រាជធានីភ្នំពេញ ៖ ជិត១សប្តាហ៍មកហើយដែលឈុតវីដេអូឃ្លីបមួយមានថិរវេលាប្រមាណជាង២នាទីត្រូវបានគេចម្លងតៗគ្នាពីទូរស័ព្ទដៃមួយទៅទូរស័ព្ទដៃមួយទៀត ឬនិយាយតាមភាសាបច្ចេកទេសថា«បាញ់ប៊្លូធូ»តាមរយៈទូរស័ព្ទទំនើប ។ ឈុតវីដេអូឃ្លីបនេះ បានបង្កឱ្យមានការខឹងសម្បាយ៉ាងខ្លាំងក្នុងស្រទាប់ប្រជាពលរដ្ឋសំរាប់អ្នកដែលបានឃើញរូបភាពក្នុងឈុតវីដេអូនេះ ដែលនោះគឺការប្រើអំពើហិង្សាពីសំណាក់ស្ត្រីម្នាក់វាយទាត់ធាក់លើក្មេងស្រីតូចដែលមានអាយុក្រោម៣ឆ្នាំ ។ ការវាយដំនោះ ជាភាពអមនុស្សធម៌បំផុត ដែលទទួលនូវការថ្កោលទោសដោយសារតែស្ត្រីនោះហាក់បីដូចជាមនុស្សឆ្កួត ឬមនុស្សឡប់សតិដែលធ្វើបាបក្មេងស្រីតូចនោះគ្មានក្តីមេត្តាបន្តិចណាសោះឡើយ មិនមែនត្រឹមតែទាត់ឱ្យដួលប្រកាច់ប្រកិនប៉ុណ្ណោះទេ ថែមទាំងហក់ទៅទន្ទ្រាំពីលើថែមទៀត ក្រោមសំរែកក្មេងស្រីដែលឈឺចុកចាប់ និងគ្មានអ្នកណាម្នាក់មកជួយនាងតូចនោះបាន ។
តើរូបភាពនេះចេញពីប្រភពណា? នេះជាសំណួរដែលកោះសន្តិភាពបានស្វែងរកតាមការផ្តល់ព័ត៌មានដែលមិនច្បាស់ការណ៍នានា ដោយសារតែការនិយាយតៗគ្នាគ្មានមូលដ្ឋានច្បាស់លាស់ ។ ព័ត៌មានដំបូងបាននិយាយថា ស្ត្រីដែលបង្កអំពើហិង្សាគួរឱ្យស្អប់ខ្ពើមនេះ គឺជាអ្នកស៊ីឈ្នួលមើលកូនឱ្យគេនៅក្នុងសង្កាត់ផ្សារដេប៉ូ ។ តាមពិតការអះអាងពីប្រភពនេះមិនបានបញ្ជាក់ច្បាស់ទេ ព្រោះក្នុងខណ្ឌទួលគោក រាជធានីភ្នំពេញ មានសង្កាត់ផ្សារដេប៉ូទី១ ទី២ និងទី៣ ។ ប្រភពនោះនិយាយអះអាងទៀតថា អ្នកផ្សារដេប៉ូមានកំហឹងខ្លាំងណាស់ កាលបើឃើញរូបនេះ ហើយនិយាយថា ឪពុកក្មេងស្រីក្តៅក្រហាយ នឹងស្ត្រីបំរើនោះខ្លាំងពេក មុនចាប់ខ្លួនឱ្យប៉ូលិសបានទាត់ស្ត្រីចិត្តខ្មៅនោះបាក់ឆ្អឹងជំនីរថែមទៀត ។ យោងតាមប្រភពនេះបានបន្ថែមថា បានជាមានការថតបានរូបភាពស្ត្រីបំរើវាយកូនម្ចាស់ផ្ទះនេះ ដោយសារឪពុកម្តាយចេះតែឆ្ងល់ថា ហេតុអ្វីបានជាកូនស្រីរបស់ខ្លួនមានស្នាមជាំពេញខ្លួនបែបនេះ ។ ប្រភពព័ត៌មានខាងលើនេះ មិនសមទំនងនោះទេ ដោយសារតែឪពុកម្តាយគ្រប់រូបអាចនឹងមានប្រតិកម្មចំពោះការវាយទាត់ធាក់កូនរបស់ខ្លួន ហើយក៏មិនអាចទុកឱ្យរូបភាពនេះផ្សាយមុនការចាប់ខ្លួននោះទេ ។
