រាជធានីភ្នំពេញ ៖ ទឹកប្រាក់ចំនួន១០ម៉ឺនរៀលជាអំណោយរបស់សមាគមនារីនិងអង្ករចំនួន៥០គីឡូក្រាមជាអំណោយរបស់គណបក្សប្រជាជនកម្ពុជាខណ្ឌសែនសុខ ត្រូវបានសមាគមនារីនាំយកទៅជូនស្ដ្រីម្នាក់ដែលកំពុងមានជំងឺរាំរ៉ៃនៅឯផ្ទះក្នុងភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ កាលពីម៉ោង៣និង៣០នាទីរសៀលថ្ងៃទី២០ មីនា ២០១២ ។
អ្នកស្រីឈុន សាម៉េត អាយុ៤៧ឆ្នាំ ជាសមាជិកសមាគមនារីខណ្ឌសែនសុខ ហើយក៏ត្រូវជាភរិយារបស់លោកមេភូមិត្រពាំងស្វាយ បច្ចុប្បន្នកំពុងតែញាំញីដោយជំងឺ គ្រោះក្នុងតម្រង់នោម លើសឈាមនិងជំងឺផ្សេងៗជាច្រើនទៀត ហើយបច្ចុប្បន្នកំពុងសម្រាកព្យាបាលនៅផ្ទះ។ អ្នកស្រីឈុន សាម៉េត បានថ្លែងអំណរគុណចំពោះម្ចាស់អំណោយ ជាពិសេសគណបក្សប្រជាជនកម្ពុជាខណ្ឌសែនសុខ ដែលកន្លងមកតែងតែយកចិត្ដទុកដាក់ដល់សមាជិកដែលជួបទុកលំបាកខ្វះខាតក្នុងជីវភាព។
អ្នកស្រី ឈុន សាម៉េត រួមទាំងក្រុមគ្រួសារមានការត្រេកអរយ៉ាងខ្លាំងនៅពេលដែលបានទទួលអំណោយនេះ ដែលជាការចែករំលែកទុកលំបាកនៃក្រុមគ្រួសាររបស់គាត់បានមួយរយៈពេលផងដែរ ៕
ចែករំលែកព័តមាននេះ