រាជធានីភ្នំពេញ ៖ ស្ត្រីម្នាក់បានរងរបួសធ្ងន់ធ្ងរនៅក្នុងអំពើបាញ់ប្រហារប្លន់យកម៉ូតូម៉ាកឌ្រីម C125 ពណ៌ខ្មៅ ស៊េរី២០១១ មួយគ្រឿងពីសំណាក់ក្រុមចោរ២នាក់ ។ ហេតុការណ៍នេះបានកើតឡើងនៅចំណុចភូមិសន្សំកុសល២ សង្កាត់បឹងទំពុន ខណ្ឌមានជ័យ កាលពីវេលាម៉ោង១០និង៥០នាទីព្រឹកថ្ងៃទី២១ កុម្ភៈ ២០១២ ។
ស្ត្រីរងគ្រោះក្នុងអំពើបាញ់ប្រហារខាងលើឈ្មោះចាន់ អ៊ាងនី អាយុ៥០ឆ្នាំ ស្នាក់នៅផ្ទះត្រង់កន្លែងកើតហេតុតែម្តង ។ តាមប្រភពព័ត៌មានបានឱ្យដឹងថា មុនពេលកើតហេតុស្ត្រីរងគ្រោះបានជិះម៉ូតូម៉ាក C125 ស៊េរី២០១១ ធ្វើដំណើរត្រឡប់ពីទទួលចៅចេញពីសាលារៀន លុះមកដល់មុខផ្ទះដាក់ចៅចុះឱ្យដើរចូលផ្ទះក៏ត្រូវក្រុមចោរប្លន់ប្រដាប់ដោយអាវុធមានគ្នា២នាក់ស្លៀកពាក់ស៊ីវិលជិះម៉ូតូម៉ាកឌ្រីម C125 ស៊េរី២០០៩ ពណ៌ខ្មៅ មួយគ្រឿងឈប់អែបស្ត្រីរងគ្រោះរួចដកកាំភ្លើងខ្លីភ្ជង់បាញ់មួយគ្រាប់ចំប្រអប់ជើងខាងស្តាំ បណ្តាលឱ្យរបួស ហើយក្រុមចោរក៏ដណ្តើមយកម៉ូតូពីដៃស្ត្រីរងគ្រោះជិះចេញបាត់តែម្តង ។
មានការកត់សម្គាល់ថា មួយរយៈនេះក្នុងភូមិសាស្ត្រសង្កាត់បឹងទំពុន មានករណីប្លន់ ចោរកម្មជាញឹកញាប់គួរឱ្យព្រួយបារម្ភណាស់ ៕
ចែករំលែកព័តមាននេះ