កោះសន្តិភាពបានធ្វើការទំនាក់ទំនងទៅកាន់លោកប្រធានប៉ុស្តិ៍ផ្សារដេប៉ូទី១ និងទី២ ព្រោះមានភូមិសាស្ត្រជាប់គ្នា តែត្រូវបានបដិសេធពីព័ត៌មាននោះថា មិនមានកើតឡើងក្នុងភូមិសាស្ត្រសង្កាត់របស់ខ្លួននោះទេ ហើយការនិយាយនោះ គឺជាពាក្យចចាមអារ៉ាម ។ កោះសន្តិភាពបានសាកសួរបន្ថែមដល់លោកអធិការហួត ចាន់យ៉ារ៉ាន់ ហើយលោកក៏បានបដិសេធថា មិនមានរឿងរ៉ាវបែបនេះកើតឡើងហើយត្រូវបានចាប់ខ្លួននោះទេ ។ ជាការកត់សំគាល់បន្ទាប់ពីមានការភ្ញាក់ផ្អើលជាទូទៅថា កើតមាននៅផ្សារដេប៉ូក៏ល្បីថា នៅសង្កាត់វាលវង់ ខណ្ឌ៧មករាឯណោះទេ ព្រោះភូមិសាស្ត្រនៅទល់មុខគ្នានឹងសង្កាត់ផ្សារដេប៉ូ ។ តាមប្រភពថ្មីនេះនិយាយទៀតថា សមត្ថកិច្ចបានចាប់ខ្លួនស្ត្រីឃោរឃៅនោះហើយ ។ ការទាក់ទងទៅសមត្ថកិច្ចខណ្ឌ៧មករា ជុំវិញការចាប់ខ្លួននេះ ត្រូវបានបដិសេធថា គ្មានការចាប់ខ្លួនស្ត្រីណាម្នាក់ពីបទប្រើហិង្សាទៅលើក្មេងស្រីនោះទេ ។ នៅមានប្រភពជាច្រើនទៀតបាននិយាយតៗគ្នាជាក្អែក១ ក្អែក១០ជុំវិញវីដេអូឃ្លីបនេះ តែប្រភពចេញមកពីណានោះ មិនត្រូវបានរកឃើញឡើយ ។
សំលេងទូរស័ព្ទពីអស់លោកអ្នកអានបានបន្លឺឡើងមិនឈប់ឈរនៅទីចាត់ការសារព័ត៌មានកោះសន្តិភាពជុំវិញវីដេអូឃ្លីបនោះ ហើយបានសួរថា ហេតុអ្វីក៏សារព័ត៌មានមិនផ្សាយពីរឿងរ៉ាវស្ត្រីបំរើវាយក្មេងស្រីនោះ ព្រោះឮថាសមត្ថកិច្ចបានចាប់ខ្លួនហើយនោះ ។ អស់លោកអ្នកអានទាំងនោះបានបង្ហាញនូវកំហឹងយ៉ាងខ្លាំងក្លាចំពោះទង្វើអមនុស្សធម៌នេះ ។ ទោះបីជាបែបណាវាមានសារសំខាន់ណាស់សំរាប់ការធ្វើវិភាគនៅជុំវិញការផ្សព្វផ្សាយវីដេអូឃ្លីបដែលគ្មានប្រភពច្បាស់លាស់នេះ ។ មន្ត្រីប៉ូលិសមួយរូបបាននិយាយថា បើសិនជាហេតុការណ៍នេះកើតឡើងនៅក្នុងរាជធានីភ្នំពេញនោះប្រហែលជារកឃើញ ហើយក៏អាចវែកមុខមុនពេលវីដេអូនេះផ្សព្វផ្សាយទៅទៀត ។ មន្ត្រីដដែលនិយាយថា រូបភាពដែលថតបាននេះ គឺតាមរយៈកាមេរ៉ាដែលបង្កប់ក្នុងផ្ទះនោះ សួរថាតើការបង្កប់កាមេរ៉ានេះ មានលំនៅឋានប៉ុន្មានបានដាក់កាមេរ៉ានេះ កន្លែងដែលគេគិតគូរមុននោះ គឺក្រុមហ៊ុន ឬហាងលក់ដូរធំៗ ពិសេសកន្លែងលក់គ្រឿងអលង្ការ ស្ថានីយប្រេង ។ល។ ចុះហេតុអ្វីក៏គេបង្កប់ថតក្នុងល្វែងផ្ទះទៅវិញ ។
