ខេត្តសៀមរាប ៖ មន្ដ្រីជាន់ខ្ពស់មជ្ឈមណ្ឌលសកម្មភាពកម្ចាត់់មីនកម្ពុជា(ស៊ីម៉ាក់) បានប្រកាសថា ស៊ីម៉ាក់ត្រូវការថវិកាប្រមាណជាង១០០លានដុល្លារ សម្រាប់គាំទ្រប្រតិបត្ដិការរយៈពេល៥ឆ្នាំរបស់ខ្លួន ដើម្បីធ្វើការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះដែលបន្សល់ទុកពីភ្លើងសង្គ្រាមរាប់ទ សវត្សរ៍មកនេះ ។
ខេត្តសៀមរាប ៖ មន្ដ្រីជាន់ខ្ពស់មជ្ឈមណ្ឌលសកម្មភាពកម្ចាត់់មីនកម្ពុជា(ស៊ីម៉ាក់)បានប្រកាសថា ស៊ីម៉ាក់ត្រូវការថវិកាប្រមាណជាង១០០លានដុល្លារ សម្រាប់គាំទ្រប្រតិបត្ដិការរយៈពេល៥ឆ្នាំរបស់ខ្លួន ដើម្បីធ្វើការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះដែលបន្សល់ទុកពីភ្លើងសង្គ្រាមរាប់ទសវត្សរ៍មកនេះ ។
អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា លោកហេង រតនា បានថ្លែងថា ស៊ីម៉ាក់ក្នុងនាមជាប្រតិបត្ដិករជាតិ ដែលជាសេនាធិការរបស់រាជរដ្ឋាភិបាល បានរៀបចំផែនការរំកិលរយៈពេល៥ឆ្នាំ របស់ខ្លួន(២០១២ទៅ២០១៧)ស្របតាមតម្រូវការរបស់ប្រជាពលរដ្ឋ និងរាជរដ្ឋាភិបាល ដោយធ្វើយ៉ាងណាធ្វើការបោសសម្អាតផ្ទៃដីចម្ការមីនជិត៥ម៉ឺនហិកតា និងរំដោះផ្ទៃដីចម្ការមីនសង្ស័យចំនួន១០ម៉ឺនហិកតា នៅទូទាំងប្រទេស ។ ដើម្បីសម្រេចបានផែនការនេះ ស៊ីម៉ាក់ត្រូវការធនធានទាំងសម្ភារ ទាំងថវិកាជាង១០០លានដុល្លារ ក្នុងការគាំទ្រប្រតិបត្ដិការរបស់ខ្លួនរយៈពេល៥ឆ្នាំ ទៅមុខ ។
លោកហេង រតនា បានមានប្រសាសន៍យ៉ាងដូច្នេះ នៅក្នុងពិធីប្រគល់-ទទួលសម្ភារបោសសម្អាតមីនពីរដ្ឋាភិបាលជប៉ុនដំណាក់កាលទី៦ ដែលមានតម្លៃជាទឹកប្រាក់ប្រមាណ១៦,៥លានដុល្លារ ផ្ដល់ជូនរាជរដ្ឋាភិបាលកម្ពុជា មកឱ្យស៊ីម៉ាក់ ដែលប្រារព្ធធ្វើឡើងកាលពីព្រឹកថ្ងៃទី១៦ កុម្ភៈ ឆ្នាំ២០១២ កន្លងទៅនៅខេត្ដសៀមរាប ក្រោមអធិបតីភាពលោកឧបនាយករដ្ឋមន្ដ្រី សុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី និងលោកម៉ាសាហ្វូ៊មីគូរ៉ូគី (Masafumi Kuroki)ឯកអគ្គរាជទូតជប៉ុនប្រចាំនៅព្រះរាជាណាចក្រកម្ពុជា ដោយមានការចូលរួមពីមន្ដ្រីសំខាន់ៗជាច្រើនទៀត ។
លោកបានបន្ថែមថា ការបោសសម្អាតមីននៅកម្ពុជាពិតជាមានការប្រឈមនឹងឧបសគ្គលំបាកមួយចំនួនដូចជា ស្ថានភាពចម្ការមីនមានព្រៃដុះក្រាស់ឃ្មឹក និងមានស្ថានភាពដីរឹងខ្លាំង ស្ថានភាពចម្ការមីនចម្រុះគ្នា គ្រាប់មីនតោនកប់ជ្រៅៗ និងមីនថ្មើរជើងច្រើនដែលងាយបង្កគ្រោះថ្នាក់ពេលកំពុងប្រតិបត្ដិការ ចំណែកផ្នែកធនធានសម្ភារ និងថវិកាគាំទ្របេសកកម្មបោសសម្អាតមីននេះ គឺពឹងផ្អែកយ៉ាងខ្លាំងលើជំនួយរបស់ដៃគូអភិវឌ្ឍន៍ ។
