រាជធានីភ្នំពេញ ៖ គណៈកម្មាធិការអនុសាខា កាកបាទក្រហមកម្ពុជា ខណ្ឌឫស្សីកែវកាលពីរសៀលថ្ងៃទី១៦ មីនា បាននាំអំណោយជាគ្រឿងឧបភោគបរិភោគ សម្ភារ ប្រើប្រាស់ និងថវិកាមួយចំនួន ឧបត្ថម្ភដល់គ្រួសារក្រីក្រគ្មានទីពឹង និងផ្ទុករោគចំនួន៥គ្រួសារនៅសង្កាត់ច្រាំងចំរេះទី១ ឫស្សីកែវ។ ការនាំអំណោយចែកជូនក្នុងឱកាសនោះដឹកនាំដោយលោកជា ពិសី ប្រធានគណៈកម្មាធិការអនុសាខាកាកបាទក្រហម ខណ្ឌឫស្សីកែវ និងជាអភិបាលរងខណ្ឌ ព្រមទាំងលោកស្រី កែវ ច័ន្ទ ស៊ុនណារី អនុប្រធានគណៈកម្មាធិការអនុសាខាកាកបាទក្រហម ខណ្ឌឫស្សីកែវ។
អំណោយដែលនាំទៅចែកជួនក្នុងឱកាសនោះក្នុងមួយគ្រួសារទទួលបានអង្ករ២០គីឡូក្រាម មីចំនួន២កេស ធុងទឹកកក១ ចានស្រាក់១ កាធុន១ ត្រីខ៥កំប៉ុង ទឹកត្រី១យួរ ទឹកស៊ីអ៊ីវ១ យួរចានបាយ១ កំសៀវ១ ឆ្នាំង១ ចង្អើរ១ ដង្កៀបចាប់ ភ្លើង១ ជ្រុញ១ វែក២ ខ្ទះ១ ស្កសរ១គីឡូក្រាម តែ២កញ្ចប់ និងថវិកា១០ម៉ឺនរៀល។ លោកជា ពិសី ប្រធានគណៈកម្មាធិការអនុសាខាកាកបាទក្រហម ខណ្ឌឫស្សីកែវ បានពាំនាំនូវប្រសាសន៍ផ្តាំផ្ញើការសួរសុខទុក្ខពីសំណាក់លោកជំទាវកិត្តិព្រឹទ្ធិ បណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចសាខាកាកបាទក្រហមរាជធានីភ្នំពេញ ដែលជានិច្ចកាលលោកជំទាវតែងយកចិត្តទុកដាក់ចំពោះប្រជារាស្ត្រងាយរងគ្រោះ ឬគ្រោះថ្នាក់ផ្សេងៗ និងប្រជារាស្រ្តទូទាំងប្រទេស។ ដោយការយកចិត្តទុកដាក់លោកជំទាវបានណែនាំដល់មន្ត្រីកាកបាទក្រហមឱ្យតាមចុះមូលដ្ឋាន ដើម្បីសួរសុខទុក្ខ និងនាំអំណោយចែកជូនដល់ប្រជាពលរដ្ឋដល់មូលដ្ឋាន។ លោកជា ពិសី បានបន្តទៀតថា អំណោយទាំងនេះវាតិចតួចណាស់ តែវាអាចជួយសម្រួលដល់ការលំបាកបានមួយគ្រាដែរ ម្យ៉ាងទៀតវាបានបញ្ជាក់ពីការយកចិត្តទុកដាក់ពីថ្នាក់ដឹកនាំចំពោះបងប្អូនដែលជួបការលំបាក។
លោកជា ពិសី ក៏បានណែនាំបងប្អូន ក្រីក្រ ឬអ្នកផ្ទុកមេរោគ កុំឱ្យអស់សង្ឃឹមក្នុងជីវិត និងលេបថ្នាំពន្យាឱ្យបានទៀងទាត់ ព្រោះយើងនៅមានសម្តេចតេជោ និងលោកជំទាវកិត្តិព្រឹទ្ធិបណ្ឌិតដែលតែងតែគិតគូរ និងយកចិត្តដាក់ចំពោះបងប្អូនជានិច្ច ៕
ចែករំលែកព័តមាននេះ