រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន បានប្រាប់ឱ្យដឹងថា នៅក្នុងជំនួបពិភាក្សាការងារជាមួយសម្តេចតេជោនាយករដ្ឋមន្ត្រីនាព្រឹកថ្ងៃទី២៣ ខែមីនា នៅវិមានសន្តិភាពទីស្តីការនាយករដ្ឋមន្ត្រី លោកស្រី Ann Mills Griffthe ប្រធានអង្គការជាតិសម្រាប់គ្រួសារឈ្លើយសឹក និងអ្នកបាត់ខ្លួនអាមេរិក (MIA-POW ) បានសម្តែងនូវអំណរគុណយ៉ាងជ្រាលជ្រៅជាទីបំផុតចំពោះសម្តេចតេជោនាយករដ្ឋមន្ត្រីហ៊ុន សែន រាជរដ្ឋាភិបាលកម្ពុជា ក៏ដូចជាប្រជាជនកម្ពុជាដែលបានគាំទ្រនិងជួយយ៉ាងសកម្មក្នុងការស្វែងរកអដ្ឋិធាតុជនជាតិអាមេរិកនៅកម្ពុជា ។
លោកស្រីបានមានប្រសាសន៍ថា កម្ពុជាត្រូវបានទទួលស្គាល់ថា បានប្រឹងប្រែងដោយមានបទដ្ឋានខ្ពស់ក្នុងការស្វែងរកអដ្ឋិធាតុរបស់ជនជាតិអាមេរិក ហើយសហរដ្ឋអាមេរិកបានទទួលស្គាល់លើបញ្ហានេះ ។ ទន្ទឹមនេះដែរ លោកស្រីសូមវាយតម្លៃខ្ពស់ចំពោះការវិវត្តរបស់ប្រទេសកម្ពុជា ដោយលោកស្រីបានបញ្ជាក់ថា ជំហររបស់លោកស្រីចង់ឱ្យមានការជួបជុំគ្នារវាងភាគី៤ដែលក្នុងនោះមានប្រទេសកម្ពុជា ប្រទេសវៀតណាម ប្រទេសឡាវ និងសហរដ្ឋអាមេរិក ដើម្បីជួយស្វែងរកអដ្ឋិធាតុរបស់ទាហានអាមេរិកដែលបាត់ខ្លួន ។
ពាក់ព័ន្ធនឹងបញ្ហានេះ សម្តេចតេជោនាយករដ្ឋមន្ត្រីបានឆ្លើយតបថា ជំហររបស់កម្ពុជាមិនមានការកែប្រែទេចាប់តាំងពីឆ្នាំ១៩៨៤មកម៉្លេះ កម្ពុជាបានសហការយ៉ាងសកម្មនៅលើបញ្ហានេះតាំងតែពីកម្ពុជានៅជំនាន់នោះនៅមិនទាន់មានទំនាក់ទំនងការទូតជាមួយសហរដ្ឋអាមេរិកឡើងវិញនៅឡើយ ។ ពីរសប្តាហ៍កន្លងទៅនេះ លោកនាយឧត្តមសេនីយ៍ប៉ុល សារឿន បានសរសេរលិខិតស្នើសុំដើម្បីឱ្យសហរដ្ឋអាមេរិកយកឧទ្ធម្ភាគចក្រនិងប្រើប្រាស់ប្រព័ន្ធរលកធាតុអាកាសដើម្បីមកបំពេញការងារមនុស្សធម៌នេះ ។
សម្តេចតេជោនាយករដ្ឋមន្ត្រី ក៏បានយល់ស្របលើបញ្ហានេះហើយជាស្រេច ហើយសម្តេចក៏បានលើកទឹកចិត្តឱ្យភាគីទាំងអស់ កម្ពុជា-សហរដ្ឋអាមេរិក សហការដើម្បីធ្វើយ៉ាងណា ស្វះស្វែងរកប្រភពព័ត៌មានថ្មីថែមទៀត ចៀសវាងកន្លែងខ្លះមិនទាន់ស្វះស្វែងរកដើម្បីធ្វើយ៉ាងណាបំពេញបេសកកម្មមនុស្សធម៌នេះទទួលបានជោគជ័យ ។ សម្តេចក៏បានបញ្ជាក់នូវកង្វល់ ផងដែរ ព្រោះថាបញ្ហានេះបានកើតឡើងយូរណាស់មកហើយ ដូច្នេះសូមធ្វើយ៉ាងណា ធ្វើការងារនេះឱ្យបានឆាប់រហ័ស ព្រោះថា អ្នកដែលស្គាល់ប្រវត្តិ ស្គាល់ដឹងរឿងនេះអាចមានវ័យចំណាស់ណាស់ហើយ ៕
ចែករំលែកព័តមាននេះ