ខេត្តកំពង់ឆ្នាំង៖ កាលពីព្រឹកថ្ងៃទី១៦ មីនា មានអំណោយជាបន្តបន្ទាប់ទៅផ្តល់ជូនលោកយានអ៊ុន ស៊ីឆាត អាយុ៦៩ឆ្នាំ មានទីលំនៅភូមិម៉ុងបារាំង សង្កាត់ប្អេរ ដែលកំពុងជួបការខ្វះខាតចិញ្ចឹមចៅស្រីកំព្រាបីនាក់ ដែលឪពុកម្តាយបោះបង់ចោល ហើយថ្មីៗនេះ ចៅស្រីច្បង អាយុ១១ឆ្នាំ បានធ្លាក់ពីលើដើមស្វាយចន្ទីបណ្តាលឱ្យបាក់
ខេត្តកំពង់ឆ្នាំង៖ កាលពីព្រឹកថ្ងៃទី១៦ មីនា មានអំណោយជាបន្តបន្ទាប់ទៅផ្តល់ជូនលោកយានអ៊ុន ស៊ីឆាត អាយុ៦៩ឆ្នាំ មានទីលំនៅភូមិម៉ុងបារាំង សង្កាត់ប្អេរ ដែលកំពុងជួបការខ្វះខាតចិញ្ចឹមចៅស្រីកំព្រាបីនាក់ ដែលឪពុកម្តាយបោះបង់ចោល ហើយថ្មីៗនេះ ចៅស្រីច្បង អាយុ១១ឆ្នាំ បានធ្លាក់ពីលើដើមស្វាយចន្ទីបណ្តាលឱ្យបាក់ដៃទាំងសងខាង ។
ចូលរួមផ្តល់អំណោយនៅថ្ងៃនោះ មានពីរឈុត គឺនៅម៉ោង៩និង៣០នាទីព្រឹកមានលោកសិដ្ឋ សុខរិន ចៅសង្កាត់ប្អេរ រួមជាមួយជំទប់ មេភូមិ មេប៉ុស្តិ៍ បាននាំថវិកាចំនួន៤០ម៉ឺនរៀល ជាអំណោយរបស់លោកញ៉ែម សុធន់ ទីប្រឹក្សាគម្រោងមូលនិធិសហប្រជាជាតិសម្រាប់ប្រជាជន ហៅកាត់ (UNFPA) ផ្តល់ជូនគ្រួសារ កុមារកំព្រាខាងលើតាមរយៈលោកគង់ សុវណ្ណអស្ចារ្យ នាយករងទីចាត់ការផែនការ និងវិនិយោគនៃសាលាខេត្តកំពង់ឆ្នាំង ។ ឆ្លៀតឱកាសនោះលោកសិដ្ឋ សុខរិន ក៏បានបន្ថែមថវិកាផ្ទាល់ខ្លួនចំនួន៤ម៉ឺនរៀលផងដែរដល់គ្រួសារខាងលើ ។
បន្ទាប់មកនៅវេលាម៉ោង១១ព្រឹក សមាសភាពដដែលគឺលោកចៅសង្កាត់ លោកជំទប់ លោកមេប៉ុស្តិ៍ បានចូលរួមផ្តល់អំណោយជាថវិកាចំនួន២០០ដុល្លារអាមេរិកដល់គ្រួសារកុមារកំព្រាខាងលើដែរ ដែលថវិកានេះ គឺជាអំណោយដ៏ថ្លៃថ្លារបស់លោកបណ្ឌិតអ៊ុក រ៉ាប៊ុន និងលោកជំទាវ ព្រមទាំងលោកឧកញ៉ាស្រី ងួន និងលោកជំទាវឧកញ៉ាស្រី វុទ្ធី ផ្តល់ជូនតាមរយៈសារព័ត៌មានកោះសន្តិភាព ។ ជាមួយគ្នានោះផងដែរ ទឹកប្រាក់ចំនួន១២៤.០០០រៀល ទៀត បានមកពីសប្បុរសជនមានលោកស៊ូ សំណាង អនុប្រធានសន្តិសុខសណ្ឋាគារភ្នំពេញ ព្រមទាំងសន្តិសុខសណ្ឋាគារនេះមួយចំនួនទៀត និងទឹកប្រាក់៥ដុល្លារ បានមកពីលោកកែវ ជា ត្រូវបាននាំទៅប្រគល់ជូលដល់ដៃគ្រួសារកុមារកំព្រានោះផងដែរ ។
ក្រោយពីបានទទួលអំណោយដ៏ថ្លៃថ្លារបស់សប្បុរសជនជាបន្តបន្ទាប់មក លោកយាយអ៊ុន ស៊ីឆាត មានសេចក្តីរំភើបរីករាយក្រៃលែង និយាយថ្លែងអំណរគុណទាំងទឹកភ្នែកថា លោកយាយមិនធ្លាប់ស្គាល់ប្រាក់ច្រើនរបៀបនេះពីមុនមកទេ លោកយាយសូមអរគុណយ៉ាងជ្រាលជ្រៅដល់សប្បុរសជនទាំងអស់ និងសូមបួងសួងដល់វត្ថុស័ក្តិសិទ្ធិក្នុងលោក សូមជួយបីបាច់ថែរក្សាដល់លោកបណ្ឌិត និងលោកជំទាវ លោកឧកញ៉ា និងលោកជំទាវឧកញ៉ា ព្រមទាំងសប្បុរសជនទាំងអស់ សូមជួបតែសេចក្តីសុខគ្រប់ប្រការ និងរកស៊ីមានបានកុំបីឃ្លៀងឃ្លាតឡើយ ។
គួររំលឹកថា កុមារីបងឈ្មោះអ៊ុន ស្រីស្រស់ អាយុ១១ឆ្នាំ បានធ្លាក់ពីលើដើមស្វាយចន្ទី ខណៈឡើងបេះផ្លែឱ្យជីដូនចងលក់ដូរអង្ករ ។ កុមារីភ្លោះជាប្អូន២នាក់ ម្នាក់ឈ្មោះអ៊ុន កញ្ញា និងម្នាក់ទៀតអ៊ុន រតនា អាយុ៥ឆ្នាំ ។ ៣នាក់បងប្អូនត្រូវបានឪពុកម្តាយបោះបង់ចោលទុកឱ្យជីដូនអាយុ៦៩ឆ្នាំ មើលថែរក្សា ៕
ចែករំលែកព័តមាននេះ