ខេត្តព្រះវិហារ ៖ កាលពីរសៀលថ្ងៃទី២០ ធ្នូ ២០១២ កន្លងទៅនេះ នៅអគារយុវជនគណបក្សប្រជាជនកម្ពុជាខេត្តព្រះវិហារ មានរៀបចំពិធីសំណេះសំណាលជាមួយយុវជនគណបក្សប្រជាជនកម្ពុជាទូទាំងខេត្ត ក្រោមអធិបតីភាពលោកឧត្តមសេនីយ៍បណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ដោយមានការចូលរួមពីតំណាងយុវជនគណបក្សប្រជាជនកម្ពុជារាជធានីភ្នំពេញ ខេត្តកណ្តាល ខេត្តកំពង់ចាម ប្រមាណ១០០នាក់។
ពិធីសំណេះសំណាលនេះមានការអញ្ជើញចូលរួមពីលោកអ៊ុំ ម៉ារ៉ា ប្រធានគណៈកម្មាធិការគណបក្សប្រជាជនកម្ពុជាខេត្តព្រះវិហារ លោកសួស យ៉ារ៉ា អនុប្រធានទីមួយក្រុមការងារថ្នាក់កណ្តាលចុះជួយខេត្តព្រះវិហារ ព្រមទាំងសមាជិកសមាជិកា យុវជនគណបក្សប្រជាជនកម្ពុជាខេត្តព្រះវិហារ សរុបប្រមាណ៥៤៥នាក់ផងដែរ។ លោកអ៊ុំ ម៉ារ៉ា បានមានប្រសាសន៍ពាក់ព័ន្ធអំពីស្ថានការណ៍ព្រំដែនរវាងកម្ពុជា-សៀម ដែលកន្លងទៅនេះរដ្ឋាភិបាលសៀម អាប់ភីស៊ីត ជាមួយយោធាសៀមបានឈ្លានពានមកលើអធិបតេយ្យរបស់កម្ពុជា ក្នុងតំបន់ប្រាសាទព្រះវិហារ និងតំបន់ព្រំដែនផ្សេងទៀត និងថែមទាំងប្រើពាក្យថា ពួកគេមានទំហំដី៤,៦គីឡូម៉ែត្រ នៅក្នុងបរិវេណប្រាសាទព្រះវិហារ ។
លោកបន្តថា ការបង្កសង្គ្រាមឈ្លានពានរបស់យោធាសៀមអស់រយៈពេលបីឆ្នាំកន្លងទៅនេះ បានបង្កឡើងនូវភាពអមិត្តជាខ្លាំងមកលើភាគីកម្ពុជា ក្នុងមហិច្ឆតាឈ្លានពានចង់បានប្រាសាទព្រះវិហារជាមរតកដ៏មហាសាលរបស់កម្ពុជា ដែលសាកលលោកទាំងមូលគេបានទទួលស្គាល់ថា ជាសម្បត្តិរបស់កម្ពុជា ៕
ចែករំលែកព័តមាននេះ