រាជធានីភ្នំពេញ ៖ សប្បុរសជនចំនួន៣រូបរួមមាន លោកជំទាវឧកញ៉ាយីន ផាន្នី លោកជំទាវភាព ហៀក អគ្គនាយិកាក្រុមហ៊ុនជីបម៉ុងគ្រុប និងលោកជំទាវនឹម ថូត ប្រធានកិត្តិយសអង្គការផ្ទះបាយកុមារ កាលពីព្រឹកថ្ងៃទី១៣ មីនា បាននាំយកអំណោយជាសម្ភារសិក្សា សម្លៀកបំពាក់ គ្រឿងឧបភោគបរិភោគ និងថវិកា ទៅជួយដល់អង្គការផ្ទះបាយកុមារ សម្រាប់ជួយផ្គត់ផ្គង់ដល់ការទ្រទ្រង់ម្ហូបអាហារនិងចូលរួមលើកកម្ពស់ក្នុងន័យមនុស្សធម៌ដល់អង្គការផ្ទះបាយកុមារដែលកំពុងជួបការខ្វះខាត។ អង្គការនេះ មានទីតាំងស្ថិតនៅផ្ទះលេខ២៦ ផ្លូវលេខ៤៥៤ សង្កាត់ទួលទំពូងទី១ ខណ្ឌចំការមន។
លោកងូវ យីវ អតីតនាយកសាលាបឋមសិក្សាជ័យជំនះ និងជានាយកអង្គការផ្ទះបាយ កុមារ បានមានប្រសាសន៍ជម្រាបជូនប្រតិភូសប្បុរសជនទាំង៣រូបខាងលើ ក៏ដូចជាមាតា បិតាកុមារតូចៗដែលបានមកទទួលអាហារនិងអំណោយពីសប្បុរសជន អំពីប្រវត្តិនៃការកើតអង្គការផ្ទះបាយកុមារ និងទិសដៅដែលបានបង្កើតឡើងនូវឈ្មោះអង្គការផ្ទះបាយកុមារ គឺក្នុងគោលបំណងចូលរួមផ្តល់អាហារដល់កុមារក្រីក្រពីគ្រប់ទិសទីនៅក្នុងរាជធានីភ្នំពញ ។ គិតចាប់តាំងពីថ្ងៃទី១ ខែកុម្ភៈ ឆ្នាំ២០១០ ដល់ថ្ងៃទី១២ មីនា ឆ្នាំ២០១២ ឃើញថា មានកុមារចំនួន៩០.៥៣៤នាក់ហើយដែលបានមកទទួលអាហារពីអង្គការផ្ទះបាយកុមារ ។ ចំពោះសកម្មភាពនេះ អង្គការបន្តយកចិត្តទុកដាក់បង្កើតចលនារបស់អង្គការឆ្ពោះទៅមុខថែមទៀត ដើម្បីចូលរួមផ្គត់ផ្គង់ជីវភាពកុមារក្រីក្រ ។
លោកងូវ យីវ បានមានប្រសាសន៍បន្តថា សកម្មភាពរបស់អង្គការដំណើរការទៅបានគឺអាស្រ័យដោយមានការចូលរួមគាំទ្រពីសប្បុរសជននានា ហើយសកម្មភាពនេះរូបលោកផ្ទាល់ជាតំណាងឱ្យអង្គការមូលដ្ឋាន សូមថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តសប្បុរសជនក៏ដូចជាវត្តមានដ៏ខ្ពង់ខ្ពស់របស់លោកជំទាវទាំង៣រូប ដែលបានមកពិនិត្យដោយផ្ទាល់ដល់ទីស្នាក់ការអង្គការនិងនាំមកនូវអំណោយឧបត្ថម្ភដល់អង្គការផ្ទះបាយកុមារ ។
