កីឡាការិនីស៊ែប៊ីអាណា អ៊ីវ៉ាណូវិចបានឈានចូលដល់ជុំទី២ប្រកួតតឺន្នីសកម្មវិធី Dubai Tennis Championshipsបន្ទាប់ពីបានយកឈ្នះកីឡាការិនីអ៊ីតាលី Francesca Schiavone ក្នុងលទ្ធផល៦-១និង៧-៥ក្នុងជុំទី១កាលពីថ្ងៃអង្គារទី២១កុម្ភៈកន្លងមកនេះ។ ការប្រកួតនេះត្រូវបានរៀបចំធ្វើនៅក្រុងឌូបៃ ប្រទេសអារ៉ាប់រួម ។ គ្រាន់តែសិតទី១ អ៊ីវ៉ាណូវិចដែលជាម្ចាស់ជើងឯក French Openឆ្នាំ២០០៨បានប្រើពេលអស់៣៣នាទីបំបាក់ម្ចាស់ជើងឯក French Open ឆ្នាំ២០១០នាង Schiavone ។
បន្ទាប់ពីបញ្ចប់ការប្រកួត អ៊ីវ៉ាណូវិចបានថ្លែងថា៖«ខ្ញុំជឿថា ខ្ញុំពិតជាអាចឡើងទៅដល់លំដាប់កំពូលហើយឈ្នះពានជើងឯកក្របខណ្ឌធំ ជាថ្មីម្តងទៀត។ វាជាមូលហេតុមួយដែលខ្ញុំធ្វើដំណើរមកប្រកួតនៅទីនេះ។ ប្រសិនជាខ្ញុំគិតថា រឿងនោះមិនអាចទៅរួចឬកើតឡើងជាថ្មីទេនោះ ខ្ញុំប្រហែលជាមិនមកទីនេះទេ»។ កីឡាការិនីវ័យ២៤ឆ្នាំរូបនេះបានបន្តថា៖«វាពិតជាចម្លែកដែលខ្ញុំគិតថាខ្លួនឯងចាស់នោះ។ វាជាការប្រជែងដ៏អស្ចារ្យមួយសម្រាប់ពួកយើងក្នុងនាមជាកីឡាការិនី។ ពួកគេបានជួយជំរុញយើងឱ្យឈានទៅដល់កម្រិតល្អប្រសើរ ហើយខ្ញុំខ្លួនឯងមានជំនឿថា ពិតជាអាច»។
កីឡាការិនីប៉ូឡូញ Agnieszka Radwanska ក៏បានឈានចូលដល់ជុំទី២ផងដែរបន្ទាប់ពីបានយកឈ្នះកីឡាការិនី កាណាដា Aleksandra Wozniakក្នុងលទ្ធផល ៦-១,៦-៧ និង៧-៥។ នៅសិតទី១នាងRadwanskaបានប្រើពេលអស់២៧នាទី ប៉ុន្តែនាងត្រូវការពេលដល់ទៅ២ម៉ោងបន្ថែមទៀតទើបអាចបញ្ចប់ការប្រកួតដែលមាន៣សិតបាន។
កីឡាការិនីចិន Peng Shuaiក៏បានចូលរួមក្តីរីករាយជាមួយគេឯងផងដែរ ក្រោយពីនាងបានបំបាក់កីឡាការិនីជើងខ្លាំងរបស់បារាំងម៉ារីយ៉ុង បាតូលីក្នុងលទ្ធផល៦-៤និង៦-៣។ នៅជុំបន្ទាប់នាងនឹងជួបប្រកួតជាមួយកីឡាការិនីស្លូវ៉ាគី Daniela Hantuchovaដែលបានយកឈ្នះកីឡាការិនីស្លូវេនៀ Polona Hercogក្នុងលទ្ធផល១-៦, ៧-៥ និង៧-៦។ ចំណែកកីឡាការិនីស្លូវ៉ាគី Dominika Cibulkovaត្រូវបង្ខំចិត្តដកខ្លួនពីការប្រកួតបន្ទាប់ពីមានរបួសសរសៃពួគន្លាក់ជើងគឺស្របពេលនឹងការដកខ្លួនរបស់នាង Maria Kirilenko ដែលរងរបួស.កដែរ ។