តាមរយៈវីដេអូឃ្លីបនេះ គឺជាការថតពីសកម្មភាពស្ត្រីម្នាក់កាត់សក់ខ្លីមើលក្មេង២នាក់ គឺក្មេងប្រុសតូចអង្គុយលើកៅអីកំពុងទទួលការបញ្ចុកបាយ ពេលនោះក្មេងស្រីអាចជាបងមានអាយុក្រោម៣ឆ្នាំ ឬលើសនេះដើរមកក្បែរ ស្រាប់តែស្ត្រីកំណាចនេះទាត់ខ្ទាតទៅជញ្ជាំងម្ខាង ដែលមានចំងាយប្រមាណ៤ម៉ែត្រ រួចក៏មានការវាយដំលោតធាក់ និងហក់ទៅទន្ទ្រាំពីលើមិនដឹងថា ក្មេងស្រីនោះបាក់ឆ្អឹង ឬបែបណាទេ ធ្វើឱ្យនាងតូចស្រែកយំគួរឱ្យរន្ធត់ ។ ទិដ្ឋភាពដ៏ឃោរឃៅនេះ បើសិនជាយើងគ្រប់គ្នាមានចៅ ឬកូនអាយុស្របាលក្មេងស្រីតូចនេះ ប្រហែលជាទ្រាំមើលមិនចប់ទេ ទោះបីជាវាបានបង្ហាញក្នុងរយៈពេលជាង២នាទីក្តី ។
ការវិភាគខ្លះទៀតថា រូបភាពវីដេអូឃ្លីបនេះទំនងជាត្រូវបានជនណាម្នាក់យកចេញពីអ៊ីនធើរណេត ហើយទិដ្ឋភាពនេះអាចមិនមែនកើតមាននៅក្នុងប្រទេសកម្ពុជាទេ និងអាចថាបានកើតឡើងនៅថៃ ម៉ាឡេស៊ី ឬហ្វ៊ីលីពីន ។ នេះមិនមែនជារឿងទី១ ទេ ដែលមានការភ្ញាក់ផ្អើលដោយសារតែការយករូបភាពផ្សេងៗមកផ្សព្វផ្សាយដូចជាមនុស្សពស់ ឬការអារ.កមនុស្សសំលាប់ឆៅៗជាដើម ។ ទោះបីជាបែបណាការផ្សព្វផ្សាយរូបភាពដ៏ឃោរឃៅនេះ គឺជាកំហុសផ្នែកមនសិការមួយ ព្រោះថា សង្គមខ្មែរស្អប់ខ្ពើមណាស់អំពើអមនុស្សធម៌ទាំងឡាយ ដូច្នេះមិនមានភាពចំណេញណាមួយសំរាប់ខ្លួននោះទេ គួរគប្បីបោះបង់ចោលគំនិតបែបខុសឆ្គងនេះ ។ ជាមួយគ្នានេះ វីដេអូឃ្លីបដែលកំពុងត្រូវបានផ្សព្វផ្សាយនេះហាក់កំពុងបន្ទរដោយការផ្សាយបន្តនិយាយចោទប្រកាន់ទៅលើស្ត្រីជាឈ្នួលចិត្តអប្រិយសាហាវឃោរឃៅ តែពួកគេមិនបានគិតថា កំពុងតែនាំគ្នាថ្កោលទោសទៅលើស្ត្រីក្រីក្រស៊ីឈ្នួលបំរើគេប្រៀបដូចទាសករប្តូរយកប្រាក់បន្តិចបន្តួចត្រូវគេជេរមុខជេរក្រោយ តើបែបណាទៅវិញ ។ ទោះបីជាបែបណា និងទោះបីជារឿងរា៉វនេះមានប្រភពពីណាក៏ដោយ ក៏យើងត្រូវតែថ្កោលទោសចំពោះទង្វើកំណាចឃោរឃៅរបស់ស្ត្រីរូបនេះដែរ ៕
ចែករំលែកព័តមាននេះ