត់ចេញទៅក្រៅរកកន្លែងសុវត្ថិភាព ។
ព័ត៌មានជំហានដំបូងបានឱ្យដឹងថា មូលហេតុនៃការឆាបឆេះគឺ បណ្តាលមកពីកម្ទេចផ្កាភ្លើងបំពង់ស៊ីម៉ាំងរបស់រោងចក្រដែលធ្លាក់លើដំបូលក្បែរបំពង់ស៊ីម៉ាំងនោះមានចន្លោះប្រហោង រួចហើយចំអុសដើមស្វាយចន្ទីក៏ឆាបឆេះតែម្តង ប៉ុន្តែត្រូវសមត្ថកិច្ចបាញ់ទឹកពន្លត់រហូតដល់ម៉ោង១២យប់ថ្ងៃដដែលទើបភ្លើងអន់ឥទ្ធិពល ៕
ចែករំលែកព័តមាននេះ