ឯកីឡាការិនីដាណឺម៉ាកការ៉ូលីន វ៉ូនីអាកគីទទួលបានសិទ្ធិពិសេសដោយមិនចាំបាច់ប្រកួតក្នុងជុំទី១ឡើយ។ ក្នុងនាមជាកីឡាការិនីការពារជើងឯកនាងនឹងជួបប្រកួតជាមួយនាង Simona Halepមកពីរ៉ូម៉ានីក្នុងជុំទី២។ Halepបានឡើងមកដល់ជុំនេះបន្ទាប់ពីបានយកឈ្នះកីឡាការិនីរុស្ស៊ី Anastasia Pavlyuchenkovaក្នុងលទ្ធផល៦-៤និង៦-២។ លទ្ធផលផ្សេងទៀត នាង Lucie Safarovaយកឈ្នះនាង Petra Marticក្នុងលទ្ធផល ៦-៣,៥-៧និង៦-៣។ នៅជុំបន្ទាប់Safarovaនឹងជួបជាមួយម្ចាស់ជើងឯក U.S Open នាងសាម៉ាន់ថា ស្តូសួ។
ចំណែកម្ចាស់ជើងឯកក្របខណ្ឌធំ Wimbledonនាង Petra Kvitovaម្ចាស់ជើងឯកក្របខណ្ឌធំ French Openឆ្នាំ២០១១នាងលីណានិងនាង Vera Zvonarevaសុទ្ធតែបានដកខ្លួនចេញដោយរបួសនិងជំងឺ ។ ក្នុងថ្ងៃជាមួយគ្នានោះដែរនៅទីក្រុង Buenos Airesប្រទេសអាហ្សង់ទីន កីឡាករបារាំង Gilles Simonបានឈានចូលដល់ជុំទី២នៃកម្មវិធី Copa Claroបន្ទាប់ពីបានយកឈ្នះកីឡាករព័រទុយហ្គាល់ Rui Machadoក្នុងលទ្ធផល ៦-៣និង៧-៥ ស្របពេលដែលកីឡាករម្ចាស់ផ្ទះ Juan Monacoបំបាក់កីឡាករអុីតាលីFilippo Volandriក្នុងលទ្ធផល ៦-១និង៣-២។
នៅពេលមុននេះប៉ុន្មានម៉ោង កីឡាករជប៉ុន Kei Nishikoriក៏បានឈានចូលដល់ជុំទី២ផងដែរក្រោយពីបានយកឈ្នះកីឡាករអេស្ប៉ាញ Juan Carlos Ferreroក្នុងលទ្ធផល៧-៥,៣-៦និង៦-២។ មុននឹងយកឈ្នះម្ចាស់ជើងឯក French Openរូបនេះ កីឡាករវ័យ២២ឆ្នាំ Nishikoriធ្វើឱ្យមានកំហុស Double Faultsចំនួន៥លើក។ គេបាននិយាយថា ៖«Carlos Ferreroគឺជាជើងខ្លាំងម្នាក់ក្នុងលោក ដូច្នេះខ្ញុំពិតជាសប្បាយចិត្តដែលបានឈ្នះការប្រកួតលើកនេះ។ នៅលើទីលានប្រកួតដីបែបនេះខ្ញុំមិនទាន់សម្របខ្លួនបាននៅឡើយទេ ក៏ប៉ុន្តែខ្ញុំនឹងព្យាយាមលេងឱ្យបានល្អ»។
Nishikoriកាលពីប្រកួតក្នុងក្របខណ្ឌធំ Australian Openខែកន្លងទៅ គេបានឆ្លងចូលដល់វគ្គ១/៤ផ្តាច់ព្រ័ត្រ។ពេលនេះគេចង់បង្ហាញដល់ជនជាតិអាហ្សង់ទីនថា ខ្លួនគេពិតជាអាចប្រកួតនៅលើទីលានគ្មានដំបូលបាន។ កីឡាកររូបនេះបានបន្តថា៖«ខ្ញុំមានជំនឿចិត្តលើខ្លួនឯងយ៉ាងខ្លាំង។ ខ្ញុំប្រកួតបានល្អណាស់នៅឆ្នាំនេះហើយខ្ញុំកំពុងតែព្យាយាមកែលំអចំណាត់ថ្នាកពិភពលោករបស់ខ្ញុំ»។ Nishikoriដែលបច្ចុប្បន្នស្ថិតនៅលំដាប់ទី១៧ពិភពលោកបានបន្ថែមថា ៖«ប្រសិនជាការប្រកួតរបស់ខ្ញុំបន្តល្អបែបនេះ នោះខ្ញុំប្រាកដជាមានឱកាសឡើងទៅកាន់លំដាប់កំពូលបាន»។