យោងតាមរបាយការណ៍របស់អង្គការផ្ទះបាយកុមារឱ្យដឹងថា សប្បុរសជនែដលបានចូលរួមឧបត្ថម្ភដល់អង្គការផ្ទះបាយកុមារជាមួយលោកជំទាវ៣រូបខាងលើគឺមាន លោកជំទាវហម ស៊ីនួន និងលោកជំទាវសៀក សុផល និងស្វាមីផងដែរ ។ របាយការណ៍ដដែលបញ្ជាក់ថា អំណោយដែលបាននាំយកមកចែកជូនដល់អង្គការផ្ទះបាយកុមារក្នុងឱកាសនេះមានថវិកាសម្រាប់ផ្គត់ផ្គង់ដល់អង្គការទាំងមូលចំនួន៣១០ដុល្លារ ទឹកដោះគោកំប៉ុងធំមួយកេស ផ្លែប៉ោម២កេស នំកុមារ២កេស ខោអាវនិងតុក្កតាមួយចំនួនធំ សម្លៀកបំពាក់កុមារ និងសម្ភារសិក្សា រួមទាំងថវិកាសម្រាប់ចែកជូនកុមារចំនួន២៥០នាក់ ក្នុងម្នាក់ៗទទួលបាន១ម៉ឺនរៀល ។ ក្រៅពីនេះ ក៏មានការចែកជូនថវិកាដល់លោកគ្រូអ្នកគ្រូនិងចុងភៅនៅក្នុងអង្គការនូវថវិការួមចំនួន៥០ម៉ឺនរៀលបន្ថែមទៀត ។
លោកជំទាវយីន ផាន្នី បានមានប្រសាសន៍ផ្តាំផ្ញើដល់ក្មួយៗកុមារទាំងអស់ ត្រូវខិតខំរៀនសូត្រហាត់ពត់លត់ដំខ្លួនឱ្យក្លាយជាកុមារល្អ និងផ្តាំផ្ញើដល់មាតាបិតា កុមារតូចៗត្រូវខិតខំប្រឹងប្រែងរស់នៅប្រកបការងារចិញ្ចឹមថែទាំកូនចៅកុំអស់សង្ឃឹមក្នុងជីវិត ។ លោកជំទាវយីន ផាន្នី ក៏បានកោតសរសើរដល់សកម្មភាពដឹកនាំរបស់លោកងូវ យីវ នាយកអង្គការ ដែលជាមន្ត្រីចូលនិវត្តន៍ហើយលោកនៅមានទឹកចិត្តចូលរួមចំណែកក្នុងសកម្មភាពមនុស្សធម៌ តាមរយៈការខិតខំចងក្រងជាសមាគម អង្គការដូចជា អង្គការផ្ទះបាយកុមារនេះជាដើម ។
លោកជំទាវភាព ហៀក អគ្គនាយិកាក្រុមហ៊ុនជីបម៉ុងគ្រុប បានមានប្រសាសន៍បន្ថែមថា ក្មួយៗកុមារទាំងអស់ក៏ដូចជាមាតាបិតាកុមារតូចៗទាំងអស់ដែរ សូមកុំអស់សង្ឃឹមក្នុងជីវិត ព្រោះជីវិតគឺជាការតស៊ូ ។ លោកជំទាវក៏បានលើកជាឧទាហរណ៍អំពីដំណើរជីវិតរបស់លោកជំទាវទម្រាំបានដូចសព្វថ្ងៃ គឺឆ្លងកាត់ការពុះពារតស៊ូក្នុងជីវិតរស់នៅខ្លាំងណាស់ ទើបបានជោគជ័យដូចសព្វថ្ងៃនេះ ។ ក្នុងឱកាសនោះដែរ លោកជំទាវក៏បានសន្យាបន្តជួយជ្រោមជ្រែងដល់អង្គការផ្ទះបាយកុមារទៀត ។ ចំណែកឯលោកជំទាវនឹម ថូត ក៏បានមានប្រសាសន៍ចូលរួមជំរុញដល់ក្មួយៗកុមារទាំងអស់ឱ្យខិតខំរៀនសូត្រនិងប្តេជ្ញាចិត្តរៀនឱ្យបានពូកែ ។
នៅចុងបញ្ចប់នៃកម្មវិធី លោកងូវ យីវ បានអញ្ជើញលោកជំទាវទាំង៣រូប ពិនិត្យសកម្មភាពចម្អិនម្ហូបអាហារសម្រាប់ចែកជូនកុមារស្រស់ស្រូបដែលមានទាំងភេសជ្ជៈផងដែរ ៕
ចែករំលែកព័តមាននេះ