រាជធានីភ្នំពេញ ៖ សម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជគណៈមហានិកាយនៃព្រះរាជាណាចក្រកម្ពុជា កាលពីថ្ងៃទី៦ ខែមីនា ឆ្នាំ២០១២ បាននាំអំណោយជាថវិកាមួយចំនួនទៅប្រគល់ជូនដល់នាយកសាលាបឋមសិក្សាព្រះនរោត្តម ស្ថិតនៅក្នុងខណ្ឌដូនពេញ រាជធានីភ្នំពេញ ដើម្បីចាត់ចែងប្រើប្រាស់ក្នុងការសាងសង់របងសាលា ដែលកំពុងទទួលរងការខូចខាត ។ ថវិកាដែលនាំយកមកផ្តល់ជូនសាលាបឋមសិក្សាព្រះនរោត្តមនាឱកាសនោះរួមមាន ថវិការបស់លោកជំទាវឧកញ៉ា ឈាង គឹមស៊ុន ចំនួន១.០០០ដុល្លារ , លោក មាស ខេង និងលោកស្រី មួរ វួច ចំនួន៥០០ដុល្លារ រួមទាំងថវិកាផ្ទាល់របស់ព្រះអង្គ ចំនួន ១.០០០ដុល្លារ និង៤លានរៀល ។
សម្តេចព្រះអគ្គមហាសង្ឃរាជ ទេព វង្ស មានព្រះរាជបន្ទូលថា អំណោយដែលយកមកផ្តល់ជូននាពេលនេះមានចំនួនតិចតួចក៏ពិតមែន ប៉ុន្តែវាបានបង្ហាញឱ្យឃើញនូវទឹកចិត្តសប្បុរសរបស់លោកជំទាវឧកញ៉ា និងសប្បុរសជនចូល រួមចែករំលែកនូវរាល់ការលំបាករបស់សាលា ។
សម្តេចព្រះអគ្គមហាសង្ឃរាជ បានផ្តល់ដំបូន្មានដល់សិស្សានុសិស្សទាំងអស់នាឱកាសនោះថា ត្រូវខិតខំរៀនសូត្រឧស្សាហ៍ព្យាយាម គោរពតាមការអប់រំណែនាំរបស់លោកគ្រូ-អ្នកគ្រូ និងរក្សាឱ្យបាននូវសីលធម៌ថ្លៃថ្នូរ ស្តាប់បង្គាប់ឪពុកម្តាយ និងចៀសឱ្យផុតពីគ្រឿងញៀន និងអំពើអបាយមុខផ្សេងៗ ដើម្បីស្វែងរកនូវអនាគតរុងរឿងទាំងអស់គ្នា ។
លោកនាយកសាលាបឋមសិក្សាព្រះនរោត្តម បានថ្លែងអំណរគុណយ៉ាងជ្រាលជ្រៅចំពោះសម្តេចព្រះអគ្គមហាសង្ឃរាជ ទេព វង្ស ដែលបាននាំយកអំណោយមកផ្តល់ជូនសាលានាឱកាសនេះក្នុងពេលដែលសាលាកំពុងជួបការលំបាក ។ លោកនាយកបានថ្វាយព្រះពរសព្ទសាធុការដល់សម្តេចព្រះអគ្គមហាសង្ឃរាជ និងជូនពរដល់សប្បុរសជនទាំងអស់សូមជួបប្រទះតែសេចក្តីសុខជារៀងរហូត ៕
ចែករំលែកព័តមាននេះ