រាជធានីភ្នំពេញ ៖ ប្រជាពលរដ្ឋក្រីក្រចំនួន៣០០គ្រួសារមកពីសង្កាត់ចំនួន១៣របស់ខណ្ឌពោធិ៍សែនជ័យ បានទទួលអំណោយពីអាជ្ញាធរខណ្ឌដែលបាននាំយកទៅចែកជូនជាការជួយរំលែកទុក្ខលំបាក និងការខ្វះខាតមួយគ្រា។ ពិធីប្រគល់អំណោយនោះបានធ្វើឡើងកាលពីវេលាម៉ោង៨ព្រឹកថ្ងៃទី១៥ មីនា ២០១២ នៅក្នុងបរិវេណវត្តតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ ក្រោមការដឹកនាំដោយលោកគិត សុផា អភិបាលខណ្ឌ និងមានការអញ្ជើញចូលរួមពីសំណាក់លោកសេង គន្ធ លោកហែម ដារិទ្ធិ អភិបាលរងខណ្ឌ ព្រមទាំងមន្ត្រីក្រោមឱវាទជាច្រើនរូបទៀត ។
អំណោយដែលនាំយកទៅចែកជូនប្រជាពលរដ្ឋចំនួន៣០០គ្រួសារ មកពីតាមបណ្តាភូមិនានាក្នុងសង្កាត់ទាំង១៣របស់ខណ្ឌពោធិ៍សែនជ័យ ក្នុងនោះមានសង្កាត់ចោមចៅ កាកាប កន្ទោក កំបូល បឹងធំ ភ្លើងឆេះរទេះ ស្នោរ ឪឡោក ពន្សាំង ក្រាំងធ្នង់ គោករកា សំរោងក្រោម និងត្រពាំងក្រសាំង ដែលក្នុងមួយគ្រួសារទទួលបានអង្ករចំនួន២៥គីឡូក្រាម និងមី៦កញ្ចប់ ។
លោកគិត សុផា បានថ្លែងឱ្យដឹងថា នេះគឺជាអំណោយតិចតួចប៉ុណ្ណោះ ប៉ុន្តែគឺជាទឹកចិត្តរបស់អាជ្ញាធរក្រោមការណែនាំ របស់ថ្នាក់ដឹកនាំហើយក៏ជាវប្បធម៌ចែករំលែកមួយផងដែរ ៕
ចែករំលែកព័តមាននេះ