រាជធានីភ្នំពេញ ៖ ប្រជាពលរដ្ឋប្រមាណ៩២០គ្រួសាររស់នៅឃុំភូមិធំ ស្រុកកៀនស្វាយ ខេត្តកណ្តាល កាលពីថ្ងៃទី១៨ មីនា កន្លងទៅនេះ បានទទួលអំណោយពីលោកម៉ក់ ពេជ្ជរិទ្ធ ទីប្រឹក្សាផ្ទាល់សម្តេចតេជោ ហ៊ុន សែន និងជាប្រធានគណៈពង្រឹងមូលដ្ឋានឃុំភូមិធំ នៃគណបក្សប្រជាជនកម្ពុជា ។
មានប្រសសន៍សំណេះសំណាលជាមួយប្រជាពលរដ្ឋនាឱកាសនោះ លោកម៉ក់ ពេជ្ជរិទ្ធ បានលើកឡើងថា ក្រោមការដឹកនាំរបស់សម្តេចទាំងបីដែលជាថ្នាក់ដឹកនាំគណបក្សប្រជាជនកម្ពុជា ប្រជាជនទូទាំងប្រទេសបានរស់នៅក្នុងសន្តិភាព សន្តិសុខ និងមានការអភិវឌ្ឍលើគ្រប់វិស័យ ។ មិនតែប៉ុណ្ណោះជីវភាពប្រជាពលរដ្ឋពីមួយថ្ងៃទៅមួយថ្ងៃមានការរីកចម្រើនធូរធារសម្បូរសប្បាយ និងមានសេរីភាពគ្រប់គ្រាន់ក្នុងការរស់នៅប្រកបមុខរបរ និងការបញ្ចេញមតិ ។
លោកម៉ក់ ពេជ្ជរិទ្ធ មានប្រសាសន៍ថា ពេលមុនក៏ដូចពេលនេះ និងពេលខាងមុខថ្នាក់ដឹកនាំ និងមន្ត្រីគណបក្សប្រជាជនតែងតែយកចិត្តទុកដាក់ដល់ការលំបាករបស់ប្រជាពលរដ្ឋ និងរួមដោះស្រាយរាល់ការលំបាកទាំងនោះ និងមិនឱ្យប្រជាពលរដ្ឋណាម្នាក់ស្លាប់ដោយសារអត់អាហារនោះឡើយ ហើយនេះជាគោលការណ៍ ឬគោលនយោបាយរបស់គណបក្សប្រជាជនកម្ពុជា ។ សំខាន់អនុវត្តតាមអនុសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកម៉ក់ ពេជ្ជរិទ្ធ មានប្រសាសន៍បញ្ជាក់ថា អំណោយដែលយកមកចែកជូននាពេលនេះមានចំនួនតិចតួចក៏ពិតមែន តែជាការបង្ហាញនូវគោលនយោបាយរួមសុខទុក្ខរបស់ថ្នាក់ដឹកនាំគណបក្សប្រជាជនកម្ពុជាជាមួយប្រជាជនកម្ពុជា។ ម្យ៉ាងទៀតក៏ជាការរួមចំណែកយ៉ាងសំខាន់ផងដែរ ក្នុងការចែករំលែកការលំបាករបស់បងប្អូនប្រជាពលរដ្ឋ ។
គួរបញ្ជាក់ថា អំណោយដែលយកទៅចែកជូនប្រជាពលរដ្ឋនាពេលនោះក្នុងមួយគ្រួសារទទួលបានអង្ករ២៥គីឡូក្រាម និងជួយកាត់ខោអាវជូនប្រជាការពារ២៥នាក់ ក្នុងម្នាក់ៗទទួលបានមួយកំប្លេ និងប្រាក់១០ម៉ឺនរៀល ក្នុងមួយខែ ។ ទន្ទឹមនោះលោកម៉ក់ ពេជ្ជរិទ្ធ បានផ្តល់ថវិកាមួយចំនួនជួយព្យាបាលជំងឺដល់ចាស់ជរាដែលទីទ័លក្រគ្មានទីពឹង និងថវិកាមួយចំនួនទៀតជួយជួសជុលផ្លូវលំមួយខ្សែសម្រាប់បម្រើដល់ផលប្រយោជន៍ប្រជាពលរដ្ឋទូទៅក្នុងឃុំផងដែរ៕
ចែករំលែកព័តមាននេះ