អ្នកការទូតនានានិយាយថា ក្រុមប្រឹក្សាសន្តិសុខអង្គការសហប្រជាជាតិគ្រោងបើកកិច្ចប្រជុំមួយស្តីអំពីស្ថានការណ៍បច្ចុប្បន្ននៅប្រទេសលីប៊ី ដោយកិច្ចប្រជុំនេះនឹងរៀបចំឡើងនៅថ្ងៃទី២៤ មីនា ខាងមុខនេះ ។ សេចក្តីសម្រេចចិត្តពីការបើកកិច្ចប្រជុំនេះធ្វើឡើងដោយក្រុមប្រឹក្សាសន្តិសុខ ដែលមានប្រទេស១៥ជាសមាជិក នៅពេលបញ្ចប់កិច្ចប្រជុំសម្ងាត់បិទទ្វារមួយ ។
តាមប្រភពព័ត៌មានថា អគ្គលេខាធិការអង្គការសហប្រជាជាតិលោកបាន គីមូន ដែលកំពុងបំពេញទស្សនកិច្ចនៅប្រទេសអេហ្ស៊ីប និងប្រទេសទុយនីស៊ី ត្រូវបានគេរំពឹងថា នឹងចូលរួមកិច្ចប្រជុំនោះដែរ ។ កិច្ចប្រជុំនោះរបស់ក្រុមប្រឹក្សាសន្តិសុខត្រូវធ្វើឡើងតបតាមសំណើរបស់រដ្ឋាភិបាលលីប៊ីដឹកនាំដោយលោកមូអាម៉ា កាដាហ្វី ។ មុននេះរដ្ឋមន្ត្រីការបរទេសលីប៊ី លោក Musa Kousa បានផ្ញើលិខិតមួយច្បាប់ជូនក្រុមប្រឹក្សាសន្តិសុខ អ.ស.ប អំពាវនាវឱ្យបើកកិច្ចប្រជុំបន្ទាន់មួយស្តីអំពីស្ថានការណ៍បច្ចុប្បន្នរបស់លីប៊ី ៕
ចែករំលែកព័តមាននេះ