ខេត្តក្រចេះ ៖ អំណោយជាសម្ភារប្រើប្រាស់របស់រាជរដ្ឋាភិបាលកម្ពុជា និងសប្បុរសជនត្រូវបានយកមកប្រគល់ជូនដល់អតីតកងកម្លាំងប្រដាប់អាវុធ និងគ្រួសារចូលនិវត្តន៍ចំនួន៥៨គ្រួសារនៅឃុំស្វាយជ្រះ ស្រុកស្នួល ខេត្តក្រចេះ កាលពីព្រឹកថ្ងៃទី១៩ មីនា ២០១២ តាមរយៈលោកទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ដោយមានការចូលរួមពីលោកខាំ ភឿន អភិបាលខេត្តក្រចេះ ស្ថាប័ន និងមន្ត្រីពាក់ព័ន្ធក្នុងខេត្ត។
មានប្រសាសន៍ក្នុងពិធីចែកសម្ភារប្រើប្រាស់ក្នុងលំនៅឋាន និងសម្ភារកសិកម្មលោកទេសរដ្ឋមន្ត្រី អ៊ឹម ឈុនលឹម បានអំពាវនាវឱ្យអតីតកងកម្លាំងប្រដាប់អាវុធ និងគ្រួសារចូលនិវត្តន៍ដែលបានមកតាំងពីលំនៅថ្មីលើដីសម្បទានសង្គមកិច្ចដែលរាជរដ្ឋាភិបាលប្រគល់ជូនស្ថិតក្នុងឃុំស្វាយជ្រះ នេះ មករស់នៅឱ្យបានគ្រប់ៗគ្នា និងធ្វើការបង្កបង្កើនផលឱ្យបានសកម្ម ។ លោកទេសរដ្ឋមន្ត្រីបានបន្តថា កាលពីថ្ងៃទី២០ ធ្នូ ២០១១ កន្លងទៅ អាជ្ញាធរបានធ្វើពិធីចាប់ឆ្នោតមុខសញ្ញាអ្នកទទួលដីចំនួន៣៥៥គ្រួសារ ក្នុងនោះមកពីក្រសួងការពារជាតិចំនួន២០៥គ្រួសារ ក្រសួងមហាផ្ទៃចំនួន៩១គ្រួសារ ។ រហូតមកដល់បច្ចុប្បន្ននេះគ្រួសារដែលបានដីឡូត៍លំនៅឋាន ដីឡូត៍កសិកមក្ម និងផ្ទះបានស្នាក់នៅអចិន្ត្រៃយ៍ចំនួន៥៨គ្រួសារ ។
លោកម៉ាន់ សុផាត នាយកគម្រោងសម្បទានដីសង្គមកិច្ចបានបញ្ជាក់ថា លើការធ្វើគម្រោងលំនៅឋានរបស់អតីតយុទ្ធជនចូលនិវត្តន៍នេះ គឺក្រុមការងារមានការយឺតយ៉ាវបន្តិចលើការសាងសង់ផ្ទះ ខណៈពេលដែលជួបបញ្ហាខ្វះខាតឈើសម្រាប់យកមកធ្វើឱ្យទាន់ពេលវេលា ។ លោកប្រធានគម្រោងបានបញ្ជាក់ថា ចំពោះដីកសិកម្មកន្លងមកក្រុមការងារបានចុះបោះបង្គោលជូនដល់ពួកគាត់ហើយប៉ុន្តែខ្លះគាត់មិនបានទៅមើល បែរជាថា ដីរបស់គាត់មិនទាន់ធ្វើការឈូសឆាយនៅឡើយ៕
ចែករំលែកព័តមាននេះ