រាជធានីភ្នំពេញ ៖ សពបុរសម្នាក់ដែលគេអះអាងថា បានធ្វើអត្តឃាតដើរចូលទឹកទន្លេសម្លាប់ខ្លួន ហើយបានអណ្តែតឡើង កាលពីព្រឹកថ្ងៃសុក្រ កន្លងមក នៅចំណុចខាងត្បូងក្បាលម៉ាស៊ីនបូមទឹក ស្ថិតក្នុងសង្កាត់ស្រះចក ខណ្ឌដូនពេញ និងបង្កឲ្យមានការភ្ញាក់ផ្អើលត្រូវបានគេស្គាល់អត្តសញ្ញាណ ហើយក្រោយពីមានក្រុមគ្រួសារមួយបានបាត់សមាជិកម្នាក់នៅខេត្តសៀមរាប។
ប្រភពពីនគរបាលប៉ុស្តិ៍រដ្ឋបាលស្រះចកឲ្យដឹងថា កាលពីវេលាម៉ោង៧និង១៥នាទីយប់ថ្ងៃទី១៧ កុម្ភៈ ២០១២ មានបុរសម្នាក់បានជិះម៉ូតូកង់បីពីស្ពានជ្រោយចង្វាឆ្ពោះទៅមុខព្រះបរមរាជវាំង ប៉ុន្តែពេលមកដល់ខាងជើងក្បាលម៉ាស៊ីនបូមទឹក ស្ថិតក្នុងសង្កាត់ស្រះចក ខណ្ឌដូនពេញ បានឲ្យម៉ូតូឈប់ រួចដើរឆ្លងផ្លូវទៅមាត់ទន្លេទាំងអការរញីរញ៉ៃហាក់ដូចជាមនុស្សកើតជំងឺស្កន់ជាន់ ហើយចុះច្រមុជទឹកបាត់តែម្តង ។ លុះនៅព្រឹកថ្ងៃទី១៨ កុម្ភៈ វេលាម៉ោង៨ព្រឹកសពបុរសនោះបានអណ្តែតឡើងពីកន្លែងដែលគាត់ធ្វើអត្តឃាតប្រហែលជាជាង១០០ម៉ែត្រ ដោយសពផ្កាប់មុខ។ ប្រភពដដែលបានបញ្ជាក់ថា នគរបាលជំនាញបានធ្វើការពិនិត្យសពឃើញថា មិនមែនជារឿងឃាតកម្មទេ ព្រោះនៅលើខ្លួនសពមិនមានស្លាកស្នាមអ្វីនោះទេ រួចក៏យកទៅតម្កល់នៅវត្តទួលសង្កែ ដើម្បីរង់ចាំក្រុមគ្រួសារ។
ប្រភពព័ត៌មានបន្តថា នៅរសៀលថ្ងៃដដែលមានសាច់ញាតិសពបុរសនោះមកដល់វត្ត ហើយបានប្រាប់ឲ្យដឹងថា បុរសដែលធ្វើអត្តឃាតនេះ មានឈ្មោះញឹម ប៊ុនហូន អាយុ៤៨ឆ្នាំ ទីលំនៅភូមិវត្តបូ សង្កាត់សាលាកំរើក ក្រុងសៀមរាប ខេត្តសៀមរាប។ បុរសនេះបានចេញពីផ្ទះ កាលពីព្រឹកថ្ងៃទី១៧ កុម្ភៈ ២០១២ ដើម្បីធ្វើដំណើរមកភ្នំពេញ ស្រាប់តែបាត់ដំណឹងសូន្យឈឹង ទើបមានការភ្ញាក់ផ្អើលដល់សាច់ញាតិរស់នៅភ្នំពេញ និងនាំគ្នាតាមរកនៅថ្ងៃនោះដែរ តែគ្មានដំណឹង។ លុះដល់រសៀលថ្ងៃទី១៨ កុម្ភៈ ទើបឮដំណឹងថា មានបុរសម្នាក់ស្លាប់អណ្តែតទឹកទន្លេ ក៏នាំគ្នាទៅមើលឃើញថាពិតជាបុរសឈ្មោះញឹម ប៊ុនហូនមែន ៕
ចែករំលែកព័តមាននេះ