ឡើងទៅជុំបន្តក្នុងពេលជាមួយគ្នានោះ ក៏មានកីឡាករស៊ីលីផងដែរ ។ Fernando Gonzalez ដែលគ្រោងនឹងចូលនិវត្តន៍នៅខែក្រោយបន្ទាប់ពីបញ្ចប់ការប្រកួតកម្មវិធី Masters នៅរដ្ឋផ្លរីដា បានយកឈ្នះកីឡាករអេស្ប៉ាញ Albert Montanesដែលបានដកខ្លួនឈប់ប្រកួតក្នុងសិតទី២ក្រោយពីរបួសត្រគាក។ Gonzalezបាននិយាយថា ខ្លួនពិតជាមានការសោកស្តាយជំនួសគូប្រកួតរបស់ខ្លួន។ តែបានវាយតម្លៃថានេះជាឱកាសសម្រាប់ឱ្យខ្លួនបន្តក្នុងជុំថ្មីទៀត។
ឯលទ្ធផលគូផ្សេងទៀត កីឡាករស្វ៊ីសStanislas Wawrinkaយកឈ្នះកីឡាករម្ចាស់ផ្ទះ Horacio Zeballosក្នុងលទ្ធផល ៦-៣និង៦-៤ខណៈកីឡាករអេស្ប៉ាញ Pere Ribaត្រូវចាញ់ដៃកីឡាករម្ចាស់ផ្ទះ Carlos Berlocq ក្នុងលទ្ធផល៦-៧,៦-០និង៦-០ ។ កីឡាកររ៉ូម៉ានី Victor Hanescuបំបាក់កីឡាករអេស្ប៉ាញ Pablo Andujarក្នុងលទ្ធផល ៦-៣,៤-៦និង៧-៦ស្របពេលដែលកីឡាករម្ចាស់ផ្ទះម្នាក់ទៀត Facundo Bagnisយកឈ្នះមិត្តរួមជាតិរបស់ខ្លួន Leonardo Mayerក្នុងលទ្ធផល ៥-៧,៦-៤និង៦-២ ខណៈកីឡាករម្ចាស់ផ្ទះ Juan Ignacio Chelaត្រូវបំបាក់ដោយកីឡាករអេស្ប៉ាញAlbert Ramos ក្នុងលទ្ធផល៤-៦,៦-៣និង៦-៤។
កីឡាករអេស្ប៉ាញម្នាក់ទៀត Fernando Verdascoយកឈ្នះកីឡាករបារាំង Eric Prodonក្នុងលទ្ធផល៦-៤និង៦-១មុនពេលដែលកីឡាករមិត្តរួមជាតិរបស់គេគឺNicolas Almagroយកឈ្នះកីឡាករអ៊ីតាលី Potito Staraceក្នុងលទ្ធផល ៤-៦,៦-៣និង៧-៦។ ដោយឡែក ការប្រកួតក្នុងកម្មវិធីមួយផ្សេងទៀតនៅទីក្រុងMarseilleភាគខាងត្បូងប្រទេសបារាំង កីឡាកររុស្ស៊ីនីកូឡៃ ដាវីដិនកូបានយកឈ្នះជុំបើកឆាកកម្មវិធី Open 13ក្រោយពីបានបំបាក់កីឡាករអាល្លឺម៉ង់ Andreas Beckក្នុងលទ្ធផល២សិតផ្ទួនៗគ្នាគឺ៦-១និង៧-៥។
នៅជុំបន្ទាប់ ដាវីដិនកូនឹងប៉ះជាមួយជើងខ្លាំងមកពីអាហ្សង់ទីនចូអាន ម៉ាទីនឌែលប៉ូត្រូដើម្បីដណ្តើមយកកន្លែងមួយក្នុងវគ្គ១/៤ផ្តាច់ព្រ័ត្រ។ លទ្ធផលគូផ្សេងទៀត កីឡាករម្ចាស់ផ្ទះ Nicolas Mahutបានប្រើសឺវីសខ្លាំងចំនួន១២លើកយកឈ្នះកីឡាករមិត្តរួមជាតិរបស់ខ្លួន Arnaud Clementក្នុងលទ្ធផល ៦-៣និង៦-៤។ នៅជុំបន្ទាប់គេនឹងជួបជាមួយកីឡាករមិត្តរួមជាតិខ្លួនម្នាក់ផ្សេងទៀតគឺ Jo-Wilfried Tsonga៕
ចែករំលែកព័តមាននេះ