ខេត្តកំពង់ធំ ៖ ជនល្មោភកាមម្នាក់ត្រូវបាននគរបាលស្រុកសន្ទុក ព័ទ្ធចាប់ខ្លួន កាលពីថ្ងៃទី១ មីនា បន្ទាប់ពីជននេះចាប់រំលោភក្មេងស្រីអាយុ៦ឆ្នាំ កាលពីវេលាម៉ោង១០និង៣០នាទីយប់ ថ្ងៃទី២៨ កុម្ភៈ នៅឃុំប្រាសាទ ស្រុកសន្ទុក។
ទាក់ទិននឹងការឃាត់ខ្លួនជនខាងលើនេះ មន្ត្រីនគរបាលស្រុកសន្ទុកបានឱ្យដឹងថា កាលពីវេលាម៉ោង១០និង៣០នាទីយប់ថ្ងៃទី២៨ កុម្ភៈ នៅក្នុងឃុំប្រាសាទ មានកម្មវិធីរាំធុងបាស់មង្គលការមួយ ឆ្លៀតក្នុងឱកាសនោះជនឈ្មោះជូ សេង អាយុ៣៧ឆ្នាំ មានទីលំនៅក្នុងឃុំកើតហេតុបានធ្វើសកម្មភាពចាប់កុមារីអាយុ៦ឆ្នាំ ដែលនៅផ្ទះទល់មុខគ្នាយកទៅរំលោភរហូតបានសម្រេច។ លុះព្រឹកឡើងថ្ងៃទី១ មីនា ទើបម្ដាយក្មេងស្រីរងគ្រោះរាយការណ៍ប្រាប់សមត្ថកិច្ច ឱ្យចាប់ឃាត់ខ្លួនជនរូបនោះតែម្ដង ។
តាមការបញ្ជាក់របស់ក្មេងស្រីរងគ្រោះ និងសាក្សីបានប្រាប់សមត្ថកិច្ចថា មុនពេលកើតហេតុម្ដាយក្មេងស្រីរងគ្រោះខាងលើបាននាំកូនទៅមើលគេរាំរហូតដល់ម៉ោង១០យប់ក្មេងស្រីរងគ្រោះក៏បានដើរទៅផ្ទះមុនម្ដាយជាមួយក្មេងស្រីម្នាក់ទៀត។ លុះដើរបានចំងាយប្រហែល១៥០ម៉ែត្រ ក៏បានជួបជាមួយឈ្មោះជូ សេង ដែលដើរចេញពីផ្ទះការក្នុងសភាពស្រវឹងស្រា។ពេលនោះជននេះបានដើរមកអូសដៃក្មេងស្រីរងគ្រោះយកទៅរំលោភរហូតបានសំរេច ហើយក្មេងស្រីរងគ្រោះក៏បានប្រាប់ម្ដាយឱ្យប្ដឹងប៉ូលិសតែម្ដង ។
នៅចំពោះមុខសមត្ថកិច្ច ជនកំហូចខាងលើនេះ ពុំព្រមសារភាពភ្លាមទេ រហូតដល់ពេលបញ្ជូនខ្លួនទៅសាលាដំបូងខេត្តនៅព្រឹកថ្ងៃទី២ មីនា ទើបគេព្រមសារភាពពីទង្វើលាមករបស់ខ្លួន។ សូមបញ្ជាក់ថា អំពើចាប់រំលោភសេពសន្ថវៈមានការកើនឡើងគួរឱ្យព្រួយបារម្ភបំផុតសំរាប់ខេត្តកំពង់ធំ ក្នុងរយៈពេលចុងក្រោយនេះរាល់អំពើរំលោភសេពសន្ថវៈប្រមាណជា៨០%ត្រូវបានគេកត់សំគាល់ឃើញថា បង្កឡើងដោយជនស្រវឹងស្រា៕
ចែករំលែកព័តមាននេះ