ខេត្តស្វាយរៀង ៖ កាលពីថ្ងៃទី១១ កុម្ភៈ មន្ទីរព័ត៌មានខេត្ត ដែលមានទីតាំងនៅភូមិមេភ្លើង សង្កាត់ស្វាយរៀង ក្រុងស្វាយរៀង បានបង្កើតមូលនិធិវិទ្យុ FM រំដួលស្វាយរៀង ដើម្បីប្រមូលថវិកាសំរាប់ទ្រទ្រង់ និងឧបត្ថម្ភដល់យុទ្ធជននៅសមរភូមិមុខ ខេត្តព្រះវិហារ ។ លោកជៀង អំ អភិបាលខេត្ត លោកគឹម ធា ប្រធានក្រុមប្រឹក្សាខេត្ត ព្រមទាំងអភិបាលរងខេត្ត សមាជិកក្រុមប្រឹក្សាខេត្ត-ក្រុង ប្រធាន-អនុប្រធានមន្ទីរ កងកំលាំងប្រដាប់អាវុធ លោកគ្រូ អ្នកគ្រូ សិស្សានុសិស្ស ប្រជាពលរដ្ឋរាប់ពាន់នាក់បានចូលរួមឧបត្ថម្ភមូលនិធិនេះដែលបើគិតចាប់ពីថ្ងៃទី១១ កុម្ភៈ មកដល់ថ្ងៃទី១៣ កុម្ភៈ ២០១១ ត្រឹមវេលាម៉ោង៥ល្ងាច សរុបបានទឹកប្រាក់ចំនួន៣៩.៥៣១.៣០០រៀល និង៩៥៥ដុល្លារ ។
លោកជៀង អំ បានមានប្រសាសន៍ថា លោកមានមោទនភាពក្រៃលែង ដោយឃើញថ្នាក់ដឹកនាំគ្រប់លំដាប់ថ្នាក់ មន្ត្រី រាជការ ជាពិសេសក្មួយៗសិស្សានុសិស្ស កុមារា កុមារី មានឧត្តមគតិខ្ពស់នាំគ្នាមកចូលរួមឧបត្ថម្ភមូលនិធិវិទ្យុ FM រំដួលស្វាយរៀង ដើម្បីទ្រទ្រង់និងឧបត្ថម្ភដល់យុទ្ធជននៅសមរភូមិមុខការពារតាមបន្ទាត់ព្រំដែនកម្ពុជារបស់យើង ជាពិសេសតំបន់ប្រាសាទព្រះវិហារ ។ នេះជាការលើកទឹកចិត្តដល់កងទ័ពរបស់យើង និងដើម្បីផ្សារភ្ជាប់រវាងសមរភូមិក្រោយ និងយុទ្ធជននៅសមរភូមិមុន ហើយនេះជាប្រពៃណីរបស់ប្រជាជនខ្មែរយើង គឺមហាសាមគ្គីគ្រួសារខ្មែរ ជាពិសេសប្រជាពលរដ្ឋខេត្តស្វាយរៀងតែងតែផ្សារភ្ជាប់ជាមួយយុទ្ធជននៅសមរភូមិមុខជានិច្ចដើម្បីការពារទឹកដី ។
លោកជៀង អំ ក៏បានអំពាវនាវដល់អាជីវករក្រុមហ៊ុននានាដែលកំពុងប្រកបមុខរបរនៅខេត្តស្វាយរៀង ក៏ដូចជាសប្បុរសជនទាំងអស់បន្តគាំទ្រ និងឧបត្ថម្ភដល់មូលនិធិ FM រំដួលស្វាយរៀង ដើម្បីប្រមូលថវិកាទិញសំភារ និងគ្រឿងបរិភោគឧបភោគ ជូនដល់កងទ័ពដែលឈរជើងតាមបន្ទាត់ព្រំដែនប្រាសាទព្រះវិហារ នៅថ្ងៃខាងមុខដ៏ឆាប់នេះ ។ នៅព្រឹកថ្ងៃទី១៤ កុម្ភៈ ២០១១ មន្ត្រីរាជការ សិស្សានុសិស្ស ប្រជាពលរដ្ឋ និងអាជីវករ នៅតែបន្តមកចូលរួមឧបត្ថម្ភជាបន្តបន្ទាប់ទៀត ៕
ចែករំលែកព័តមាននេះ