ទោះបីកំណើនផលទុនសរុបក្នុងស្រុក (GDP) របស់ប្រទេសអាសៃបៃហ្សង់ពុំមានកំណើនដាច់ឆ្ងាយពីបណ្តាប្រទេសជិតខាងមួយចំនួនរបស់ខ្លួនក្តី ក៏ប្រទេសនេះមានគម្រោងកសាងអគារកប់ពពកខ្ពស់ជាងគេបំផុតនៅលើពិភពលោក ។ យោងទៅតាមប្រភពព័ត៌មានពីគេហទំព័រ Smartplanet.com ចេញផ្សាយកាលពីថ្ងៃទី១២ កុម្ភៈ ឆ្នាំ២០១២ បានឱ្យដឹងថា ប្រទេសអាស៊ៃបៃហ្សង់មានគម្រោងសង់អគារខ្ពស់កប់ពពកដែលមានឈ្មោះថា Azerbaijan Tower ដែលមានកម្ពស់១០៥០ម៉ែត្រ និងមាន១៨៩ជាន់ ដើម្បីបំបែកឯតទគ្គកម្មអគារខ្ពស់បំផុតនៅទីក្រុងអាប៊ុយដាប៊ីរបស់ប្រទេសអេមីរ៉ាត អារ៉ាប់រួមដែលមានកម្ពស់ត្រឹមតែ៨២៩,៨៤ម៉ែត្រប៉ុណ្ណោះ ។
គម្រោងអគារខ្ពស់នេះនឹងត្រូវកសាងនៅលើផ្ទៃដី២០០០ហិកតាដោយក្រុមហ៊ុន Avesta Group នៅលើទីប្រជុំកោះ Khazar Island និងកោះសិប្បនិម្មិតដែលបង្កើតឡើងកម្លាំងមនុស្សចំនួន៤១ទៀត ដើម្បីផ្តល់ទីស្នាក់អាស្រ័យដល់មនុស្ស១លាននាក់ រស់នៅក្នុងអគារដែលមានកម្ពស់ចាប់ពី២៥ ទៅ៦០ជាន់ នៅជុំវិញអគារខ្ពស់នោះ ។ ទាក់ទិនទៅនឹងការកសាងហេដ្ឋារចនាសម្ព័ន្ធ នេះដែរ ក្រុមហ៊ុនបានឱ្យដឹងថា ៖ ពួកគេនឹងកសាងសាលារៀនចំនួន១៥០ មន្ទីរពេទ្យចំនួន៥០ សួនច្បារ ផ្សារទំនើប, មជ្ឈមណ្ឌលវប្បធម៌,សាកលវិទ្យាល័យ និងជាពិសេសទៅទៀតនេះ គឺកន្លែងប្រណាំងរថយន្ត Formula 1 ផងដែរ ។
គម្រោងសាងសង់នេះគ្រោងនឹងបើកពិធីបញ្ចុះបឋមសិលានៅឆ្នាំ២០១៥ ហើយគ្រោងនឹងបញ្ចប់នៅឆ្នាំ២០១៨ ឬ២០១៩ សម្រាប់អគារខ្ពស់ និងឆ្នាំ២០២២ សម្រាប់ហេដ្ឋារចនាសម្ព័ន្ធទាំងអស់ជុំវិញអគារជាមួយនឹងការចំណាយទឹកប្រាក់ប្រហែលជាង២ពាន់ពាន់លានដុល្លារ (2 Billion) ហើយអាចទប់ទល់ជាមួយនឹងកម្លាំងរញ្ជួយដី៩រិចស្ទ័រ ។ គួររំលឹកដែរថា អគារខ្ពស់ជាងគេលើពិភពលោកសព្វថ្ងៃ គឺអគារ Burj Khalifa របស់ប្រទសអេមីរ៉ាតអារ៉ាប់រួម មានកម្ពស់៨២៩,៨៤ មាន១៦៣ជាន់កសាងក្នុងឆ្នាំ២០១០ ៕
ចែករំលែកព័តមាននេះ