រាជធានីភ្នំពេញ ៖ រថយន្ដកូរ៉ូឡា ពណ៌ស បើកគេចពីម៉ូតូជ្រុលទៅបុករបាំងថ្មពុះចែកផ្លូវបែកពីរកង់ រួចបន្តបើកឡើងលើរបាំងថ្មចែកផ្លូវប្រមាណជាង២០ម៉ែត្រទៀត រហូតកល់រថយន្តទៅមុខលែងរួច ហើយដើរទៅសំពះអង្វរគេឱ្យជួយសែងរថយន្ដចេញ ហើយក៏បើករត់គេចដល់លើស្ពានព្រះមុនីវង្សថ្មីត្រូវសមត្ថកិច្ចក្របួចបាន ។ គ្រោះថ្នាក់នេះកើតឡើងនៅមហាវិថីព្រះនរោត្ដមកែងមហាវិថីសុធារស ត្រង់ចំណុចស្ដុបចំការមន ក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង២និង១៥នាទីរំលងអធ្រាត្រឈានចូលថ្ងៃទី១៩ កុម្ភៈ ។
សាក្សីឃើញហេតុការណ៍បានឱ្យដឹងថា មុនពេលកើតហេតុ រថយន្ដកូរ៉ូឡា ពណ៌ស បើកបរដោយបុរសម្នាក់តាមមហាវិថីសុធារស ពីកើតទៅលិចមកដល់ស្ដុបចំការមនបត់តាមមហាវិថីព្រះនរោត្ដមឆ្ពោះទៅស្ពានអាកាសក្បាលថ្នល់ ស្រាប់តែមានម៉ូតូមួយគ្រឿងទៀតជិះគ្នា២នាក់ បើកពីខាងមុខស្របទិសគ្នា ខណៈរថយន្ដកំពុងបើកក្នុងល្បឿនលឿនខ្លាចបុកម៉ូតូនោះក៏គេចជ្រុលទៅបុករបាំងចែកផ្លូវបាក់ខូចខាតអស់ពីរកង់ រួចបើកឡើងលើរបាំងថ្មចែកផ្លូវប្រមាណជាង២០ម៉ែត្រក៏កល់រថយន្តទៅមុខលែងរួចនៅមុខហាងនីម៉ារីណា ២៥២ ដែលមានភ្ញៀវកំពុងអង្គុយផឹកស៊ីនៅក្នុងហាងនោះ ។ ប្រភពព័ត៌មានបន្ដទៀតថា ក្រោយពេលរថយន្ដបើកទៅមុខលែងរួច អ្នកបើកបររថយន្ដបានចុះពីលើរថយន្ដដើរទៅសំពះអង្វរអ្នកអង្គុយផឹកស៊ីក្នុងហាងនោះឱ្យជួយលើករថយន្ដចេញ ។ ស្របពេលនោះមាននគរបាលចរាចរម្នាក់ទៅឃាត់អ្នកបើកបររថយន្ដមិនឱ្យបើកទៅមុខ ប៉ុន្ដែអ្នកបើកបរនៅតែមានះបើករថយន្ដចេញឆ្ពោះទៅស្ពានអាកាសក្បាលថ្នល់ ។ ខណៈនោះនគរបាលចរាចរបានជិះម៉ូតូដេញតាមរហូតដល់លើស្ពានមុនីវង្សថ្មី ទើបស្ទាក់រថយន្ដនោះបាន ។
ម្ចាស់រថយន្តបានឡើងជិះរថយន្តមួយគ្រឿងទៀតគេចបាត់ដោយទុករថយន្ដបង្កនៅលើស្ពានមុន្នីវង្សថ្មី ទ្រូវសមត្ថកិច្ចស្ទូចយកទៅរក្សាទុកនៅសាលារាជធានីភ្នំពេញ ដើម្បីដោះស្រាយ ៕
ចែករំលែកព័តមាននេះ