រថក្រោះជាច្រើនគ្រឿងត្រូវបានដាក់ពង្រាយនៅបរិវេណខាងក្រៅវិមានប្រធានាធិបតីយេម៉ែន កាលពីល្ងាចថ្ងៃទី២១ មីនា កន្លងមក ក្រោយពីឧត្តមសេនីយ៍ជាន់ខ្ពស់មួយរូបបានប្រកាសផ្តាច់ខ្លួនចូលរួមធ្វើបាតុកកម្មទាមទារឱ្យលោកប្រធានាធិបតីអាលីអាប់ឌុលឡាហ៍ សាឡេហ៍ ចុះចេញពីតំណែង ។
តាមប្រភពព័ត៌មាន AFP ថា រថក្រោះជាច្រើនគ្រឿងត្រូវបានដាក់ពង្រាយនៅតាមគោលដៅសំខាន់ៗក្នុងទូទាំងទីក្រុងសាណា រដ្ឋធានីយេម៉ែន ពិសេសនៅវិមានប្រធានាធិបតី ធនាគារកណ្តាល និងក្រសួងការពារប្រទេស ។ ការដាក់ពង្រាយរថក្រោះនេះធ្វើឡើងនៅពេលឧត្តមសេនីយ៍ Ali Mohsen al-Ahmar ជាមេបញ្ជាការកងទ័ពថ្មើរជើង រថពាសដែក ប្រកាសថា រូបលោកនឹងចូលរួមធ្វើបដិវត្តន៍ជាមួយមន្ត្រីជាន់ខ្ពស់ជាច្រើនរូបទៀត ដើម្បីទម្លាក់លោកសាឡេហ៍ ចេញពីតំណែង ។
លោក al-Ahmar ថ្លែងថា ពេលនេះវិបត្តិនៅក្នុងប្រទេសកាន់តែមានភាពស្មុគស្មាញដែលជំរុញឱ្យប្រទេសកើតមានអំពើហិង្សា និងសង្គ្រាមស៊ីវិល ។
លោក Al-Ahmar ជាមន្ត្រីយោធាជាន់ខ្ពស់បំផុតគាំទ្រក្រុមប្រឆាំងដែលបានធ្វើបាតុកម្មអស់រយៈពេលជាច្រើនសប្តាហ៍មក ហើយទាមទារឱ្យលោកប្រធានាធិបតីអាលីអាប់ឌុលឡាហ៍ សាឡេហ៍ ដែលកាន់អំណាចអស់រយៈពេល៣២ឆ្នាំ មកហើយ ចុះចេញពីតំណែង ។
លោក Al-Ahmar បានប្រកាសផ្តាច់ខ្លួនពីរដ្ឋាភិបាលរបស់លោកសាឡេហ៍ រយៈពេលមួយថ្ងៃក្រោយពីលោកសាឡេហ៍ រំលាយរដ្ឋាភិបាលរបស់លោកមក។
លោកសាឡេហ៍ កាន់តែឯកោទោះបីជាកងទ័ពប្រកាសថា នៅតែគាំទ្រលោកក៏ដោយ ។ ក្រៅពីពួកនាយទាហានមួយចំនួនចាកចោលជួរ ឯកអគ្គរដ្ឋទូតយេម៉ែនប្រចាំប្រទេសស៊ីរី លីបង់ និងអារ៉ាប៊ី សាអូឌីត បានសុំលាលែង ក៏ដូចជានាយកនៃទីភ្នាក់ងារព័ត៌មានរដ្ឋដែរ ៕
ចែករំលែកព័តមាននេះ