លោកបានបញ្ចាក់បន្ថែមថា កិច្ចប្រតិបត្ដិការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ ជាភារកិច្ចស្នូលរបស់អង្គភាព ហើយចាប់ពីឆ្នាំ ១៩៩២ដល់ឆ្នាំ២០១១ កន្លងទៅនេះ ស៊ីម៉ាក់ បានសម្រេចលទ្ធផលដោយបានរុករក និងកម្ទេចចោលគ្រាប់មីនប្រឆាំងមនុស្សជិត៤៧ម៉ឺនគ្រាប់(៤៦៦.២៧៤គ្រាប់)គ្រាប់មីនប្រឆាំងរថក្រោះជាង៩ពាន់គ្រាប់(៩.០១២គ្រាប់)គ្រាប់យុទ្ធភណ្ឌមិនទាន់ផ្ទុះគ្រប់ប្រភេទ បានចំនួនជាងមួយលានចិតសិបពីរម៉ឺនគ្រាប់(១.៧២៧.៦៤៩ គ្រាប់) សរុបរួមទាំងគ្រាប់មីន និងយុទ្ធភណ្ឌមិនទាន់ផ្ទុះគឺជិត២,២លានគ្រាប់(២.១៩២.៦៣១គ្រាប់) ។ ដោយក្នុងនោះបានធ្វើការបោសសម្អាតផ្ទៃដីមានមីនបានចំនួនជាងបីម៉ឺនប្រាំពាន់ហិកតា និងរំដោះផ្ទៃដីសង្ស័យចម្ការមីនចំនួន ជិតដប់ប្រាំបួនម៉ឺនហិកតា ។
ថ្លែងនៅក្នុងពិធីប្រគល់-ទទួលសម្ភារបោសសម្អាតមីនពីរដ្ឋាភិបាលជប៉ុនដំណាក់កាលទី៦ផ្ដល់ជូនរាជរដ្ឋាភិបាលកម្ពុជា មកឱ្យស៊ីម៉ាក់ នោះដែរ លោកឧបនាយករដ្ឋមន្ដ្រី សុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីនៃប្រទេសកម្ពុជាបានមានប្រសាសន៍ថា«កិច្ចប្រតិបត្ដិការបោសសម្អាតមីន និងយុទ្ធភណ្ឌមិនទាន់ផ្ទុះ គឺជាគោលដៅដែលរាជរដ្ឋាភិបាល និងដៃគូអភិវឌ្ឍន៍ទាំងអស់ត្រូវបន្ដសម្រេចឱ្យបានជោគជ័យទាំងស្រុង ដើម្បីរួមចំណែកធានាបានស្ថិរភាពនយោបាយ ម៉ាក្រូសេដ្ឋកិច្ច សន្ដិភាព និងសុវត្ថិភាព ជូនប្រទេស និងប្រជាជនកម្ពុជា» ។
លោកឧបនាយករដ្ឋមន្ដ្រីបានបន្ថែមទៀតថា ប្រទេសកម្ពុជាបានឆ្លងកាត់ភ្លើងសង្គ្រាមអស់រយៈពេល៥០០ឆ្នាំមកហើយ ប៉ុន្ដែតាមរយៈនយោបាយឈ្នះ ឈ្នះ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ធ្វើឱ្យកម្ពុជាបានទទួលឯកភាពជាតិទាំងស្រុងនៅចុងឆ្នាំ ១៩៩៨ ដែលនេះជាប្រវត្ដិសាស្ដ្រលើកដំបូងរបស់កម្ពុជា ។ ទោះបីជាភ្លើងសង្គ្រាមបានរលត់ហើយក្ដី ក៏រាជរដ្ឋាភិបាលនៅតែបន្ដរែកពុននូវការលំបាកក្នុងការធ្វើសមាហរណកម្ម ការកសាងហេដ្ឋារចនាសម្ពន្ធ័រូបវន្ដ និងបញ្ហាធំៗមួយចំនួនទៀត ហើយថែមទាំងត្រូវប្រឈមមុខដោះស្រាយកាកសំណល់ពីសង្គ្រាមដែលជាគ្រាប់មីននិងយុទ្ធភណ្ឌមិនទាន់ផ្ទុះយ៉ាងច្រើនទៀត ហើយកាកសំណល់ខ្លះនៅសល់តាំងពីសម័យសង្គ្រាមលោកលើកទី២ ក៏មានដែរ ។
