រាជធានីភ្នំពេញ ៖ រថយន្ដឡិចស៊ីស RX300 ពណ៌ស បានហោះទៅបុកម៉ូតូឌ្រីមសេ១២៥ ពណ៌ខ្មៅ ស៊េរី២០១១ ពេញទំហឹង បណ្តាលឱ្យអ្នកជិះ៣នាក់រងរបួសធ្ងន់ និងស្រាល រីឯរថយន្តបើករត់គេចខ្លួនបាត់ស្រមោលកាលពីវេលាម៉ោង៨និង៣០នាទីយប់ថ្ងៃទី១៩ កុម្ភៈ ២០១២ នៅតាមបណ្តោយផ្លូវលេខ៦១ កែងផ្លូវលេខ៦៤ ត្រង់ផ្លូវបែកជាបួនខាងលិចស្ថានទូតអាមេរិក ក្នុងសង្កាត់វត្ដភ្នំ ខណ្ឌដូនពេញ ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុម៉ូតូឌ្រីមសេ១២៥ជិះគ្នា៣នាក់តាមបណ្ដោយផ្លូវ៦១ពីលិចទៅកើត ចំណែករថយន្ដឡិចស៊ីស RX300 បើកតាមផ្លូវលេខ៦៤ ពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុ ស្រាប់តែទៅបុកចំពាក់កណ្ដាលម៉ូតូឌ្រីមសេ១២៥ បណ្ដាលឱ្យអ្នកជិះប៉ើងប្រមាណ៧ម៉ែត្របោកទៅនឹងខឿនផ្លូវរងរបួសធ្ងន់បាក់ជើង២នាក់ និងម្នាក់ទៀតរងរបួសស្រាល គ្រាន់តែរលាត់ដៃជើងប៉ុណ្ណោះ។
ប្រភពឱ្យដឹងទៀតថា ក្រោយពីបង្កគ្រោះថ្នាក់រថយន្ដឡិចស៊ីសបានថយក្រោយបត់ឆ្វេងឡើងតាមផ្លូវ៦១គេចខ្លួនបាត់ស្រមោល ចំណែកជនរងគ្រោះត្រូវបានរថយន្តសាមុយដឹកយកទៅសង្គ្រោះនៅគ្លីនិកឯកជនមួយ ៕
ចែករំលែកព័តមាននេះ