ខេត្តកំពត ៖ យោងតាមប្រភពព័ត៌មានថ្មីជុំវិញពលរដ្ឋខ្មែរម្នាក់ដែលត្រូវមេការចិនបញ្ជាឱ្យចាប់ខ្លួននៅការដ្ឋានវារីអគ្គិសនីកំចាយដាក់ខ្នោះ នឹងចំរឹងទ្វារដែកដោយចោទពីបទចោរកម្មនោះរហូតមកដល់ថ្ងៃទី១៩ កុម្ភៈ មានព័ត៌មានថា ពលរដ្ឋខ្មែររូបនេះបានសារភាពថាខ្លួនពិតជាបានប្រព្រឹត្តធ្វើខុសឆ្គងមែន ។ នេះបើយោងតាមការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្ត ។
តាមរបាយការណ៍មន្ត្រីប៉ូលិសព្រហ្មទណ្ឌកម្រិតធ្ងន់បានឱ្យដឹងថា ជនសង្ស័យឈ្មោះសៅ ញាញ់ ភេទប្រុស អាយុ២៤ឆ្នាំ មានទីលំនៅក្នុងភូមិអណ្តូងជីម៉ឺន ឃុំកំពង់ក្រែង ស្រុកទឹកឈូ ត្រូវបានក្រុមសមត្ថកិច្ច សន្តិសុខយាមការដ្ឋានទំនប់វារីអគ្គិសនីកំចាយ បញ្ជូនមកដល់ការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត នៅវេលាម៉ោង១២និង៣០នាទីរសៀលថ្ងៃទី១៦ កុម្ភៈ ក្រោយពេលសាកសួរជនសង្ស័យបានសារភាពប្រាប់សមត្ថកិច្ចថា កាលពីថ្ងៃទី១៦ កុម្ភៈ នៅវេលាម៉ោង៧ព្រឹក ខ្លួនបានជិះកង់នៅតាមផ្លូវពេលនោះមានគូកនម្នាក់បានបបួលខ្លួនចូលទៅក្នុងការដ្ឋានចិន ដើម្បីលួចសម្ភារនៅក្នុងការដ្ឋានវារីអគ្គិសនី ស្របពេលនោះខ្លួនក៏មានកូនរណារមួយនៅជាប់ខ្លួនផង ឯគូកនម្នាក់ទៀតក៏មានពូថៅមួយដាក់តាមខ្លួនដែរ ពេលទៅដល់នៅម៉ោង៨ព្រឹក ។
ជនសង្ស័យបន្តថា ពេលពួកគេទាំង២នាក់កំពុងតែលួចអារយកដែកបំពង់ទីបដែលជនជាតិចិនតពីកក្រោយឡើងទៅលើ ដើម្បីបូមទឹកប្រើប្រាស់ក្នុងការដ្ឋាន ពេលនោះពួកខ្លួនទាំង២នាក់ចូលដល់ក្នុងរូងហើយអង្គុយអារដែកបំពុងទីបដែលមានទំហំមុខកាត់ជិតមួយតឹក ។ ពេលកំពុងតែអារបានមួយសន្ទុះក៏ស្រាប់តែឃើញពួកចិន និងទាហានខ្មែរដែលការពារការដ្ឋានអើតមើលតាមមាត់រូងពីខាងត្បូង ពួកខ្លួនឃើញដូច្នេះ ក៏រត់ទៅមាត់រូងខាងជើងហើយក៏ត្រូវជនជាតិចិនចាប់ខ្លួនបានតែម្តង ឯគូកនរបស់ខ្លួនបានរត់រួច តែសមត្ថកិច្ចបានស្គាល់អត្តសញ្ញាណហើយ ។
សូមបញ្ជាក់ថា ដែកបំពង់ទីបដែលជនសង្ស័យឈ្មោះសៅ ញាញ់ និងគូកនធ្វើសកម្មភាពអារនេះពុំទាន់យកបានទេ ។ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ហើយតុលាការចេញដីកាឃុំខ្លួនជនល្មើសជាបណ្តោះអាសន្ន នៅវេលាម៉ោង៣និង៣០នាទីរសៀលថ្ងៃទី១៧ កុម្ភៈ ៕
ចែករំលែកព័តមាននេះ