លោកឧបនាយករដ្ឋមន្ដ្រីបានបន្ដទៀតថាលទ្ធផលជិត២០ឆ្នាំ កន្លងមកនេះ ក្រៅពីអង្គភាព ស៊ីម៉ាក់កំពុងបំពេញបេសកកម្មបោសសម្អាតមីន និងយុទ្ធភណ្ឌមិនទាន់ផ្ទុះ នៅមានអង្គភាពប្រតិបតិ្ដករមួយចំនួនទៀតដូចជា កងយោធពលខេមរភូមិន្ទ និងអង្គការដោះមីនហាឡូត្រាស់ (Halo Trust) អង្គការយេម៉ាស់(Jmas)រួមគ្នាបោសសម្អាតផ្ទៃដីបានប្រមាណ៦៤៣,២១ គីឡូម៉ែត្រក្រឡា ។ តាមការវាយតម្លៃរបស់អាជ្ញាធរមីន និងប្រតិបត្ដិករទាំងអស់បានឱ្យដឹងថា ផ្ទៃដីមានមីននៅសល់ជាង៦៧០គីឡូម៉ែត្រក្រឡាទៀត ដែលទំហំនេះត្រូវធ្វើការបោសសម្អាតមីន ទាំងស្រុងតែម្ដង និងនៅមានផ្ទៃដីសង្ស័យមានមីនប្រមាណ១.០៨៥គីឡូម៉ែត្រក្រឡាទៀត ដែលចាំបាច់ត្រូវការធ្វើការបញ្ជាក់ឡើងវិញឱ្យបានច្បាស់លាស់ដែរ ដើម្បីធានាដល់សុវត្ថិភាព និងបំបាត់ការភ័យខ្លាចរបស់ប្រជាជន ។ ដោយផ្អែកលើការវាយតម្លៃនេះ កម្ពុជានៅតែត្រូវការធនធានយ៉ាងច្រើនបន្ថែមទៀត ដើម្បីធ្វើឱ្យទស្សនៈវិស័យ១០ឆ្នាំលើកទី២ទៅមុខបានទទួលជោគជ័យ ។
ទោះបីជារាជរដ្ឋាភិបាលកម្ពុជា និងដៃគូអភិវឌ្ឍន៍បានរួមគ្នាដោះស្រាយបញ្ហាមីន និងយុទ្ធភណ្ឌមិនទាន់ផ្ទុះអស់រយៈពេលជាង២០ឆ្នាំ ហើយក៏ដោយ ក៏គ្រាប់មីន និងយុទ្ធភណ្ឌមិនទាន់ផ្ទុះនៅតែមានសេសសល់ច្រើនទៀតនៅតាមភូមិករ ដីស្រែចម្ការ និងទីតាំងសំខាន់ៗមួយចំនួនដែលនៅតែបន្ដបង្កគ្រោះថ្នាក់ដល់អាយុជីវិតប្រជាជន ឬបណ្ដាលឱ្យក្លាយជាជនពិការអស់មួយជីវិត ជាពិសេសចំពោះអ្នកដែលកំពុងរស់នៅតាមតំបន់អតីតសមរភូមិ ព្រមទាំងបន្ដបង្កភាពភ័យខ្លាចដល់ការប្រើប្រាស់ដីធ្លីក្នុងការបង្កបង្កើនផលចិញ្ចឹមគ្រួសារ ក៏ដូចជាឧបសគ្គដល់ការអភិវឌ្ឍហេដ្ឋារចនាសម្ព័ន្ធក្នុងប្រទេស ។
តាមរបាយការណ៍ទិន្នន័យតាមដានអ្នកគ្រោះថ្នាក់ដោយសារគ្រាប់មីនបានឱ្យដឹងថា ក្នុងឆ្នាំ ២០០០-២០០៧ មានអត្រាអ្នកគ្រោះថ្នាក់ជាង ៨០០នាក់ក្នុងមួយឆ្នាំៗ ហើយមកទល់ឆ្នាំ ២០០៨-២០១១ អត្រានេះបានធ្លាក់មកដល់នៅត្រឹមក្រោម៣០០នាក់ក្នុងមួយឆ្នាំៗ ប៉ុន្ដែតួលេខធ្លាក់ចុះនេះនៅតែជាតួលេខខ្ពស់ជាងបណ្ដាប្រទេសផ្សេងៗទៀតដែលមានសន្ដិភាពពេញលេញដូចប្រទេសកម្ពុជាយើង ។
សូមបញ្ជាក់ថា ជំនួយសម្ភារបច្ចេកទេសដែលត្រូវផ្ដល់ជូនមកឱ្យរាជរដ្ឋាភិបាលកម្ពុជាកាលពីព្រឹកថ្ងៃទី១៦ កុម្ភៈ នោះរួមមាន គ្រឿងចក្រធុនធ្ងន់ចំនួន៨គ្រឿង រថយន្ដគ្រប់ប្រភេទចំនួន១១៥គ្រឿង ម៉ាស៊ីនរាវមីនចំនួន៤៩២គ្រឿង តង់ស្នាក់នៅចល័តចំនួន៨៦ ឧបករណ៍GPS ចំនួន១១៥គ្រឿង វិទ្យុទាក់ទងចំនួន២០៥ គ្រឿង ម៉ាស៊ីនភ្លើងចំនួន២៧គ្រឿង ព្រមទាំងគ្រឿងបន្លាស់រថយន្ដ គ្រឿងចក្រ និងសម្ភារសំខាន់ៗមួយចំនួនទៀត ៕
ចែករំលែកព័តមាននេះ